مادەنيەت جانە سپورت ءمينيسترى ارىستانبەك مۇحامەدي ۇلىنىڭ «فەنيكس» ءفيلمىن تۇسىرۋشىلەردەن 150 مىڭ دوللار اقشا تالاپ ەتكەنىن قازاقستاننىڭ حالىق ءارتىسى تۇڭعىشباي جامانقۇلوۆ تا راستاپ وتىر، - دەپ حابارلايدى Qamshy.kz.
«فەنيكس» فيلمىنە پروديۋسەرلىك ەتكەن ت. جامانقۇلوۆ ءفيلمنىڭ ءتۇسىرۋ جۇمىستارىنىڭ اياقتالۋىنا ا. مۇحامەدي ۇلىنىڭ ەل اراسىندا «وتكات» دەپ اتالىپ كەتكەن اقشا تالاپ ەتۋى كەدەرگى بولدى دەپ وتىر.
«جەل سوقپاسا ءشوپتىڭ باسى قيمىلدامايدى» دەگەن بار. بۇل اڭگىمەلەر بەكەر ايتىلىپ جاتقان جوق. ارينە، ءبىز ەشتەڭەنى دالەلدەي المايمىز. پاراقورلار بارلىعىن ويلاستىرىپ قويادى ەمەس پە؟ ءبىراق، بىزدەن 150 مىڭ دوللار سۇرادى. ونىڭ ادامى كەلىپ، قاعازعا وسىنشا كەرەك دەپ جازىپ كورسەتتى دە، قاعازدى جىرتىپ تاستادى. ءبىز ونى ءتۇسىرىپ، ۇلگەرە المادىق. كەيىن مۇنىڭ ءبارىن دالەلدەپ جۇرەمىز دەپ ويلادىق پا ول كەزدە»، - دەيدى ت. جامانقۇلوۆ.
ءتۇسىرۋ توبىندا قاراجات بولماعاندىقتان اتالعان سوما مينيسترگە جەتپەگەن. رەجيسسەر مەن پروديۋسەر مينيسترمەن ءتىل تابىسامىز دەگەن ارەكەتتەرى دە ءساتسىز اياقتالعان. ءسويتىپ، كينولەنتانى قارجىلاندىرۋ ءۇشىن مينيستر قولما قول اقشا سۇراعان كورىنەدى.
«ءبىز الدىمەن اقشانى اۋدارسىن، سوسىن بىردەڭە ويلاستىرارمىز دەپ تە ايتتىق. ءبىراق، بىزگە «اقشانى الدىمەن بەرىڭدەر» دەپ تالاپ قويدى. بىزدە اقشا بولمادى، بەرە المادىق. ال، ول جەتى اي بويى ءبىز 150 مىڭ دوللار اكەپ بەرەدى دەپ كۇتىپ ءجۇردى. بارلىق داۋ وسىدان بولىپ وتىر»، - دەيدى ت. جامانقۇلوۆ.
اكتەردىڭ ايتۋىنشا، كەيىن «فەنيكس» جوباسىنا دەپ مەملەكەتتەن جوسپارلانعان قاراجات باسقا جاققا باعىتتالىپ كەتكەن.
«ول بۇل اقشانى باسقا جاققا جىبەردى. مۇمكىن، سول جاقتا وعان سۇراعانىن تولەگەن شىعار. ءبىراق، بىزدە دالەل جوق. ءبىز شەنەۋنىك، باستىق ەمەسپىز. بىزدە قانداي دا ءبىر قىسىم جاساۋ، ىقپال ەتۋ تەتىكتەرى دە جوق. ال، ول – مەملەكەتتىڭ ادامى، وعان ءبارى جاعىمپازدانادى. ونىڭ ءسوزىن ءبارى سويلەيدى، ال، ءبىزدى كەز-كەلگەن ادام قارالاي الادى. بار بولعانى ءبىز مينيستر بولماعانىمىز ءۇشىن»، - دەپ اشىنادى ت. جامانقۇلوۆ.
ال، ءمينيستردىڭ ءوزى بولسا بۇعان دەيىن ەشقانداي اقشا الماعانىن، الۋعا ارەكەتتەنبەگەنىن ايتىپ اقتالعان بولاتىن. ءتىپتى، وزىنە اۋىر ايىپ تاققان رەجيسسەر تالعات جانىبەكوۆتى سوتقا دا بەرگەن. كەيىن ءمينيستردىڭ ارىزىن قايتىپ العانى حابارلاندى.
