شىمكەنتتىك «سىرا كورولى» كەلەسى اپتا سوت الدىندا جاۋاپ بەرەدى. توقتار تولەشوۆ پەن ونىڭ سىبايلاستارىنا قاتىستى قىلمىستىق ءىس بويىنشا العاشقى پروسەس 14ء-شى قىركۇيەكتە استانادا وتپەك. تاعىلعان ايىپتاردىڭ ءتىزىمى دە ۇزاق ەكەن. تولەشوۆ ەكسترەميستەردى قولداۋ، قاراقشىلىق، قىلمىستىق توپ قۇرعان، ادامدى زاڭسىز ۇرلاپ، كىسى ولتىرگەن، بيلىكتى كۇشتەپ باسىپ الماق بولدى دەگەن 16 قىلمىس بويىنشا كۇدىككە ءىلىنىپ وتىر، - دەپ حابارلايدى Qamshy.kz كتك ارناسىنا سىلتەمە جاساپ.

-بۇكىل ەلدى دۇرلىكتىرگەن تولەشوۆ ىسىنە قاتىستى پروسەسسكە  جۋرناليستەر تىكەلەي قاتىسا المايدى. ماتەريالدا مەملەكەتتىك قۇپيا مالىمەتتەر كوپ بولعاندىقتان وتىرىس جابىق  وتپەك. ءبىراق اسكەري سوتتىڭ القا مۇشەلەرى ءار پروسەسستەن سوڭ، ارنايى بريفينگ ۇيىمداستىرىپ، اقپارات بەرىپ وتىرماق.

تولەشوۆ پەن وزگە دە كۇدىكتىلەرگە قاتىستى قىلمىستىق ءىس سوتقا 29-شى تامىز كۇنى تۇسكەن ەكەن. سۋديا، ادۆوكاتتار مەن ايىپتالۋشىلار 300 تومعا ارقاۋ بولعان تەرگەۋدى نەبارى ءبىر اپتادا تانىسىپ شىققان. ءسويتىپ، بۇگىن سوتقا دەيىنگى الدىن الا تىڭداۋ بولدى.

جاندوس مۇسابەك ۇلى، ق ر اسكەري سوتى قىلمىستىق ىستەر جونىندەگى سوت القاسىنىڭ ءتوراعاسى:

-قىلمىستىق ءىس بويىنشا بارلىعى 25 سوتتالۋشى، 16 قورعاۋشى ادۆوكات قاتىسۋدا. تولەشوۆكە 16 قىلمىستىق قۇقىق بۇزۋشىلىق جاساعانى ءۇشىن ايىپ تاعىلاۋدا.  

تولەشوۆكە تاعىلعان ايىپتىڭ ءتىزىمى ۇزىن-سونار. شىمكەنتتىك كاسىپكەر ەكسترەميستىك توپتى باسقارعان، قاراقشىلىقپەن اينالىسقان، قىلمىستىق توپ قۇرعان، ادامدى زاڭسىز ۇرلاپ، كىسى ولتىرگەن، بيلىكتى كۇشتەپ  باسىپ الماق بولعان. «سىرا كورولى» بانككە 200 ميلليون دوللار بەرەشەك ەكەن. توڭكەرىستى دە سول قىرۋار قارىزدان قۇتىلۋ ماقساتىندا جاساۋدى جوسپارلاپتى. ال قىلمىستىق توپ قۇرامىندا 5 جىل باس پروكۋروردىڭ ورىنباسارى بولعان زەينەتكەر ءىلياس باقتىبايەۆ، وڭتۇستىك قازاقستان وبلىسى  ىشكى ىستەر دەپارتامەنتىنىڭ ەكس-باسشىسى عيبراتۋللا دوسقالييەۆ، 35 748 جانە 55652 اسكەري بولىمدەرىنىڭ كومانديرلەرى بولعان.

جاندوس مۇسابەك ۇلى، ق ر اسكەري سوتى قىلمىستىق ىستەر جونىندەگى سوت القاسىنىڭ ءتوراعاسى

- قالعان 19  سوتتالۋشى قىلمىستىق كودەكستىڭ ءارتۇرلى بابىمەن ايىپتالعان. سوتقا دەيىنگى تەرگەپ-تەكسەرۋ ۋاقىتىندا 13 سوتتالۋشىعا قاتىستى قاماۋعا الىنۋ بۇلتارتپاۋ شاراسى قولدانىلعان، قالعان 12 سوتتالۋشىدان ەشقايدا كەتپەۋ جانە ءتيىستى مىنەز-قۇلىقتى تۋرالى قولحات الىنعان.

شىمكەنتتىك وليگارح «دەد حاسان»، «جورا تاشكەنتسكيي» دەگەن لاقاپ اتپەن تانىمال حالىقارالىق قىلمىستىق توپتارمەن دە تىعىز بايلانىستا بولىپتى. كاسىپكەردىڭ جەكە جاساقتاپ العان اسكەرى دە بار. ونىسىن جاسىرماي، ءتىپتى ورىس-كازاكتارمەن بىرلەسە پاراد وتكىزگەنى ەستە. تولەشوۆ كەيىن تۇرمەدە دە تىنىش جاتپاي، سارىاعاش قالاسىنىڭ  5 مىڭ تۇرعىنىن نارازىلىققا شىعارۋعا تاپسىرما بەرگەنى انىقتالعان بولاتىن.

توعىز ايدان بەرى تەرگەۋ اباقتىسىندا جاتقان شىمكەنتتىك كاسىپكەر كەلەسى اپتادا سوت الدىندا جاۋاپ بەرەدى. العاشقى وتىرىس 14-قىركۇيەك كۇنى وتەدى. پروسەسس بارىسىندا 104 كۋاگەر تىڭدالادى جانە 17 جابىرلەنۋشى بار.  ال ءىستى «ارقانكەرگەندەگى» 15 قارۋلاسىن قىرىپ سالعان چەلاحققا ءومىر بويى باس بوستاندىعىنان ايىرۋ تۋرالى ۇكىم كەسكەن، تالاي گەنەرالدى تۇرمەگە  جىبەرگەن سۋديا ەربول احمەتجانوۆ قاراپ جاتىر.