وسى اپتادا ەكى كۇن ىشىندە ءتورت وبلىستاعى ىشكى ىستەر دەپارتامەنتىنىڭ باسشىلارى اۋىستى.

ماۋسىم ايىنىڭ باسىندا ءىرى لاڭكەستىك وقيعاسى بولعان اقتوبە وبلىستىق ءىىد باستىعى ماقسۇتقان ابلازيموۆ باتىس قازاقستان وبلىستىق ءىىد باستىعى ماحامبەت ابيساتوۆ ەكەۋى كرەسلو اۋىستىردى.

اتىراۋ وبلىستىق ىىد-گە دە جاڭا باسشى تاعايىندالدى. ءىىم-نىڭ كادر رەزەرۆىنە وتكەن ارمان جالمۇحامبەتوۆ بۇعان دەيىن ءبىرىنشى ورىنباسارى بولىپ كەلگەن ايان دۇيسەمبايەۆقا ورنىن بوساتتى.

سونداي-اق، بۇگىن وڭتۇستىك قازاقستان وبلىستىق ءىىد باستىعى پوليسيا گەنەرال-مايورى اسقار وسپانوۆ لاۋازىمىنان الىنعانى تۋرالى حابارلاندى. ونىڭ ورنىنا وسىعان دەيىن قىزىلوردا وبلىستىق ءىىد باسقارعان پوليسيا پولكوۆنيگى جانات سۇلەيمەنوۆ تاعايىندالدى.

ازىرگە قىزىلوردا وبلىستىق ىىد-گە كىم باراتىنى بەلگىسىز.

اسقار وسپانوۆ

اقتوبە مەن باتىس قازاقستان، قىزىلوردا وبلىستارىنىڭ باس پوليسەيلەرى لاۋازىمدارىن بوساتقانىمەن دالادا قالعان جوق. دارەجەسى تەڭ باسقا لاۋازىمدارعا جايعاستى. ال، وڭتۇستىك قازاقستان وبلىستىق ءىىد-نىڭ بۇرىنعى باستىعى اسقار وسپانوۆتىڭ جاعدايى ءبىرشاما قيىن سياقتى. ويتكەنى، بۇعان دەيىن ماۋسىم ايىندا ونىڭ بۇرىنعى ءبىرىنشى ورىنباسارى ساكەن ايتبەكوۆ مەملەكەتتىك توڭكەرىس جوسپارلادى دەپ ايىپتالىپ جاتقان شىمكەنتتىك توقتار تولەشوۆتىڭ ءىسى بويىنشا قاماۋعا الىنعان ەدى. وسى وقيعادان ءسال بۇرىن ءىىد-نىڭ ءتورت بىردەي پولكوۆنيگى ءوز ەرىكتەرىمەن قىزمەتتەن كەتۋ تۋرالى بايانات جازعان بولاتىن.

ەل اراسىندا سوڭعى ۋاقىتتا ىشكى ىستەر ورگاندارىنىڭ قىزمەتىنە كوڭىلى تولمايتىندار كوپ بايقالىپ ءجۇر. ونداي نارازى كوڭىل-كۇيدىڭ قالىپتاسۋىن ەلدە سوڭعى ايلاردا بولعان تەراكتىلەرمەن بايلانىستىرۋشىلار بار.

ەستەرىڭىزگە سالساق، وسىعان دەيىن الماتى قالاسى پوليسەيلەرىنىڭى اتىنان دەپ جازىلعان انونيمدىك حات ءبىرقاتار اقپارات قۇرالدارىنا تاراپ، وندا الماتى قالاسى ءىىد باستىعى س. كۇدەبايەۆتىڭ قىزمەتىنە سىن ايتىلعان بولاتىن.

سونىمەن قاتار، ءىىم ءمينيسترى ق. قاسىموۆقا قاتىستى دا اقپارات قۇرالدارىندا سىني ماتەريالدار جاريالانۋدا. وندا ءمينيستردىڭ لاڭككەس قولىنان قازا تاپقان مارقۇمدارمەن قوشتاسۋ راسىمىنە، جارالانعان پوليسەيلەرگە ءحالىن سۇراپ بارماعانى ايتىلادى.

ىشكى ىستەر ورگاندارىنداعى كادرلىق اۋىس-تۇيىستەر وسىمەن توقتاي ما، جوق الدە جالعاسىن تابا ما، ول جاعى بەلگىسىز. ءبىراق تا، 2011 جىلدىڭ ءساۋىر ايىنان بەرى ءىىم-دى باسقارىپ كەلە جاتقان ق. قاسىموۆقا قاراتا ايتىلىپ جاتقان سىن-ەسكەرتپەلەردىڭ از ەمەستىگىن اتاپ وتكەن ءجون.