بۇگىن الەمدەگى ميللياردتتاعان مۇسىلمان ءۇشىن  ەڭ ۇلىق مەرەكە قۇربان ايت باستالدى. ورازا ايتتان سوڭ 70 كۇننەن  كەيىن تويلاناتىن مەيرام ەلىمىزدە مەملەكەتتىك مەرەكە ساناتىنا يە، سوندىقتان العاشقى كۇنى  رەسمي دەمالىس رەتىندە جاريالانعان. ايتتى تويلاۋ ايت نامازىن وقۋدان باستالادى. تالدىقورعاندىق جاماعات وسى مىندەتتى ورىنداۋ ءۇشىن مىنە الماتى وبلىسىنداعى ەڭ ۇلكەن "يمان" مەشىتىنە كەلىپ جاتىر، - دەپ حابارلايدى Qamshy.kz "جەتىسۋ" ارناسىنا سىلتەمە جاساپ.

تاڭ راۋانداپ اتقانى سول ەدى، تۇرعىندار مەشىتكە قاراي اعىلدى. ادەتتەگىدەي قوعامدىق كولىكتەر دە قاسيەتتى مەرەكە ءۇشىن تاڭنان جۇمىسقا كىرىسىپ، كوپشىلىكتى اللا ۇيىنە جەتكىزدى. ءاربىر مۇسىلمان عۇسىل دارەت الىپ، بويىن تازارتىپ العان. ال جەتىسۋ جەرىندەگى ەڭ ۇلكەن "يمان" مەشىتىنىڭ ءىشى جاماعاتقا لىق تولدى. ەل جينالعانشا يمام ۋاعىز ايتىپ، 3 كۇندىك مەرەكەدە جاسالاتىن يگى امالداردى ءتۇسىندىردى. 

جۇرتپەن بىرگە ۋاعىز تىڭداپ، ناماز وتەۋگە كەلگەندەردىڭ اراسىندا الماتى وبلىسىنىڭ اكىمى اماندىق باتالوۆ تا بار. مەرەكەنى تويلاۋدى مەشىتتەن باستاعان اكىم بارشا  جەتىسۋلىقتارعا ىزگى نيەتىن ءبىلدىردى.   

وسىدان سوڭ بارشا قاۋىم ايت نامازىنا جىعىلدى. تالدىقورعان ءوڭىرى بويىنشا بيىلعى قۇربان ايت نامازىنىڭ باستالۋى ساعات 7 گە سايكەس كەلدى. ياعني، كۇننىڭ كوك­جيەك­تەن نايزا بويىن­داي كو­تە­ءرىل­گەن­دەي ۋاقىتىندا جاماعات قاعباعا ءجۇزىن قاراتتى.

قۇربان ايتتىڭ باستى مىندەتتەرىنىڭ ءبىرى - قان شىعارۋ، ياعني مال سويۋ. نامازدان سوڭ كوپشىلىك قۇربان شالۋ راسىمىنە قاتىستى.  جاماعات جاراتۋشىعا جالبارىنىپ تىلەك تىلەدى، ساداقا بەردى. كەيىن «ايتتاۋدى» باستاپ كەتتى.

قۇربان ايت كۇنى  ادام بالاسىنىڭ جومارتتىعى سىنالادى. سوندىقتان، مەشىت قاۋىمداستىعى  مۇمكىندىگى شەكتەۋلى جاندار مەن قارت كىسىلەردى ايت نامازىنان سوڭ ۇيلەرىنە كولىكپەن تەگىن جەتكىزدى. ال "سامۇرىق" تاكسي پاركى جول اقىسىنا 100 تەڭگە جەڭىلدىك جاسادى. جالپى ءۇش كۇندىك ايت مەرەكەسىندە مۇسىلماندار بارىنشا مەيىرىمدى بولۋى كەرەك، كوتەرىڭكى كوڭىل كۇيدە، كەشىرىمدى بولۋعا تىرىسۋ قاجەت. وسى ارقىلى ايتتىڭ قۋانىشىن سەزدىرۋ وتە ساۋاپتى ىستەرگە جاتادى ەكەن. 

تالدىقورعاندىقتار جىلداعىداي ايتتى ەرەكشە ەتىپ تويلادى.  توي دۋمان اسىرەسە مەشىتتەردە  قىزىا ءتۇستى.   ايتشىلاپ كەلگەن  جۇرت ۇلتتىق سپورت ويىندارىنان سىنعا ءتۇستى.  پالۋاندار بوز كىلەمدە كۇرەسىپ،  بالالار اسىق ويناپ جارىستى. وتباسىلىق ءتۇرلى بايقاۋلار ءوتىپ، ايتتىق سىيلىقتار بەرىلدى. 

مەشىت ۇجىمى بيىل دا قايىرىمدىلىق شارالارىن ۇيىمداستىردى.  جاعدايى تومەن وتباسىلارى مەن زاعيپ جاندارعا جانە  مۇگەدەكتەر قوعامدىق ۇيىمدارىنا قۇرباندىقتىڭ ەتىن تاراتتى. 

قۇربان ايتتى تويلاۋدان وزگە ءقازىر الەم مۇسىلماندارى اراسىندا شاماسى كەلگەندەرى قاجىلىققا بارعان. بيىل ەلىمىزدەن بارلىعى 3 مىڭعا تارتا ازامات وسى پارىزىن وتەۋگە نيەت ءبىلدىرىپتى. بۇل بىلتىرعىعا قاراعاندا مىڭ ادامعا كەم ەكەن. قاجىلار ۋمرانى وتەپ، مينا مەن ارافادا قۇلشىلىق قىلىپ، مۇزداليفادان تاس الىپ شايتانعا اتادى. اللاعا قۇلشىلىق قىلىپ، كۇنالارىن كەشىرۋدى سۇرايدى.