ۇكىمەت ۇيىندە ق ر پرەمەر-مينيسترىنىڭ ورىنباسارى داريعا نازاربايەۆا رەسپۋبليكالىق بيۋدجەت جانە حالىقارالىق ۇيىمدارمەن بىرلەسكەن جوبالارمەن قارجىلاندىرىلاتىن ساراپتامالىق جانە الەۋمەتتىك زەرتتەۋلەر ماسەلەلەرى بويىنشا كەڭەس وتكىزدى، - دەپ حابارلايدى Qamshy.kz pm.kz – كە سىلتەمە جاساپ.

كەڭەس بارىسىندا د. نازاربايەۆا تاقىرىپتاردىڭ قايتالانۋىن جويىپ، جۇرگىزىلەتىن زەرتتەۋلەر ادىستەمەسىنە ورتاق تالاپتار بەكىتۋدى تاپسىردى.

«مىندەتتى تۇردە قازاقستاندىق مازمۇن بولۋى ءتيىس. ءبىز تاپسىرىس بەرۋشىلەرمىز، ءبىزدىڭ ءوز تالاپتارىمىز بولۋى ءتيىس. ەگەر بۇل تالاپتار بىزدە ناقتى كورسەتىلمەگەن بولسا، ءبىز ولاردان جۇمىس ساپاسىنىڭ قانداي كەپىلدىگىن كۇتەمىز. بۇل جۇمىستى جىلدىڭ سوڭىنا دەيىن ۇلتتىق ەكونوميكا مينيسترلىگى ءبىلىم جانە عىلىم، سونىمەن قاتار قارجى مينيسترلىگىمەن بىرلەسىپ جونگە قويۋى ءتيىس»، - دەدى د. نازاربايەۆا.

بۇدان بولەك، ق ر پرەمەر-مينيسترىنىڭ ورىنباسارى سوڭعى ءۇش جىلعا رەسپۋبليكالىق بيۋدجەتتەن قارجىلاندىرىلاتىن زەرتتەۋلەردىڭ تيىمدىلىگىنە تالداۋ جاساۋدى تاپسىردى.

«ەڭ باستىسى - ولاردىڭ ناتيجەلەرىنە پراكتيكالىق قولدانىس تابۋ. ول ءۇشىن زەرتتەۋلەر ناتيجەلەرى مەن مەملەكەتتىك ۆەدومستۆولارعا بەرىلگەن ۇسىنىستاردىڭ كەڭ تارالۋىن قامتاماسىز ەتۋ قاجەت. سونىمەن قاتار، تاپسىرىس بەرىلگەن زەرتتەۋلەردىڭ قولجەتىمدىلىگىن جاقسارتۋ قاجەت، بارلىعى اشىق جاريالىمدا بولۋى ءتيىس»، - دەدى د. نازاربايەۆا.

وتىرىس بارىسىندا ق ر ۇلتتىق ەكونوميكا ءمينيسترىنىڭ ورىنباسارى ءمادينا ءابىلقاسىموۆا اتاپ وتكەندەي، اعىمداعى جىلى مەملكەكەتتىك ورگاندار 2017-2019 جىلدارعا جالپى سوماسى 2،8 ملرد تەڭگە بولاتىن 13 زەرتتەۋ جۇرگىزۋ قاجەتتىلىگى تۋرالى قوسىمشا ۇسىنعان. سونىمەن قاتار، حالىقارالىق ۇيىمدارمەن ىنتماقتاستىق اياسىندا ق ر ۇكىمەتى 10-نان استام بىرلەسكەن زەرتتەۋ جۇرگىزۋ جوسپارلانىپ وتىر.