10 تامىزدا الماتىداعى پسيحيكالىق ناۋقاستار ورتالىعىنان قاشىپ، 12 تامىز كۇنى ۇستالعان ناۋقاستىڭ سالافيت اعىمىن ۇستاناتىنى بەلگىلى بولىپ وتىر، - دەپ حابارلايدى Qamshy.kz.

ناۋقاس اۋرۋحانادان قاشىپ كەتتى دەگەن كۇنى الماتى پوليسەيلەرى دە اياقتارىنان تىك تۇرعان كورىنەدى. دەرەۋ قاشقىننىڭ «باعىتتاماسى» (وريەنتيروۆكا) جەر-جەرلەرگە تاراتىلىپ، ىزدەۋ جۇمىستارى قىزۋ باستالىپ كەتكەن. بۇل ىزدەۋ ادەتتەگى جىندىحانادان قاشقانداردى ىزدەۋگە مۇلدەم ۇقسامايتىنى دا سودان.

سويتسەك، 1982 جىلى تۋعان قانات قوجامبەتوۆ ەسىمدى ناۋقاس تەگىن ناۋقاس ەمەس ەكەن. ول جاي عانا كوپ ءسالافيتتىڭ ءبىرى ەمەس، 2014 جىلى وسكەمەندە جاستاردى تەرىس ءدىني اعىمعا تارتىپ، جيھادقا شاقىرعانى ءۇشىن ءىستى بولعان، سوت قاۋلىسىمەن 100 اەك كولەمىندە ايىپپۇل تولەپ قۇتىلعان، سولايشا قۇقىققورعا ۋورگاندارىنىڭ قىراعى نازارىنا ىلىككەن جان كورىنەدى. بۇل ايتىلعانداردىڭ ءبىرازى پوليسيا تاراتقان «وريەنتيروۆكادا» دا كورىنىس تاپقان.

الايدا، پوليسەيلەردىڭ اياعىنان تىك تۇرۋىنا سەبەپ بولعان جاعداي بۇل ەمەس باسقا سياقتى. ول نە دەيسىز بە؟ ول – قانات قوجامبەتوۆ بۇرىن پوليسيادا جانە ۇقك شەكارا قىزمەتىندە دە قىزمەت اتقارعاندىعى. ياعني، ەل اۋماعىندا لاڭكەستىك ءقاۋىپتىڭ «سارى دەڭگەيى» كۇشىندە تۇرعان ساتتە ءوزى سالافيت، ءوزى پسيحيكالىق ناۋقاس، ەڭ باستىسى قارۋ-جاراق قولدانۋدىڭ قىر-سىرىنا قانىق قاناتتىڭ ەمىن-ەركىن ءجۇرۋى كىمدى بولسا دا الاڭداتارى انىق.

پوليسيا جاريالاعان مالىمەتتەردە ونىڭ سالافيتتىك اعىمدى اشىق قولدايتىنى، ءوزىن بىردە «ءمادى»، بىردە «زۇلىپقار» اتايتىنى، شام ەلىندەگى قارۋلى قاقتىعىستاردى قولدايتىنى تۋرالى، سوزىلمالى شيزوفرەنيامەن ناۋقاستاناتىن ونىڭ ماجبۇرلەپ ەمدەۋ ءۇشىن اۋرۋحاناعا جاتقىزىلعانى ايتىلادى.

ابىروي بولعاندا، ءقاۋىپتى ناۋقاس كوپ كەشىكپەي كومپيۋتەر كلۋبتارىنىڭ بىرىندە پوليسيانىڭ قولىنا تۇسكەن. بوستاندىقتا ءجۇرىپ ەشقانداي قىلمىس جاساپ ۇلگەرمەپتى.