قازاقستاندىق بوكسشىلار ءا. نيازىمبەتوۆ پەن ي. دىچكو ريو وليمپياداسىنىڭ فينالىنا شىقتى، - دەپ حابارلايدى Qamshy.kz.

ريو-دە-جانەيرودا ءوتىپ جاتقان XXXI وليمپيادا ويىندارىندا بوكستان ەرلەر اراسىندا 81 كەلىگە دەيىن سالماقتا ەل نامىسىن قورعاپ جاتقان ادىلبەك نيازىمبەتوۆ بريتاندىق دجوشۋا بۋاتسيمەن فينالدىق باسەكەنىڭ جولداماسىن ساراپقا سالدى.

العاشقى راۋندتا ءۇش تورەشى دە ادىلبەكتىڭ جەڭىسىنە كۇمان كەلتىرگەن جوق. ەكىنشى جانە ءۇشىنشى كەزەڭدە نيازىمبەتوۆتىڭ باسىمدىعىمەن ءوتتى.

بۋاتسي جارتىلاي فينالعا دەيىن ۋگاندالىق كەننەدي كاتەندە مەن وزبەك ەلشود راسۋلوۆ، سونداي-اق الجير بوكسشىسى ابدەلحافيد بەنشابلانى ايقىن باسىمدىقپەن ۇتقان ەدى. قارسىلاستارىن قايتا-قايتا نوكداۋنعا تۇسىرگەن بريتاندىق بوكسشىنى بۋكمەكەرلىك كەڭسەلەر جارتىلاي فينالدىڭ ءفاۆوريتى ساناعان ەدى. الايدا نيازىمبەتوۆ ءوزىنىڭ وسال بوكسشى ەمەس ەكەنىن دالەلدەي ءبىلدى.

ايتا كەتەيىك، ادىلبەك نيازىمبەتوۆ 1/8 فينالدا بەلارۋس بوكسشىسى ميحايل دولگوليەۆەستى جانە شيرەك فينالدا ءازىربايجاندىق تەيمۋر مامەدوۆتى جەڭگەن بولاتىن. وسىلايشا نيازىمبەتوۆ ەكىنشى رەت وليمپيادا ويىندارىنىڭ فينالىنا شىعىپ وتىر.لوندوندا ول كۇمىس مەدال العان.

ال، ەل نامىسىن قورعاپ جۇرگەن يۆان دىچكو شيرەك فينالدا ەفە ادجاگبانى ۇتتى.

يۆان ءۇش راۋندتا دا قارسىلاسىنا ەش مۇمكىندىك بەرگەن جوق. كەزدەسۋ تىزگىنىن العاشقى مينۋتتان ءوز قولىنا ۇستادى. ناتيجەسىندە ءۇش تورەشى دە دىچكونىڭ جەڭىسىنە كۇمان كەلتىرگەن جوق.

يۆان وسىنىڭ الدىندا ءازىربايجاندىق ماگومەدراسۋل مەدجيدوۆتان باسىم تۇسكەن بولاتىن. ول كەزدە مەدجيدوۆتىڭ قاباعى جىرتىلىپ، دارىگەرلەر وعان جارىستى جالعاستىرۋعا تىيىم سالعان بولاتىن.

وسىلايشا دىچكو ەكىنشى رەت وليمپيادا ويىندارىنىڭ جارتىلاي فينالىنا شىعىپ وتىر. بۇدان ءتورت جىل بۇرىن لوندوندا قولا جۇلدەگەر اتانعان ەدى.