استانا قالاسىنداعى №2 ەسىل اۋداندىق سوتىندا سەيىتقازى جانە اسەت ماتايەۆتاردىڭ ءىسى بويىنشا سوت وتىرىسى جالعاسىپ جاتىر. بۇگىنگى سوت وتىرىسىندا تۇسىنىك بەرگەن سەيىتقازى ماتايەۆ ءوز اتىنا تۇسىرىلگەن ازاماتتىق شاعىمدارمەن كەلىسپەيتىنىن حابارلادى. «مەن «قازاقتەلەكوم» اق-نىڭ جانە بايلانىس، اقپاراتتاندىرۋ جانە اقپارات كوميتەتى تۇسىرگەن ازاماتتىق شاعىمدارمەن كەلىسپەيمىن. سەبەبى ءبىز ءوز موينىمىزعا العان بارلىق مىندەتتەمەلەردى ورىندادىق»،- دەدى ول سوت سۋدياسىنا بەرگەن جاۋابىندا.

ايتا كەتەلىك، بۇعان دەيىنگى سوت وتىرىسىندا زارداپ شەككەن تاراپ «قازتاگ» حالىقارالىق اقپارات اگەنتتىگى» جشس-ىنەن 2010-2015 جىلدارى بايلانىس، اقپاراتتاندىرۋ جانە اقپارات كوميتەتىمەن جاسالعان شارتتاردىڭ تالاپتارى بويىنشا اگەنتتىككە تولەنگەن قاراجاتتى تولىقتاي ءوندىرىپ بەرۋدى وتىنگەن بولاتىن. ازاماتتىق شاعىمدا «قازتاگ» حالىقارالىق اقپارات اگەنتتىگىنىڭ كورسەتكەن قىزمەتى تەحنيكالىق سيپاتتاماعا سايكەس كەلمەگەنى تۋرالى ايتىلدى. ونى سوتقا اقپارات جانە كوممۋنيكاسيالار مينيسترلىگىنىڭ ساراپتامالىق دەپارتامەنتى ديرەكتورىنىڭ ورىنباسارى راۋان احمەتوۆ وقىپ بەردى.

«ازاماتتىق شاعىمدى ءتۇسىرۋ بارىسىندا ءبىز قارجىلىق باقىلاۋ كوميتەتى وكىلدەرىنىڭ، فيلولوگتاردىڭ جانە IT-تەحنولوگيالارى ماماندارىنىڭ تۇجىرىمىن باسشىلىققا الدىق. شارتتىڭ تالاپتارى بويىنشا «قازتاگ» حالىقارالىق اقپاراتتىق اگەنتتىگى» جشس-گى تەحنيكالىق سيپاتتامادا كورسەتىلگەندەي كولەمدە شارتتىڭ تالاپتارىنا سايكەس كەلەتىندەي قىزمەتتى ىسكە اسىرۋ كەرەك بولاتىن. الايدا تەكسەرۋ بارىسىندا ول قىزمەتتىڭ شارت تالاپتارىنا سايكەس ەمەستىگى انىقتالدى. قىزمەت ءتۇرى شارتتىڭ تالاپتارىنا سايكەس كورسەتىلمەگەندىكتەن، ءاربىر شارت بويىنشا بيۋدجەتتەن اۋدارىلعان قاراجات رەسپۋبليكالىق بيۋدجەتتىڭ كىرىسىنە تولىق كولەمدە ءوندىرىلىپ الىنادى»،- دەپ ءتۇسىندىردى راۋان احمەتوۆ.

ءوزىنىڭ سوتقا بەرگەن جاۋابىندا سەيىتقازى ماتايەۆ بايلانىس، اقپاراتتاندىرۋ جانە اقپارات كوميتەتىنىڭ ەشقانداي لاۋازىمدى تۇلعالارىمەن كەزدەسپەگەنىن ايتتى.

«ايىپتاۋ اكتىسىندە ايتىلعانداي، سول كەزدەگى كوميتەت ءتوراعاسى بولات بەرسەبايەۆپەن ارامىزدا ەشقانداي دا كەلىسىم بولعان جوق»،- دەدى س. ماتايەۆ.

الايدا بۇعان دەيىنگى سوت وتىرىسىندا بايلانىس، اقپاراتتاندىرۋ جانە اقپارات كوميتەتىنىڭ بۇرىنعى ءتوراعاسى بولات بەرسەبايەۆ سەيىتقازى ماتايەۆتىڭ وزىنە پايداكۇنەمدىك قىزىعۋشىلىقپەن ءوتىنىش جاساپ، «قازتاگ» حالىقارالىق اقپارات اگەنتتىگىمەن ەكى لوت بويىنشا «ءبىر كوزدەن» قاراجات بولۋگە شارت جاساۋدى ۇسىنعانىن ايتتى.

«مەن سەيىتقازى ماتايەۆپەن «ۇلتتىق باسپا ءسوز كلۋبىنىڭ» الماتىداعى عيماراتىندا كەزدەستىم. ماتايەۆ شارت جاساۋدى سۇرادى. مەنىڭ ونىمەن جانجالداسۋعا ەشقانداي نيەتىم بولعان جوق. وعان قوسا «قازتاگ» سياقتى بەدەلدى اگەنتتىكتىڭ مەملەكەتتىك اقپاراتتىق ساياساتتى ءتيىمدى جانە ساپالى ناسيحاتتايتىنىنا ءۇمىت ارتتىم»،- دەدى كۋاگەر.

تەرگەۋدىڭ نۇسقاسى بويىنشا، 2010-2015 جىلدار ارالىعىندا سەيىتقازى ماتايەۆ ءوز ۇلى – «قازتاگ حاا» ءجشس-ىنىڭ باس ديرەكتورى اسەت ماتايەۆپەن بىرلەسىپ الدىن-الا ءبىر توپ ادامدارمەن ءسوز بايلاسىپ، الداۋ مەن سەنىمدى تەرىس ماقساتقا پايدالانۋ جولىمەن مەملەكەتتىك ساتىپ الۋ سالاسىنداعى ءىرى كولەمدەگى بيۋدجەت قاراجاتىن جىمقىرعان. ۇرلانعان اقشانىڭ كولەمى 169 ملن. تەڭگەنى قۇرايدى. ايتپاقشى، سوتتىڭ بۇگىنگى وتىرىسىندا سەيىتقازى ماتايەۆ: «ۇلتتىق باسپا ءسوز كلۋبى» قوعامدىق بىرلەستىگىنىڭ شتاتىندا جالعىز ءوزىم عانا بولدىم» دەپ مالىمدەدى. سونداي-اق، ول قوعامدىق بىرلەستىككە ەشقانداي مۇشەلىككە وتپەگەن ازاماتتىق تۇلعالارعا 254 ملن. 721 تەڭگە اۋدارعانىن دا راستادى.

ءامىرلان ءالىمجان