ريو وليمپياداسىنىڭ كۇمىس جۇلدەگەرى ۆاسيليي ليەۆيت تاياۋ ۋاقىتتا رەسەيلىك ەۆگەنيي تيششەنكومەن قارىمتا جەكپە-جەكتىڭ بولۋ-بولماۋى جايىندا پىكىر ءبىلدىردى، - دەپ حابارلايدى Qamshy.kz قازاقپاراتقا سىلتەمە جاساپ.

«مەن كەز كەلگەن بوكسشىمەن، كەز كەلگەن ەلدىڭ وكىلىمەن شارشى الاڭدا كەزدەسەمىن. تەك ەۆگەنيي تيششەنكومەن عانا جۇدىرىقتاسامىن دەگەن ويىمدا جوق. ول رەسەيلىك بولسا، رەسەيلىكپەن، امەريكالىق بولسا رينگتە وعان دا قارسى شىعامىن. ەڭ باستىسى، قارسىلاسىڭنىڭ قىزىقتى بولعانى»، - دەدى ول جۋرناليستەرگە بەرگەن سۇحباتىندا.

سونىمەن قاتار ۆاسيليي اۋەسقوي بوكستى تاستاپ، ءبىرجولا كاسىبي بوكسقا اۋىسۋ ازىرشە ويىندا جوق ەكەندىگىن اتاپ ءوتتى.

«ەڭ الدىمەن ءوزىمنىڭ باسشىلىعىممەن، وتباسىممەن اقىلداسىپ الۋىم قاجەت. ودان كەيىن بارىپ كاسىبي بوكسقا اۋىسۋ-اۋىسپاۋدى ويلاستىراتىن بولامىن»، - دەدى ول.

ەستەرىڭىزگە سالا كەتەيىك، وليمپيادا ويىندارىنىڭ اقتىق سىنىندا رەسەيلىك ەۆگەنيي تيششەنكومەن شارشى الاڭدا كەزدەسكەن ۆاسيليي ليەۆيت تورەشىلەردىڭ شەشىمىمەن ۇتىلعان ەدى. ال مۇنداي شەشىمگە سول كەزدە جارىستى تاماشالاپ زالدا وتىرعان كورەرمەندەر بارىنشا نارازىلىق تانىتقان بولاتىن. وسىدان  كەيىن ەلىمىزدىڭ بوكس فەدەراسياسى ۆاسيلييگە وليمپيادا التىنىن العان سپورتشىعا بەرىلەتىن سىياقى تولەۋ تۋرالى شەشىم قابىلداعان بولاتىن.

«ۆاسيليي ليەۆيت وليمپيادا رينگىنىڭ فينالدىق كەزدەسۋىندە تاماشا ناتيجە، جەڭىسكە دە ايرىقشا ەرىك-جىگەر كورسەتتى. ول وليمپيادانىڭ كۇمىس مەدالىن جەڭىپ العاننان كەيىن وعان مەملەكەت 150 مىڭ دوللار سىياقى بەرەدى. بۇعان قوسا، قازاقستان بوكس فەدەراسياسىنىڭ پرەزيدەنتى ت.قۇلىبايەۆتىڭ شەشىمىمەن اتالعان سوماعا تاعى دا 100 مىڭ دوللار قوسىلادى. وسىلايشا ليەۆيتتىڭ سىياقىسى «التىنمەن» تەڭەسەدى»، - دەپ حابارلاعان ەدى فەدەراسيادان.

ايتا كەتەيىك، بۇگىن ۆاسيليي ليەۆيت مەرزىمىمەن بۇرىن لەيتەنانت اسكەري شەنىن الدى.