ق ر پرەزيدەنتى نۇرسۇلتان نازاربايەۆتىڭ سوچيدە وتكەن رف باسشىسى ۆلاديمير پۋتينمەن كەزدەسۋىندە رەسەي باسشىسى قازاقستاندىق ارىپتەسىنە تۇركيا-رەسەي قارىم-قاتىناسىن قالىپقا كەلتىرۋدەگى ەڭبەگى ءۇشىن العىس ايتتى، - دەپ حابارلايدى Qamshy.kz اقوردا سايتىنا سىلتەمە جاساپ.

كەزدەسۋ بارىسىندا مەملەكەتتەر باسشىلارى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلادى، سونداي-اق وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.

نۇرسۇلتان نازاربايەۆ پەن ۆلاديمير پۋتين G20، تمد مەملەكەتتەرى باسشىلارىنىڭ كەڭەسى جانە قازاقستان-رەسەي ءوڭىرارالىق ىنتىماقتاستىق فورۋمى اياسىندا وتەتىن الداعى كەزدەسۋلەرگە دايىندىق بارىسىن قاراستىردى.

مەملەكەت باسشىسى سوچي قالاسىنا شاقىرعانى ءۇشىن ۆ.پۋتينگە العىس ايتىپ، ونىڭ رەسەي وڭىرلەرىن دامىتۋ جولىنداعى قاجىرلى ەڭبەگىن اتاپ ءوتتى. نۇرسۇلتان نازاربايەۆ ەكىجاقتى ىنتىماقتاستىقتىڭ قارقىنىنا ريزاشىلىعىن ءبىلدىرىپ، ونى قازاقستاننىڭ ىلگەرىلەتە تۇسۋگە نيەتتى ەكەنىن ايتتى.

– ءبىزدىڭ قارىم-قاتىناسىمىز ساياسي تۇرعىدان دا، ەكونوميكالىق تۇرعىدان دا ۇلگى ەتۋگە لايىق دەپ سانايمىن. وسى جىلدارى قازاقستان مەن رەسەيدىڭ 6 مىڭ بىرلەسكەن كاسىپورنى قۇرىلىپ، ينتەگراسيامىزدىڭ ومىردە ناقتى ىسكە اسقانىن كورسەتتى. الداعى قازاقستان-رەسەي ءوڭىرارالىق ىنتىماقتاستىق فورۋمىنا ۇلكەن ءۇمىت ارتامىن. ونىڭ ەكونوميكالىق تۇرعىدان ماڭىزدى كەزدەسۋ ەكەنىن بىلەمىن، وسىعان وراي كوپتەگەن جوبالار ازىرلەنۋدە. قازىرگى ماسەلەلەر ءبىزدىڭ ۇكىمەتتەرىمىز ارقىلى شەشىمىن تابۋدا. ەلدەرىمىزدىڭ مىندەتى – وسىنداي قيىن جاعدايدا ءاردايىم بىرگە بولۋ جانە بىر-بىرىمىزگە كومەكتەسۋ. دوستىق، ىنتىماقتاستىق مەن ءوزارا كومەك تۋرالى شارتقا جانە ءححى عاسىرداعى تاتۋ كورشىلىك پەن وداقتاستىق تۋرالى شارتقا نەگىزدەلگەن قازاقستان-رەسەي قارىم-قاتىناسى تۇراقتى بولىپ قالا بەرەدى. قازاقستان مەن رەسەي سەنىمدى كورشى ءارى ارىپتەس بولىپ سانالادى جانە بارلىق ماسەلەلەردى وركەنيەتتى ەلدەردەگى ۇلگى بويىنشا شەشەدى. رەسەيدىڭ تۇركيامەن قارىم-قاتىناسى جاقسارىپ كەلە جاتقانىنا قۋانىشتىمىن، – دەدى قازاقستان پرەزيدەنتى.

ۆ.پۋتين قازاقستان پرەزيدەنتىنىڭ رەسەي-تۇركيا قارىم-قاتىناسىن قالىپقا كەلتىرۋ جولىنداعى قايرات-جىگەرى ءۇشىن العىس ايتىپ، جاعدايدى رەتتەۋدەگى بىتىمگەرلىك ميسسياسىن اتاپ ءوتتى.

– كورىپ وتىرعانىمىزداي، بۇل قادام جەمىستى بولدى. ءبىز كوپتەگەن جىلدار بويى بىرەگەي ىنتىماقتاستىق قارىم-قاتىناسىمىز بەن ءوزارا ءىس-قيمىلىمىز ورنىققان دوستاس تۇركيامەن تولىق فورماتتاعى قارىم-قاتىناستى قالىپقا كەلتىرۋگە رياسىز ۇمتىلىس جاساپ وتىرمىز. تۇركيا پرەزيدەنتى ر.ەردوعاننىڭ رەسەيگە سوڭعى ساپارى ەكىجاقتى بايلانىستاردى قالىپقا كەلتىرۋ عانا ەمەس، ونى دامىتۋ جونىندە دە ءبىزدىڭ تولىققاندى جۇمىس جۇرگىزۋگە نيەتتى ەكەنىمىزدى دالەلدەپ بەردى. سول ءۇشىن سىزگە كوپ راحمەت، – دەدى رەسەي پرەزيدەنتى.

بۇدان بولەك، ۆ.پۋتين قازاقستان مەن رەسەي اراسىنداعى ستراتەگيالىق سەرىكتەستىكتىڭ بارلىق باعىت بويىنشا تابىستى دامىپ كەلە جاتقانىنا نازار اۋداردى.

– ارينە، ءبىز ەكونوميكادا قيىندىقتارعا دا كەزىگىپ تۇرامىز، اسىرەسە الەمدىك شيكىزات نارىعىنداعى تۇراقسىزدىق پەن ۆاليۋتالىق اۋىتقۋ جاعدايىندا تومەندەۋ بايقالۋدا. بۇل رەتتە ناقتى كولەمى جونىنەن ول سونشالىقتى كوپ ەمەس – نەبارى 7%. قازىرگى ىنتىماقتاستىق تەتىكتەرى بىزگە ونى ەڭسەرۋگە مۇمكىندىك بەرەدى. ال بىزدە مۇنداي تەتىكتەر ءتيىمدى جۇمىس ىستەۋدە، – دەدى رەسەي پرەزيدەنتى.