فەيسبۋك جەلىسىندە بانكسەنتركرەديت قارجى ۇيىمىنىڭ قاتەگە تولى تۇبىرتەگى قىزۋ تالقىلانۋدا، - دەپ حابارلايدى Qamshy.kz.

جەلى قولدانۋشىلارىنىڭ اشۋىن تۋعىزعان تۇبىرتەكتەگى جازۋلاردان شىنىمەن دە ەشتەڭە تۇسىنە المايسىز. ونداعى «ۋيقىتى»، «سومي»، «يلۋگي شوليتىش كيشيجيت» دەگەن سوزدەرمەن بانكتىڭ ءوز كليەنتتەرىنە نە ايتپاق بولعانى بەلگىسىز.

ءبىر بەلگىلىسى، قاراپايىم «راقمەت» دەگەندى قاتەسىز جازا الماعان بانك تەرمينالى ءسوزدىڭ سوڭىن قازاق تىلىندەگى بىلاپىت ۇعىمعا جاقىن «سيكتيڭىز» دەپ اياقتاپتى.

مارعۇلان اقان ەسىمدى جەلى قولدانۋشىسى بانكتىڭ بۇل قىلىعىن الدا كەلە جاتقان «تىلدەر كۇنى» قارساڭىنداعى قىڭىر-قيسىق ارەكەتى بولار دەپ جورىپتى.  

«تۇبىرتەكتى وسىدان كەيىن ساقتاۋعا بولا ما بولماي ما ويلانىپ كورۋ كەرەك! ءبىر قاتەلىك كورىپ جابىسا قالاتىن ادەتىمىز دە شىعار، ءبىراق بۇل ۇيات ەمەس پە؟! سوڭعى اپتادا ءتىلدىڭ ماسەلەسى ۋشىعىپ كەتتى-اۋ... باسە نەگە دەسەم، 22-قىركۇيەك جاقىنداپ كەلەدى ەكەن عوي. سول ءۇشىن جاساپ جاتقان قىڭىر-قيسىق ارەكەتتەرى بولار. ەڭ جاقسىسى بۇل قاتەلىكتى كورگەنىمىز، ەڭ جامانى تاۋەلسىز، دەربەس ەلدىڭ تىلىنە دەگەن قۇرمەتتىڭ جوقتىعى. قۇرمەت پەن سىيلاستىق كورسەتە الماعان مەكەمەنى نە ادامدى «جوق قىلىپ جىبەرۋ» كەرەك! 
«فب – بۇگىنگى گازەت»،-دەپ ءجۇرمىز عوي، وندا گازەتكە جازىپ ءبىر جاعىنا شىعارايىق!»، - دەپ جازادى ول.