الماتى پوليسياسى ەسىرتكى ساتۋشىدان گەرويننىڭ ءىرى پارتياسىن تاركىلەدى.

تاركىلەنگەن ەسىرتكىنىڭ جالپى سالماعى 5 كيلوگرامم 118 گرامم بولعان.

پوليسيا قىزمەتكەرلەرىنىڭ ايتۋلارىنشا، ەسىرتكى ساتۋشىنىڭ سىرتىنان ۇزاق ۋاقىت جاسىرىن باقىلاۋ جۇرگىزىلىپتى. كەلىپ تۇسكەن شۇعىل اقپاراتتى مۇقيات تەكسەرىلگەن.

«ا. ەسىمدى ازاماتتىڭ ءجۇرىس-تۇرىسىنىڭ ءوزى كۇدىك تۋدىردى. ويتكەنى ول بۇعان دەيىن دە ەسىرتكىگە قاتىستى قىلمىستارىنا بايلانىستى تالاي رەت سوتتالعان ەدى. بۇل ادام جازاسىن وتەپ شىققاننان كەيىن، وكىنىشكە قاراي دۇرىس جولعا تۇسپەدى. بۇرىنعى ادەتىنە قايتا باستى. ونىڭ ۇستىنە ءوزى ەسىرتكى قابىلدايدى. ۇستالۋعا قاتىستى ايتاتىن بولساق، ونى كەشە 21 ءساۋىر كۇنى تۇستەن كەيىن ساعات 15:00 شاماسىندا تۇركىسىب اۋدانىنداعى كاسسين كوشەسىندە ورنالاسقان ۇيىندە كليەنتكە 1،5 گرامم گەروين ساتىپ تۇرعان جەرىنەن قولعا تۇسىردىك. ودان باسقا، جەدەل-تەرگەۋ توبى ارنايى ۇيرەتىلگەن ءيتتىڭ كومەگىمەن ىشىنە ۇنتاق ءتارىزدى زات سالىنعان بىرنەشە پوليەتيلەندى تۇيىنشەكتى تاپتى. كەيىن سوت-حيميالىق ساراپتاما ونىڭ گەروين ەكەندىگىن انىقتادى»، - دەدى الماتى ءىىد ەسىرتكى بيزنەسىمەن كۇرەس باسقارماسىنىڭ باستىعى ازامات سادىروۆ.

ونىڭ ايتۋىنشا، قولعا تۇسكەن ازامات ەسىرتكى سالىنعان تۇيىنشەكتەردى  كەرەۋەتتىڭ، اسحاناداعى ىدىس-اياق جۋاتىن شۇڭعىلشانىڭ استىنا جانە ءۇي ماڭىنداعى سارايعا جاسىرعان ەكەن. ول بۇل ۇيدە ازاماتتىق جۇبايىمەن تۇرىپ كەلگەن.

«5 كيلوگرامنان اساتىن گەروين - بۇل اسا ءىرى كولەمدەگى ەسىرتكى بولىپ تابىلادى جانە مۇنداي ارەكەت ق ر قىلمىستىق كودەكسىنىڭ 4ء-بولىمىنىڭ 259-بابى بويىنشا رەتتەلەدى، - دەدى ازامات سادىروۆ. - ءبىز ەندى ءبىرىنشى كەزەكتە  بۇل ەسىرتكىنىڭ كەلۋ جولىن جانە قاتىسۋشىلاردى انىقتاۋىمىز كەرەك. سول ءۇشىن ۇستالعان ادامنىڭ قارىم-قاتىناس جاساپ جۇرگەن ادامدارى تەكسەرىلەدى. سونداي-اق وسى ەسىرتكىنى ساتىپ الىپ جۇرگەن تۇتىنۋشىلاردى دا انىقتاماق نيەتتەمىز».

"قازاقپارات"