ريو تورىندە توپ جارعان سپورتشىلاردىڭ سوڭى ەلگە ورالدى. ءوليمپتى باعىندىرعان بوكسشى دانيار ەلەۋسىنوۆ، جۇلدەگەرلەر ۆاسيليي ليەۆيت، ادىلبەك نيازىمبەتوۆ، يۆان دىچكو جانە گيۋزەل مانيۋروۆانى  استانا جۇرتى ءتۇن جارىمعا قاراماستان ىستىق ىقىلاسپەن قارسى الدى. قالا اكىمى دە چەمپيونداردىڭ قاسىنان تابىلىپ، ولارعا باعالى سىيلىقتار تابىس ەتتى. ەلوردا اتىنان شىقققاندار ءتىپتى تاپ سول جەردە تارتۋ ەتىلگەن قىمبات كولىكتەرىن ۇيلەرىنە ءمىنىپ كەتتى. ال اۋەجاي الدىنا ارنايى ساحنا قۇرىلىپ، جانكۇيەرلەر الاڭعا سىيماي قالدى، - دەپ حابارلايدى Qamshy.kz كتك ارناسىنا سىلتەمە جاساپ.

بۇل – ەلگە جەڭىسپەن ورالعان وليمپياداشىلاردى سىرتتا تاعاتسىزدانا كۇتكەن استانالىقتار. ءتۇن جارىمعا قاراماستان ءتاتتى ۇيقىسىن قيىپ كەلگەن جۇرتتىڭ قاراسى قالىڭ. ال اۋەجاي ىشىندە سپورتشىلاردىڭ تەك ەت جاقىندارى مەن قاپتاعان تىلشىلەر عانا. دانيار ەلەۋسىنوۆتىڭ سۋرەتىن ۇستاعان بالعىن دا اكەسىن كورۋگە اسىعىپ تۇر. ءوليمپتى باعىندىرعان باتىرلار دا كوپ كۇتتىرمەي جەتىپ، بىردەن سىرتتاعى ساحناعا بەت الدى.

-سپورت جۇلدىزدارىن قارسى العانىمىزعا قۋانىشتىمىز. دۋ قول شاپالاقپەن قارسى الايىق.

ەلگە ورالعان سپورتشىلار اراسىندا التىن العان بوكسشى دانيار ەلەۋسىنوۆ، كۇمىس جۇلدەگەرلەر – بوكسشىلار ادىلبەك نيازىمبەتوۆ، ۆاسيليي ليەۆيت، بالۋان گيۋزەل مانيۋروۆا، قولا جۇلدەگەرلەر – بوكسشىلار يۆان دىچكو، داريعا شاكيموۆا، بالۋاندار ەلميرا سىزدىقوۆا جانە ەكاتەرينا لاريونوۆا. جەڭىمپازداردى جانكۇيەرلەرمەن بىرگە قالا اكىمى اسەت يسەكەشوۆ تە قارسى الىپ، ەلوردا اتىنان شىققان ەلەۋسىنوۆ، مانيۋروۆا جانە ليەۆيتكە ەليتالىق پاتەر سىيلايتىنىن ايتىپ، قىمبات كولىكتىڭ كىلتىن تابىستادى. 

ال ەلگە ماقتانىشپەن ورالعان سپورتشىلاردىڭ، ارينە، قۋانىشىندا شەك جوق. قولداۋ بىلدىرگەن جانكۇيەرلەرگە العىس ايتىپ، قاتتى تولقىپ كەتتى.

دانيار ەلەۋسىنوۆ، ريو-دە-جانەيرو وليمپياداسىنىڭ جەڭىمپازى:

-اسسالاۋماعالەيكۋ،م جينالعان قاۋىم! قولداۋلارىڭىزعا راحمەت كوپ-كوپ. جانكۇيەر بولعاندارىڭىزعا. سەزىندىك مۇحيتتىڭ ارعى جاعىندا بولساق تا. جەڭىسكە جەتۋگە مۇمكىندىك جاساپ وتىرعان ەلباسىعا مىڭ دا ءبىر العىس.

گيۋزەل مانيۋروۆا، ريو-دە-جانەيرو وليمپياداسىنىڭ كۇمىس جۇلدەگەرى:

-تۇنگى ۋاقىتقا قاراماي ءبىزدى كۇتىپ العاندارىڭىزعا راحمەت. سىزدەردىڭ قولداۋلارىڭىزدىڭ ارقاسىندا وسى مەدالدارعا قول جەتكىزدىك.

وسىلايشا، استانا اۋەجايىندا تاڭ اتقانشا تىنىم بولعان جوق. ءيىن تىرەسكەن جۇرت ريو تورىندە توپ جارعان چەمپيونداردان قولتاڭبا الىپ، سۋرەتكە تۇسۋگە تالاستى.

قاپتاعان جانكۇيەردىڭ استىندا قالا جازداعانن سپورتشىلار كەيىن سىيعا العان قىمبات كولىكتەرىن كورسەتتى. سۇلىكتەي قارا دجيپ دانيارعا، قالعان سۇر ءتۇستى ەكەۋى ۆاسيليي مەن گيۋزەلگە تيەسىلى. ءبىراق ولار ءۇشىن ءقازىر جاقىندارىمەن قاۋىشىپ، ۇيدە تىنىعۋ ماڭىزدى. سوندىقتان ءارقايسىسى سىيعا العان كولىكتەرىنە وتىرىپ، ۇيلەرىنە تاراپ كەتتى.