ريودا ءتورتىنشى ورىن العان دەنيس ۋلانوۆاقا قولا مەدال بەرىلەتىن بولدى، - دەپ حابارلايدى Qamshy.kz قازاقپاراتقا سىلتەمە جاساپ.

زىلتەمىرشى دەنيس ۋلانوۆتىڭ جەكە باپكەرى الەكساندر ديەۆياتكين ريو-دە-جانەيرودا قولا مەدال جەڭىپ العان دەنيستىڭ رۋمىنيالىق قارسىلاسىنىڭ دوپينگپەن ۇستالعانىن، سول سەبەپتى قولا مەدال ءتورتىنشى ورىن العان دەنيس ۋلانوۆقا بەرىلەتىنىن حابارلادى.

-دەنيس پەن رۋمىنيالىق اۋىر اتلەتتىڭ ەكەۋى دە ريودا 390 كەلى كوتەرگەن ەدى. ءبىراق، دەنيستىڭ سالماعى ودان 200 گرامم اۋىر بولىپ، قولا جۇلدەدەن ايىرىلىپ قالعان ەدى. ال بۇگىن تۇنگى ەكىدە دوپينگ-باقىلاۋدىڭ قورىتىندىسى جاريالاندى جانە امەريكالىقتار، ەۋروپالىقتار، ءتىپتى رۋمىنيالىقتار دەنيستى قولا مەدالىمەن قۇتتىقتاپ ۇلگەردى، ءوزىمىزدىڭ وتانداستارىمىز ءالى كەشىگىپ جاتىر. بۇل اقپارات وليمپيادالىق سايتتا تۇر، ەندى تەك حوك رەسمي حابارلاماسىن كۇتەمىز. اشىعىن ايتقاندا، رۋمىنيالىقتىڭ زىلتەمىر كوتەرۋىنىڭ ءوزى كۇدىكتى بولىپ كورىنىپ ەدى، - دەيدى باپكەر ديەۆياتكين.

سونداي-اق، دەنيس ۋلانوۆتىڭ باپكەرى شاكىرتىنە ۇلكەن سەنىم ارتاتىنىن ايتتى.

-ول زىريان اۋدانىنان كەلدى جانە وسىندا كوللەدج ءبىتىردى. ءالى الدىمىزدا كەلەسى جىلى وتەتىن الەم چەمپيوناتى بار، سوعان دايىندىق ۇستىندەمىز. دەنيس ءالى جاپ-جاس، جاسى 22-دە، ءالى ۇيلەنبەگەن، سوندىقتان ونىڭ نەگىزگى جەڭىستەرى ءالى الدا. دەنيس - وتە تالانتتى جىگىت. ريودا كوپتەگەن ەلدىڭ وكىلدەرى ونى اينالشىقتاپ ءجۇرىپ الدى، - دەيدى الەكساندر ديەۆياتكين.