اينالايىن قاجىلار سىزدەرگە ءوتىنىش قاجىلىققا بارىپ الىپ، جۇماقپەن سۇيىنشىلەنگەن جانداي سالفيلەتىپ سۋرەتكە ءتۇسىپ ونى ەلگە ينتەرنەتكە جاريالاۋدى قويساڭىزدار. نە ماسقارا بۇل. ەستىمەگەن ەلدە كوپ دەگەن. كەشە پالەنبەي ادامعا اۋىز اشار بەرىپ جاتقان كەزىم، اۋزىمدى اۋشىپ جاتقان كەزىم، جاۋىپ جاتقان كەزىم دەپ ورازادا بولماپ ەدى ەندى قاجىلىققا بارىپ قاعبانىڭ الدىندا تۇرىپ سالفيلەتىپ تۇرىسىڭ مىناۋ. قاي ساسقانىڭ؟ رياشىلدىق دەگەن بارلىق قاجىلىعىڭمەن قوسا ءومىرىڭدى جۇتىپ جىبەرەتىنىن بىلمەيسىڭ بە؟
ماحشاردا اللا ساعان "مەن ءۇشىن نە ىستەدىڭ؟" دەسە "سەن ءۇشىن قاجىلىق جاسادىم" دەيسىڭ بە؟ "جوق، ونى ەل كورۋ ءۇشىن جاسادىڭ، راسىندا كوردى" دەسە نە دەيسىڭ؟ مۇمكىن ارافاتتا پەرىشتەلەرمەن ءسالفي جاسارسىڭ؟ باسىڭدى ساجدەگە قويىپ جىلا دا ءبىر قولىڭمەن ءتۇسىرىپ "جىلاپ اقىرەتتى ويلاپ جاتقان كەزىم" دەپ تە تۇسسەي سۋرەتكە. جوق بىلاي دە: «اقىرەتتە توزاققا كەتىپ قالامىن با، قاجىلىعىم قابىل بولماي قالا ما؟» دەگەن كەزىم دەپ تە ءبىر ءتۇسىپ قوي.
شايتانعا تاس لاقتىراتىن جەرگە بار دە شايتانمەن دە بىرگە ءتۇس. سوسىن ونى ينستراگامعا قويساي اتاقتى بولاسىڭ لايىقتى كوپ جينايسىڭ ءبىراق ساۋاپ جيناي المايسىڭ. سەن ءوزىڭدى ءولتىرىپ تىندىڭ عوي مىنا قىلىعىڭمەن. الەمگە قاعباعا ارت قاراپ، قىرىن قاراپ تۇرعانىڭدى جاريالادىڭ عوي. اقىرەتتە دە سولاي قالىپ قويامىن دەپ قورىقپايسىڭ با؟ شىركىن ادام دەگەن مۇنشالىقتى ابىرويسىز بولا ما؟ مۇمكىن ەرتەڭ جانازاڭدى شىعارىپ جاتقاندا ونى دا قويارسىڭ فەيسبۋككە، ينستاگرامعا. ءولىپ جاتقان كەزىم، اينالامداعىلار مەنىڭ دوستارىم قاراڭدار كوپ جينالىپتى ياعني كوپ لايىك دەپ.
الەۋمەتتىك جەلى دەگەندەر ەرىككەننىڭ ەرمەگى عوي. اسىرسەسە ينستاگرام دەگەن ناعىز وزىمشىلدىك ورداسى عوي. سول ەرمەككە سەن كەلىپ قاجىلىعىڭدى، نامازىڭدى، ورازاڭدى قويعانىڭ نە؟ مۇمكىن قابىردەن دە مۇنكار، نانكۇرمەن دە ءسالفي جاسارسىڭ. «مىناۋ مەنى ەكى پەرىشتە ءومرىڭدى قالاي وتكىزدىڭ دەپ سۇراپ جاتقان كەزدەرى دەپ. ءومىرىن وزگەگە جارنامالاپ سۋرەتپەن وتكىزگەننىڭ اقىرەتتە تەك سۋرەت ءومىرى عانا قالادى باۋىرىم.
ءيا، مىنا زامان يسلامنىڭ رۋحى ولگەن زامان. جوق ول ولگەن جوق، مۇسىلماندار وزدەرى ءولتىردى. ءبارىمىز ولىگە اينالدىق. كەشەگى مۇسىلماننىڭ ماعلۇماتى تارىداي، يمانى تاۋداي ەدى، قازىرگى مۇسىلماننىڭ ماعلۇماتى تاۋداي، يمانى تارىداي بولدى. بۇرىنعى قاجىلاردىڭ كوزىنەن جاس كەتپەيتىن بولسا بۇگىنگى قاجىلاردىڭ جۇزىنەن كۇلكى كەپپەيتىن بولدى. قاجىلىق تۋريزمگە، ينستراگامداعى ەگويزمگە اينالدى. مەندەي قاپ-قارا كۇناھارلار قاجىلار كەلسە قولىنان ءسۇيۋشى ەدىك، اۋليە كورۋشى ەدىك، ءتاۋ ەتۋشى ەدىك ال ەندى شوۋ ەتەتىن بولدىق. تەك تويلار مەن تەلەارنالار عانا ەمەس عيباداتتاردا دا شۋعا اينالا باستادى. اقىرزامان جاقىندادى. اللادان باسقا كومەكشى جوق، اللادان باسقا جاردەمشى جوق، ودان باسقا كۇش پەن قۋات تا جوق.
ءيا، ادام پەندە ءپاني ادامدارعا تانىلسام دەپ ارماندايدى. اقىرى باقي يەسىنە تانىلماي قۇردىمعا قۇلايدى…
مۇحيددين يسا ۇلىنىڭ فەيسبۋكتەگى پاراقشاسىنان الىندى
