بۇگىن ق ر ينۆەستيسيالار جانە دامۋ ءمينيسترى جەڭىس قاسىمبەكتىڭ باسشىلىعىمەن جەڭىل ونەركاسىپتى دامىتۋ ماسەلەلەرى جونىندەگى جيىن ءوتتى. وندا الماتى وبلىسىنداعى «قۋات LTD» ج ش س نەگىزىندە ءجۇن كلاستەرى جوباسى تانىستىرىلدى، دەپ حابارلادى ءمينيسترلىتىڭ باسپا ءسوز قىزمەتى.

سونىمەن قاتار، جيىن بارىسىندا جەڭىل ونەركاسىپ كاسىپورىندارى قاۋىمداستىعىنىڭ، جەڭىل ونەركاسىپ ونىمدەرىن وندىرۋشىلەر وداعىنىڭ وكىلدەرى ءسوز سويلەپ، اتالمىش سالادا قوردالانىپ قالعان وزەكتى ماسەلەلەر جايلى باياندادى.

كەزدەسۋگە سونداي-اق ۇلتتىق ەكونوميكا، قارجى، اۋىل شارۋاشىلىعى، ءبىلىم جانە عىلىم، قورعانىس، دەنساۋلىق ساقتاۋ جانە الەۋمەتتىك دامۋ مينيسترلىكتەرىنىڭ، «بايتەرەك» ۇقب» اق، «قازاقستان ينجينيرينگ» ۇك» اق، «NADLoC» اق، «KAZNEX INVEST» اق وكىلدەرى قاتىستى.

جيىنعا قاتىسقانداردىڭ ايتۋىنشا، بۇگىنگى تاڭدا كونترافاكتىلىك ونىمدەردىڭ نارىققا جەتكىزىلۋى مەن ساتىلۋ ماسەلەلەرى وزەكتى بولىپ قالۋدا، ال قازاقستاننىڭ ىشكى نارىعىندا جەڭىل ونەركاسىپ وندىرۋشىلەرى ءۇشىن ەكونوميكالىق شارتتاردىڭ اركەلكى بولۋ ماسەلەسى ءالى دە شەشىلمەگەن.

وعان قوسا، تاۋار وتكىزۋ جەلىسىنىڭ كۇيرەۋى، ءوندىرىس، كوتەرمە جانە بولشەكتەپ ساتۋ سالالارىنىڭ ءوزارا بايلانىسىنىڭ بۇزىلۋى ورىن العان. اڭ تەرىسىنەن جاسالعان بۇيىمداردى تاڭبالاۋ قاجەتتىگى جانە ءىرى قارا مالدىڭ وڭدەلمەگەن تەرىلەرىن قازاقستان رەسپۋبليكاسى اۋماعىنان شىعارۋعا تىيىم سالۋ قاجەتتىگى دە ايتىلدى.

تالقىلاۋدىڭ قورىتىندىلارى بويىنشا، مەملەكەتتىك ورگاندار مەن ۇيىمداردىڭ وكىلدەرى اتالمىش سالانىڭ وزەكتى ماسەلەلەرىن شەشۋ جونىندە ءوز ۇسىنىستارىن بەردى.