الماتى ىرگەسىندەگى كوكساي اۋىلىنىڭ تۇرعىندارى باعدارشامعا زار بولىپ وتىرمىز دەيدى. قاراساي اۋدانىنا قاراستى اۋىل تۇرعىندارى كولىك كەپتەلىسى سالدارىنان كوپتەگەن قيىندىقتار تۋىپ وتىرعانىن ايتادى. Qamshy.kz رەداكسياسىنا جولدانعان كوكسايلىقتاردىڭ حاتىن تولىق كۇيىندە جاريالاپ وتىرمىز.

الماتى وبلىسى قاراساي اۋدانىنا تيەسىلى ىرگەلى، كوكساي ت.ب. اۋىلدار مەن ەلدى مەكەندەردىڭ كوپشىلىگى الماتى قالاسىنىڭ ىرگەسىندە ورنالاسقاندىقتان، ءتىپتى قالانىڭ جالعاسى ىسپەتتى. بۇرىن قاراساي اۋدانىنا قاراعان العاباس سەكىلدى ولاردى دا قالانىڭ قۇرامىنا قوسۋ تالابى ۋاقىت وزعان سايىن تۋىنداپ جاتقان سىڭايلى. قالا مەن وبلىستىڭ شەكاراسىندا تۇرعان بۇل جەردەگى حالىق قاي جاققا بارىپ ماسەلەسىن شەشۋ كەرەكتىگىن دە كەيدە تۇسىنبەي قالادى. بۇل جالپىلاما ماسەلە بولعانمەن، بۇگىنگى ءبىز كوتەرىپ وتىرعان جايتپەن مازمۇنداس بولعان سوڭ، ايتىپ وتىرمىز.

جوعارىدا ايتىپ وتكەن ەلدىمەكەندەردە تۇرىپ جاتقان حالىقتىڭ نەگىزگى ماسەلەسىنىڭ ءبىرى – جول كەپتەلىسى.

قاراساي اۋدانى كوكساي اۋىلىنداعى قوجابەكوۆ پەن اراي كوشەلەرىنىڭ قيىلىسىنداعى، حالىق تىلىندە «تۇرىكتەر اينالماسى» دەپ اتالىپ كەتكەن اينالما جول كولىكتىڭ ءجۇرۋ سانى جاعىنان قالانىڭ كەيبىر كوشەلەرىنەن اسىپ تۇسەدى.

سەبەبىنە ۇڭىلسەك، قازاقستان بويىنشا ەڭ ۇلكەن مەگاپوليس – الماتى قالاسىنىڭ وزىندە تىركەلگەن كولىكتەردىڭ سانى ءقازىر 600 مىڭعا جۋىقتاسا، كۇنىنە 300 مىڭنان اسا كولىك وزگە وڭىرلەردەن كەلىپ كىرەدى ەكەن. ولاردىڭ 40-50% - الماتى-بىشكەك باعىتىنان، ياعني التىن وردا بازارى جاقتان كەلەدى. رايىمبەك داڭعىلىنداعى جول كەپتەلىسىنەن «قاشپاقشى» بولعاندار دا «تۇرىكتەر اينالماسى» ارقىلى قالاعا كىرۋگە جانە كەشكە قاراي شىعۋعا تىرىسادى.

بۇل ءوز كەزەگىندە  تاڭەرتەڭ 7:30-9:30 اراسىندا كەشكە ساعات 17:30-21:00 عا دەيىن ساعاتتاپ جالعاسىپ جاتاتىن جول كەپتەلىسىن تۋدىرادى. ماشينالار ءبىرىنىڭ ارتىنان ءبىرى سيگنال بەرىپ، ايقايدى سالىپ، ءتىپتى بىر-بىرىمەن ەرەگەسىپ جاتاتىنداردا ۇيرەنشىكتى جاعدايعا اينالعان. بۇل اينالما جولدىڭ بويىنداعى كۇندەلىكتى كورىنىس وسى. ەشكىمنىڭ دە بىرەۋمەن كەڭىردەك جىرتىسىپ ۇرسىسقىسى جوق ارينە. تەك، جۇيكەنى توزدىرعان جول كەپتەلىسى تاڭەرتەڭ جۇمىسقا، كەشكە جۇمىستان شارشاپ ۇيگە قايتۋعا اسىققان جانداردىڭ سابىرىن تاۋىسىپ جىبەرەدى.

كولىك كەپتەلىسى قازىرگى زاماندا ارينە بارلىق كوشەدە كەزدەسەدى. دەگەنمەن ءدال وسى «تۇرىكتەر اينالماسىنداعىداي» كۇنىگە ساعاتتاپ سوزىلمايدى. جولىن تاپسا، اكىمشىلىك ءتيىستى ورىندار ناقتى ءىس ارەكەتكە كوشىتىن بولسا شەشىلمەيتىن قيىن شارۋا ەمەس.

كوكساي اۋىلىندا ورنالاسقان اينالما جولدىڭ بويىندا ورىن الىپ وتىرعان، حالىقتىڭ جۇيكەسىن ابدەن جۇقارتىپ بىتكەن بۇل جايتتىڭ شەشىمى – باعدارشام قويۋ. سونداي-اق باعدارشامعا زار بولعان اينالما جول بويىندا جول-كولىك وقيعالارى دا ءجيى ورىن الادى. ونىڭ سالدارىنان تۋىنداعان كەپتەلىستەر ءتىپتى ساعاتتاپ سوزىلادى.

جەرگىلىكتى حالىق قاراپايىم عانا ماسەلە ۇزاققا سوزىلماي، قاراساي اۋدانى اكىمشىلىگى، اۋداندىق جول پوليسيا باسقارماسى تاراپىنان كوڭىل ءبولىنىپ، باعدارشام قويىلاتىنىنا ۇمىتتەنەدى.