رەسەيدىڭ انتروپولوگيا جانە ەتنوگرافيا (كۋنستكامەرا) مۋزەيىنىڭ اكىمشىلىگى قازاقتىڭ كەيكى باتىرى مەن كەنەسارى حانىنىڭ باس سۇيەكتەرىن قايتارۋ ماسەلەسىنە وراي رەسمي مالىمدەمە تاراتتى، - دەپ حابارلايدى Qamshy.kz kazmuseum.kz – كە سىلتەمە جاساپ.

«رەسەيدىڭ انتروپولوگيا جانە ەتنوگرافيا (كۋنستكامەرا) مۋزەيىندە 1933 جىلى تىركەلگەن باس سۇيەك ساقتالعان. باس سۇيەكتىڭ قۇجاتىندا:

«چەرەپ «…» كازاكا كەيكي، ۋروجەنسا كايداۋلسكوي ۆول.، تۋرگايسكوگو ۋ.، كازنەننوگو ۆ سوۆەتسكيي پەريود. وت «///» ۆ 1926 گ.» دەپ جازىلعان.

باس سۇيەك ەشقاشان كورمەلەرگە، ەكسپوزيسيالارعا قويىلماي، تەك مۋزەي قورىندا ساقتالعان.

سونداي-اق، مۋزەي كەنەسارى حاننىڭ باس سۇيەگىنە قاتىستى ەشقانداي مالىمەت جوق ەكەنىن حابارلايدى. بەلگىلى ءبىر دەڭگەيدەگى قۇجاتتاردىڭ بولماۋىنا بايلانىستى كەنەسارى حاننىڭ باس سۇيەگىنە قاتىستى دەرەكتەر كۋنستكامەرادا جوق ەكەنىن مالىمدەيدى.

قازاقستان تاراپىنا مۋزەي جيناقتارىن بەرۋ مۋزەي اكىمشىلىگىنىڭ قۇزىرەتىنە كىرمەيدى. بۇل ماسەلەنى رەسەي فەدەراسياسىنىڭ مادەنيەت مينيسترلىگى شەشەدى.  

قازىرگى ۋاقىتتا كۋنستكامەرانىڭ قورىندا قازاقستاننىڭ ەتنوگرافياسىنا قاتىستى بىرنەشە مۋزەي جيناعى ساقتالعان. جيناقتاردى مۋزەي مامانداردى زەرتتەپ ءجۇر. سوڭعى كەزدەرى قازاقستاندىق ماماندارمەن بۇل ىستە بىرىگىپ جۇمىس ىستەۋدەمىز»، - دەلىنگەن مالىمدەمەدە.

ايتا وتەيىك، وسىعان دەيىن ق ر ۇكىمەتىنىڭ باسشىسى كارىم ءماسىموۆ رەسەي ۇكىمەتىنىڭ باسشىسى دميتريي مەدۆەديەۆپەن كەزدەسۋدە  كەيكى باتىر مەن كەنەسارى حاننىڭ باس سۇيەگىن قازاقستانعا قايتارۋ تۋرالى ماسەلەنى كوتەرگەن بولاتىن.