جۇڭگو ەلشىلىگى ماڭىندا بولعان جارىلىستان سوڭ بىشكەكتە ديپلوماتيالىق وكىلدىكتەر مەن مەملەكەتتىك ۆەدومستۆولاردا قاۋىپسىزدىك شارالارى كۇشەيتىلدى.

قىرعىزستانداعى قازاقستان ەلشىلىگىنەن حابارلاعانداي، ەلشىلىكتە پوليسيا باقىلاۋى كۇشەيتىلگەن، سونداي-اق ديپميسيانىڭ اۋماعىن سانكسيالانباعان كىرۋدەن قورعۋ ءۇشىن قاقپالاردىڭ الدىنا مەتالل كونسترۋكسيالار (انتيتاران) ورناتىلدى، - دەپ حابارلايدى Qamshy.kz قازاقپاراتقا سىلتەمە جاساپ.  

بۇگىن ساعات 9.30-دا بىشكەكتە ورنالاسقان جۇڭگو ەلشىلىگى ماڭىندا جارىلىس بولدى. الدىن الا مالىمەتتەر بويىنشا، قۇقىق قورعاۋ ورگاندارى وقيعانى تەراكت بولۋى مۇمكىن ەكەندىگىن اتاپ ءوتتى. مەكەمەنىڭ باتىس قاقپاسىن بۇزىپ كىرگىسى كەلگەن Mitsubishi Delica كولىگى جارىلعان.

جارىلىس سالدارىنان اۆتوكولىكتە بولعان جۇرگىزۋشى قازا تاپقان جانە 2 ادام زارداپ شەككەن. جۇرگىزۋشىنىڭ ءاتى-جونى انىقتالۋدا. ديپلوماتتاردىڭ ەشقايسىسى زارداپ شەككەن جوق.

وقيعا ورنىندا قىرعىزستان ۇلتتىق قاۋىپسىزدىك مەملەكەتتىك كوميتەتى لاڭكەستىككە قارسى ورتالىق قىزمەتكەرلەرى جۇمىس ىستەپ جاتىر.