الماتى قالاسى المالى اۋدىندىق ىشكى ىستەر باسقارماسى قىزمەتكەرىنىڭ تۋىسى 18 شىلدە كۇنى پوليسيا قىزمەتكەرلەرىنە جاسالعان شابۋىلدىڭ جاي-جاپسارىن ايتىپ بەردى، - دەپ حابارلايدى Qamshy.kz «شىن» پورتالىنا سىلتەمە جاساپ.

پورتال رەداكسياسىنا اتىن اتاماۋدى سۇراپ حات جازعان ول سول كۇنگى وقيعانىڭ قالاي بولعانىن بايانداپتى.

«مەنىڭ ءىنىم – پوليسيا قىزمەتكەرى. قىلمىسكەر شابۋىل جاساعان المالى اۋداندىق ىشكى ىستەر بولىمشەسىندە جۇمىس ىستەيدى. ءدال سول كۇنى ول ءبىر تاپسىرمالارمەن قالادا جۇرگەن. تەراكت تۋرالى العاشقى حابار WatsApp-پەن تاراي باستادى. زارەمىز ۇشىپ ءىنىمىزدىڭ اماندىعىن تىلەدىك. ءوزى قانى قىزبالاۋ، ۇرىنشاقتاۋ ەدى. ايتەۋىر، قۇداي ساقتادى.

قازا بولعان جىگىتتەردىڭ وتباسىلارىنا قايعىرىپ كوڭىل ايتامىن. ارينە، مۇنداي جاعدايدى ەشكىمنىڭ باسىنا بەرمەسىن دەپ تىلەيسىڭ عوي. ەندەشە، مۇنداي قايعىلى جايتتار بولاشاقتا قايتالانباس ءۇشىن بەس قارۋدى سەرىك ەتكەن ساقشىلارىمىز قالايشا وپ-وڭاي وققا ۇشىپ، جالعىز قىلمىسكەردى توقتاتۋ ءۇشىن قانشاما بوزداق جان قيدى دەگەن ماسەلەگە ويلانىپ كورسەك. مەن ىشكى ىستەر ورگاندارىنداعى احۋالدى جاقسى بىلەمىن. قۇداي ءوزى كەشىرسىن، دەگەنمەن، الگى مارقۇم بولعان جىگىتتەردىڭ كوپشىلىگى جول-پاترۋلدىك پوليسيا جاساعىنا 5 مىڭ دوللار پارا بەرىپ كىرگەن. كوپتەگەن پوليسيا قىزمەتكەرلەرى مىلتىق اتا بىلمەيدى. پوليگونعا جىلىنا بىر-ەكى رەت بارسا، سوعان دا شۇكىر. بولىمشەدە وتىرىپ تەرگەۋشى بولىپ جۇمىس ىستەيتىن جىگىتتەردىڭ ىشىندە قولىنا مىلتىق ۇستاپ كورمەگەندەر بار.

الگى قىلمىسكەر رۋسلان ەسىك الدىنداعى وتكىزۋ-تەكسەرۋ پۋنكتىندەگى پوليسيانى اتىپ، ونىڭ قارۋىن الىپ عيماراتقا كىرۋگە جۇگىرىپ كەلگەن. تەك كىرە بەرىستە سىرتقا شىعىپ بارا جاتقان اداممەن بەتپە-بەت كەلىپ قالادى. اناۋ ونى وتكىزىپ جىبەرەمىن دەگەنشە ماگنيتى بار تەمىر ەسىك جابىلىپ ۇلگەرىپ، كەزەكشى بولىپ وتىرعان پوليسيا قىزمەتكەرى ەسىكتى قۇلىپتايتىن كنوپكانى باسا سالىپ، ءتورت اياقتاپ قاشقان. ابىروي بولعاندا ماگنيتى بار بۇل ەسىكتىڭ ورناتىلعانىنا دا بىر-ەكى-اق جىل بولعان. سول ەسىكتى اشا المايتىنىن تۇسىنگەن قىلمىسكەر عيماراتتىڭ ىشىنە بەي-بەرەكەت وق جاۋدىرىپ سىرتقا شىعىپ كەتكەن. ءىنىمنىڭ ايتۋىنشا، عيماراتتا بولعان تەرەگۋشىلەرى بار، باسقالارى بار، تولىپ جۇرگەن قىزمەتكەرلەردىڭ بىرەۋى دالىزگە شىعا الماعان. ءبارى كابينەتتەرىندە تىعىلىپ وتىرعان. سەبەبى، كوپشىلىگىندە قارۋ بولماعان. انا ماگنيتتى ەسىك بولماعاندا قىلمىسكەر بۇكىل بولىمشەنى جايراتىپ تاستار ەدى. وسى ورايدا، قىلمىسكەردى بىردەن توقتاتۋدىڭ العاشقى مۇمكىندىگىن كەزەكشى بولىپ وتىرعان قىزمەتكەر جىبەرىپ العانىن ەسكەرىپ قويىڭىز. ونىڭ الدە قارۋى بولماعان، الدە ول جەدەل شەشىم قابىلداپ ۇلگەرمەگەن.

قىلمىسكەردى زالالسىزداندىرۋدىڭ كەلەسى مۇمكىندىگى ونى ارتىنان قۋىپ بارعان  ەكى پوليسيادا بولدى. الايدى، وكىنىشكە وراي، ءارقايسىسى تاپانشالارىنداعى 6 وقتى تۇگەسە اتىپ، 12 وقتىڭ ءبىرىن دە (ءىىو قىزمەتكەرلەرى قولداناتىن ماكاروۆ تاپانشاسى 8 وقپەن وقتالادى - رەد.) دارىتا الماعان. ال، قىلمىسكەر ەكەۋىن دە جايراتىپ كەتكەن. ونان سوڭ تولە بي-ابىلاي حان كوشەلەرىنىڭ قيىلىسىنا جاقىن جەردە وققا ۇشقان جول-پاترۋلدىك پوليسياسىنىڭ ەكى قىزمەتكەرى قىلمىسكەر قاستارىنا كەلگەندە كولىكتەرىندە ۇيىقتاپ جاتقان. قىزمەتتە جۇرگەن كەزدە ۇيىقتاۋدىڭ قانداي ءقاۋىپتى ەكەنىن وسىدان كورۋگە بولادى. سول ماشينادا بولعان ءۇشىنشى قىزمەتكەر بۇل كەزدە دارەتحانادا جۇرەدى. ءسويتىپ ول امان قالادى. ول دا رۋسلاندى توقتاتا الماعان. سەبەبى، كولىكتەگىلەردىڭ دە، ونىڭ دا كابۋرالارى بوس بولعان كورىنەدى ارىپتەستەرىنىڭ ايتۋىنشا. ياعني، قارۋسىز جۇرگەن»، - دەگەن ول ەل اۋماعىندا لاڭكەستىك ءقاۋىپتىڭ «سارى دەڭگەيى» ەنگىزىلگەن ۋاقىتتا پوليسيا قىزمەتكەرلەرىنىڭ جايباراقات جۇرگەنىنە قىنجىلادى.

سونداي-اق، حات اۆتورى سوڭعى ۋاقىتتا ىشكى ىستەر ورگاندارىن پاراقورلىق پەن سالعىرتتىق جاۋلاپ العانىن ايتادى.

«ەندى ويلاپ قاراڭىزدارشى، ەلىمىزدە اقتوبەدەگى تەراكتىدەن كەيىن تەررورلىق ءقاۋىپتىڭ سارى دەڭگەيى ەڭگىزىلىپ، ساقشىلاردىڭ ساقتىعى كۇشەيتىلىپ، بەس قارۋلارى تۇگەندەلىپ، كوشەدە ساۋىت كيىپ ءجۇرۋى ءتيىس كەزدە سونشاما قىزمەتكەردىڭ قىرىلىپ قالۋى نەنىڭ بەلگىسى؟

بۇل پوليسيا ورىندارىن پاراقورلىق پەن سالعىرتتىق جايلاپ العانىن كورسەتپەي مە! جالپى، قاسىموۆ مىرزا مينيستر بولىپ كەلگەلى ىشكى ىستەر ورگاندارىن بەرەكەتسىزدىك جايلاپ الدى. ءتارتىپ جوق. قاداعالاۋ جوق. پوليسيا قىزمەتكەرلەرىنىڭ تۇراقتى دەنە شىنىقتىرۋمەن اينالىسىپ، ۇنەمى قارۋ اتىپ جاتتىعۋى دەگەن ۇمىت بولعالى قاشان. جەمقورلىق جايلاپ بىتكەن»، - دەيدى پوليسيا قىزمەتكەرىنىڭ تۋىسى.

قاندى وقيعانىڭ قالاي بولعانىن بايانداعان ول حاتىن: «مىنە، مەنى اشىندىراتىن وسى ماسەلە. ءىنىمنىڭ ەل-جۇرتتىڭ تىنىشتىعىن قورعاپ ساقشى بولىپ جۇرگەنىن ماقتان تۇتامىن. ءبىراق، ونىڭ باسىنا ءتونۋى مۇمكىن ءقاۋىپتى ويلاسام ۇيقىم قاشادى. مەنىڭ جانايقايىمدى تۇسىنىڭىزدەر. پوليسيامىز بەكەم بولماسا، قاۋىپسىزدىگىمىز قىل ۇستىندە تۇرادى عوي»، - دەپ قورىتىندىلايدى.

ەستەرىڭىزگە سالساق، قولعا تۇسكەن كۇدىكتى ر. كۇلىكبايەۆ تەرگەۋشىلەرگە "پوليسيا عيماراتىندا تەمىر ەسىك بولماعاندا، قۇرباندار سانى الدەقايدا كوپ بولار ەدى" دەپ ايتقانىن بۇعان دەيىن دە جازعان بولاتىنبىز.