اقپارات جانە كوممۋنيكاسيا ءمينيسترى داۋرەن ابايەۆتىڭ اقپارات سالاسىنا جاۋاپتى ورىنباسارى بولىپ الان اجىبايەۆ تاعايىندالدى، - دەپ حابارلايدى Qamshy.kz. 

مينيستر بۇل تۋرالى ءوزىنىڭ فەيسبۋك جەلىسىندەگى پاراقشاسىندا جاريالادى.

«قىمباتتى دوستار!مىنا ءبىر ەلەۋلى جاڭالىقتى وزدەرىڭىزبەن ءبولىسىپ قويايىن، اقپارات سالاسىنا جاۋاپتى ۆيسە-مينيستر قىزمەتىنە الان عازيز ۇلى اجىبايەۆ تاعايىندالدى»، - دەپ جازادى مينيستر.

الان اجىبايەۆ  ەڭبەك جولىن 90- جىلداردىڭ ورتاسىندا «ماكس» راديوسىندا راديوجۇرگىزۋشى بولىپ باستاپ، ءار جىلدارى «31 ارنادا»،  «كاراۆان» راديوسىندا، «تاڭ» تەلەراديوكومپانياسىندا» جانە «تەنگري فم» راديوسىندا ءتۇرلى قىزمەتتەردە بولعان. سوڭعى جىلدارى «ايقىن» جانە «ليتەر» قوعامدىق-ساياسي گازەتتەرىن باسقارعان.

«بۇگىنگى كۇنى بۇل سالا بويىنشا الدىمىزدا ءبىرقاتار ماڭىزدى مىندەتتەر تۇر. الان عازيز ۇلىنىڭ جۋرناليستىك قىزمەتتەگى مول تاجىريبەسى مەن بىلىكتىلىگى وسى مىندەتتەردى تابىستى جۇزەگە اسىرۋعا نەگىز بولادى دەپ سەنەمىن»، - دەپ جازادى د. ابايەۆ.