قازاقستاندا ەكونوميكالىق داعدارىس جاعدايىندا جەر قويناۋىن پايدالانۋشىلار ءۇشىن سالىقتىق جەڭىلدىكتەردى ەنگىزۋ جوسپارلانىپ وتىر. بۇل تۋرالى ق ر ۇەم ءمينيسترى قۋاندىق بيشىمبايەۆ سالىق سالۋدىڭ وزەكتى ماسەلەلەرىنە ارنالعان كونفەرەنسيا بارىسىندا مالىمدەدى، دەپ حابارلايدى Baq.kz ءتىلشىسى.

«بۇگىنگى تاڭدا مۇناي ءوندىرۋ سالاسىندا ەكونوميكا وزگەرىسكە ۇشىرادى جانە ءبىز وزگەرگەن جاعدايدا جەر قويناۋىن پايدالانۋشىلار ءۇشىن سالىق رەجيمى قانداي ەكەنىن تۇسىنەمىز. مۇناي باعاسىنىڭ ۇزاق مەرزىمدى دەڭگەيى قانداي بولاتىنى بەلگىسىز، ءبىراق الداعى 5-7 جىلدا ولار بۇرىنعىداي بولمايتىنى انىق. ءبىز جاڭا كەڭىستىككە ەنەمىز، جەر قويناۋىن پايدالانۋ سالاسى مەن ءوندىرۋ سالاسىنان ۇلتتىق قورعا تۇسەتىن تۇسىمدەر، سالىقتار مەن بولجامدار تولىعىمەن وزگەردى»، - دەدى جەر قويناۋىن پايدالانۋشىلارعا جەڭىلدىكتەردى تۇسىندىرگەن ق.بيشىمبايەۆ.

ءمينيستردىڭ ايتۋىنشا، بۇل جاعداي كاسىپورىنعا قۇيىلاتىن ينۆەستيسيانىڭ جەتىسپەۋشىلىگىنە اكەلەدى.

«قازاقستاننىڭ ءوز ەرەكشەلىكتەرى بار. جەر قويناۋىن پايدالانۋ كورسەتكىشى بويىنشا دامىپ جانە قۇلدىراپ جاتقان كەن ورىندارى بار. ءوندىرۋدى قاجەتتى دەڭگەيدە ۇستاپ تۇرۋ ءۇشىن ينۆەستيسيالار قاجەت. قازىرگى سالىق پەن باعا دەيگەيى بۇعان جول بەرمەيدى. ءبىز ءوندىرىسى تومەندەپ كەلە جاتقان كاسىپورىندارعا قولداۋ، ياعني ولارعا قازىرگى تابىستارىن جوعالتپاي، قوسىمشا رەسۋرستار بەرۋدى ۇسىنعىمىز كەلەدى»، - دەدى ۆەدومستۆو باسشىسى.

مينيستر ەرتەڭ جەر قويناۋىن پايدالانۋشىلارمەن جۇمىس توبىنىڭ جيىنىن وتكىزەتىنىن جەتكىزدى. سونداي-اق، ول قازاقستاندىق شيكىزاتقا سۇرانىستىڭ تومەندەگەنىن ايتتى.

«شيكىزاتقا سۇرانىس ازايىپ كەلەدى، سەبەبى بالامالى قۋات كوزدەرى پايدا بولىپ جاتىر. الداعى 30-40 جىلدا ءبىز قولدا بار رەسۋرستاردى اينالىمعا، ءوندىرىس پەن ەكسپورتقا ماكسيمالدى تۇردە ەنگىزۋىمىز كەرەك. بۇل ءۇشىن ادىس-تاسىلدەردى وزگەرتۋىمىز كەرەك»، - دەدى ق.بيشىمبايەۆ.

ونىڭ ايتۋىنشا، جاڭا كەن ورىندارىنا جاڭا ينۆەستيسيالار تارتۋ ءۇشىن تابىستارعا سالىق سالۋدان ارىلىپ، قارجىلىق ناتيجەگە سالىق سالۋعا كوشۋ كەرەك.

«بۇگىنگى تاڭدا ءبىز باستاپقىدا تابىستارعا سالىق سالامىز، ال قارجىلىق تابىسقا كوپ ءمان بەرمەيمىز. وسى سالادا جۇمىس جۇيەلى تۇردە بارلىق مۇددەلى مەملەكەتتىك ورگاندارمەن بىرگە جۇزەگە اسادى. ءبىز ەكونوميكا تومەندەگەن كەزەڭدە ينۆەستيسيالاردى تارتىپ، اينالىمعا ەنگىزبەكپىز. بۇل الداعى 5-7 جىلدا وسىمگە قول جەتكىزىپ، جۇمىسپەن قامتۋ دەڭگەيىن كوتەرىپ، سالىق سالىناتىن بازانى ارتتىرۋعا مۇمكىندىك بەرەدى»، - دەپ قورىتىندىلادى مينيستر.