استانا تورىندە 19 مەملەكەتتىڭ 300-دەن اسا بىلەكتى پالۋاندارىنىڭ باسىن قوسىپ، كۇرەس تۇرلەرىنەن جالاۋىن جەلبىرەتكەن ازيا چەمپيوناتى اياقتالدى. شىعىستىڭ نەبىر ازۋلى سپورتشىلارى جينالعان بايراقتى باسەكەدە قازاقستان بالۋاندارى گرەك-ريم كۇرەسىنەن جالپى كوماندالىق ەسەپتە ءبىرىنشى ورىنعا يە بولىپ، جالپى سانى 14 جۇلدەگە قول جەتكىزدى.

گرەك-ريم كۇرەسى بويىنشا جۇڭگو مەملەكەتىنىڭ قۇراماسىن قانداسىمىز ءالنۇر تورگە ۇلى باستاپ كەلىپتى. ءبىز ميللياردتار ەلىنىڭ قۇراما كومانداسىن جاتتىقتىرىپ جۇرگەن قازاق جىگىتىن اڭگىمەگە تارتۋدى ءجون كوردىك.

سپورتتاعى ىرگەتاسىمدى قازاقستاندا قالادىم

ءالنۇر تورگە ۇلى 1976 جىلى قۇلجا قالاسىندا دۇنيەگە كەلىپتى. «جالپى كۇرەس قازاقتىڭ قانىندا بار عوي. اۋىلدا وسكەن قارا دومالاق بالامىز. 3-سىنىپتان باستاپ كۇرەسكە قاتىناسا باستادىم. 1992 جىلى الماتى قالاسىنا كەلىپ، قاجىمۇقان مۇڭايتپاسوۆ اتىنداعى مەكتەپ-ينتەرناتىندا ءبىلىم الىپ، كۇرەس ونەرىندەگى نەگىزگى ىرگەتاسىمدى قالادىم. قىتايعا قايتىپ بارعان سوڭ، 1995-1996 جىلدارى  قىتايدىڭ بىرىنشىلىگىن قاتارىنان ەكى رەت ۇتتىم. 1996 جىلدان باستاپ جۇڭگو قۇراما كومانداسىنا قابىلدانىپ، الەم چەمپيوناتىنا، ازيا چەمپيوناتىنا قاتىسىپ، جارقىن جەڭىستەرگە جەتتىم»، - دەيدى باپكەر.

جۇڭگو  چەمپيوناتىن ءوز سالماعىندا بىرنەشە مارتە باعىندىرعان قانداسىمىز 2004 جىلى گرەكيانىڭ افينى قالاسىندا وتكەن وليمپيادادا ونەر كورسەتىپ، 13-ورىنعا تابان تىرەپتى.

قىتايدا قازاق سپورتشىلارىنا سۇرانىس جوعارى

ءالنۇر تورگە ۇلىنىڭ ايتۋىنشا، ءقازىر قىتايدا سپورتقا بەيىم قازاق جاستارىنا دەگەن سۇرانىس وتە جوعارى كورىنەدى. قازى-قارتا جەپ وسكەن قازاقتىڭ قانىنا بىتكەن كۇش قۋاتىن مويىنداسا كەرەك، قىتايلىق باپكەرلەر ءوز كومانداسىنا قازاق سپورتشىلارىن تارتۋدى كوزدەيدى ەكەن.

«ءقازىر جۇڭگو قازاقتارىنىڭ ىشىندە سپورتتىڭ ءار سالاسىندا ونەر كورسەتىپ، ەرەكشە جەتىستىكتەرىمەن كوزگە ءتۇسىپ جۇرگەن جاستار كوپ. قىتايدىڭ ءار قالاسىندا بوكس، كۇرەس، ەرەجەسىز جەكپە-جەك جانە سپورتتىڭ باسقا تۇرلەرىندە جۇرگەن قازاقتار بار. سوڭعى جىلدارى قىتايلىق باپكەرلەردىڭ كومانداسىنا قازاق سپورتشىلارىن تارتۋ «سانگە» اينالىپ بارادى.

مۇنداعى باستى سەبەپ - بابامىزدان جالعاسقان باتىرلىعىمىز، بالۋاندىعىمىز.

ەكىنشىدەن، قازاق جاستارىنىڭ يماندىلىعى، تاربيەلىلىگى، جاتتىعۋعا جاۋاپكەرشىلىكپەن قاتىسىپ، بەلسەندى جۇمىس جاسايتىندىعى. وسى باعىتىنان تايماسا، جۇڭگو قازاقتارىنان وليمپيادا شىڭىن باعىندىراتىن تالاي چەمپيوندار شىعاتىنىنا سەنەمىن. مەندە قولىمدا مۇمكىندىك تۇرعاندا قازاق ۇلاندارىنىڭ بيىك بەلەستەردى باعىندىرۋىنا ءبىر كىسىلىك ۇلەسىمدى قوسۋعا تىرىسىپ ءجۇرمىن. قايدا جۇرسە دە قازاقتىڭ ابىرويى ورتاق، نامىسى ءبىر»، -دەيدى ول.

قىتايلىق باپكەر، ەرەجەسىز جەكپە-جەكتە اتوي سالىپ جۇرگەن جۇمابەك تۇرسىن ۇلى، ەركىن كۇرەستە ەرەكشە كوزگە ءتۇسىپ جۇرگەن ەرلانبەك سىندى جىگىتتەردىڭ ەرلىگىن ەرەكشە اتاپ ءوتتى. ولار قىتايدا تالاي بيىكتەردى باعىندىرعان، سپورتتا ءوز ورنى بار مىقتىلار ەكەن.

قازاقستاندا گرەك-ريم كۇرەسى جاقسى دامىعان

قانداسىمىز قىتايلىقتاردىڭ قازاقستاندىق باپكەرلەرمەن سەلبەستىك جاساعىسى كەلەتىنىن ايتادى.

 «قازاقستان سپورتىنىڭ الەمدە الار ورنى جوعارى، تالاي بايراقتى باسەكەلەردە جاقسى جەتىستىكتەرگە جەتىپ ءجۇر. ءوزىم بىلەتىن گرەك-ريم كۇرەسى تۋرالى ايتار بولسام، قازاقستاننىڭ گرەك-ريم كۇرەسى قىتايمەن مۇلدە ۇقسامايدى. ەۋروپا ەلدەرىنىڭ كۇرەس تەحنيكاسىنا جاقىنىراق كەلەدى.

مەنىڭ ءبىر بايقاعانىم، قازاقستان پالۋاندارىنىڭ جىگەرى وتە جوعارى، كوزدەرىندە وت بار. قارسىلاستارىنان ەش قورىقپايدى. وزدەرىنە وتە سەنىمدى شىعادى. قىتايلىق سپورتشىلارعا وسىنداي قاسيەتتەر جەتىسپەيتىن سەكىلدى.

سوندىقتان، قىتايدا قازاقستان گرەك-ريم كۇرەسىن جوعارى باعالايدى. ءبىز قازاقستاندىق باپكەرلەرمەن سويلەسىپ جاتىرمىز، باسشىلار ءوزارا اقىلداستى. ىنتىماقتاستىق جاساپ، تاجىريبە الماسساق دەيمىز. بىرلەسكەن جاتتىعۋلار ۇيىمداستىرۋدى كوزدەپ وتىرمىز»، - دەگەن ويلارىن ايتتى ءالنۇر قانداسىمىز.

بۇل جولعى ءدۇبىرلى دودا  جوعارى دەڭگەيدە ۇيىمداستىرىلعان

سونىمەن قاتار ول وسى جولعى قازاق ەلىندە وتكەن ءدۇبىرلى دودانىڭ جوعارى دەڭگەيدە ۇيىمداستىرىلعانىن ايتادى. «استانادا ءبىرىنشى رەت بولىپ وتىرمىن. قالانىڭ دامۋىندا ايتار جوق. كەڭ دە تازا، ادامعا ەرەكشە اسەر بەرەدى. مەن قازاق ەلىنىڭ بولاشاعى بۇدان دا نۇرلى دەپ بىلەمىن. وسى جولعى باسەكەنىڭ ۇيىمداستىرىلۋى وتە جوعارى دەڭگەيدە ءوتتى. سپورت كەشەنى، قىزمەت كورسەتۋى ءبارى كەرەمەت. پالۋانداردىڭ باسەكەسى دە تارتىمدى بولدى. كوزگە تۇسكەن ساڭلاقتار دا كوپ. اتاپ ايتار بولساق، 98 كەلى سالماقتا ونەر كورسەتكەن ەرۇلان ىسقاقوۆتىڭ شەبەرلىگى كەرەمەت ەكەن. جانە وزبەكستان ەلىنەن كەلگەن تاسبولات دەگەن قانداسىمىز دا جالىنداپ تۇر. وتە جاقسى كۇرەستى. يراندىقتاردىڭ، قىرعىزداردىڭ پالۋاندارىنىڭ دەڭگەيى جوعارى بولدى. ءبىزدىڭ قۇراما كوماندامىزدىڭ دا ناتيجەسى جامان بولمادى»، - دەيدى ءالنۇر.

قاي ەلدە جۇرسە دە  جۇرەگى قازاق دەپ سوققان قانداستارىمىزدىڭ بەدەلى بيىك، ابىرويى اسقاق بولا بەرگەي. ونەرى مەن رۋحى ءور وسىنداي جىگەرلى قانداستارىمىزدى قازاقتىڭ كوك بايراعىن جەلبىرەتۋگە مۇمكىندىك جاساساق نۇر ۇستىنە نۇر بولار ەدى.

نۇسىپبەك ريزابەك

قازاقپارات