بۇگىن، ياعني 15 كوكەكتى قازاق ءباسپاسوزى عاشىقتار كۇنى دەپ ناسيقاتتاعالى بىرنەشە جىل بولدى. ءبىراق سوزدەن ارىعا بارماي ءجۇر. ءاۋ باستا "جاس الاشتىڭ" باستاماسىمەن ۆالەنتين كۇنىنە قارسى ناسيقات رەتىندە باستالعان. سوڭعى كەزدەرى "ۆالەنتيننىڭ" ءدامى كەتە باستاسا  دا،  ءبىزدىڭ بۇگىنگى عاشىقتار مەيرامىمىز تويلانباي تۇر.  بۇعان بىرنەشە سەبەپ بار:

1. اتالمىش كۇندى قوزى-كورپەش كۇنى دەگەنمەن، ول جىرعا دا قوزى مەن بايانعا دا بايلانىستىراتىن دايەك جوق. انشەيىن، الماتىداعى كوكتەمنىڭ جاقسى كۇندەرى بولعاسىن الىنا سالعان.

2. بەلگىلەنگەن مەرەكەنىڭ اتريبۋتى، بەلگىسى، ءداستۇرى جوق...

ودان ارىگە بارماي-اق، وسى جەردەن توقتاپ، مىنا نارسەنى قوسا كەتكەندى ءجون كوردىك.

وسىدان بىرنەشە جىل بۇرىن قىز جىبەك جىرىنىڭ 500 جىلدىعى اتالىپ ءوتتى، ول يۋنەسكو دەڭگەيىندە تىركەلدى. بۇل جىر قازاقتان باسقا تۇركىلەرگە تيەسىلى ەمەس، ناعىز قازاقى عاشىقتىق برەندى.  ال، باسقا عاشىقتىق داستاندارى مەن تاريحىنا وزگە تۇركىلەردىڭ تالاسى بار. ەكىنشىدەن، قازاقتى الەمگە العاش ايگىلەگەن ونەر دە وسى "قىز جىبەك" ءفيلمى. بۇل - اينىماعان رومەو-دجۋلەتتانىڭ دالالىق نۇسقاسى. قىزىعى سول، جىبەكتىڭ رولىنە قىز تاڭداۋ كاستينگى 1970 جىلى  19 مامىر كۇنى (مەرۋەرت وتەكەشوۆانىڭ ءالى كۇنگە دەيىن ەسىندە، ءوزىم حابارلاسىپ ارنايى انىقتاعام) وتكەن. مىنە، وسى كۇن - قازاق عاشىقتىق سەزىمىن ايگىلەۋگە، ناسيقاتتاۋعا لايىق كۇن ەمەس پە؟

راس، جىبەك پەن تولەگەن، قوزى مەن بايان سەكىلدى بايانسىز ماحاببات ۇلگىسى، ءبىراق ونى باياندى ەتىپ، جالعاستىرىپ مەرۋەرت پەن قۇمان ءالى ءتىرى جۇرگەن جوق پا؟ اتريبۋت تا، ميف تە، ءداستۇر دە تۇنىپ تۇر. ونىڭ ۇستىنە مامىر ايى قازاقتى بىلاي قويعاندا، بار حالىق ءۇشىن ماحاببات ايى! وسى كۇندى تاڭداپ، بيىلدان باستاپ قولعا العان ابزال بولار ەدى.

سەرىك ەرعالي