قازىرگى ۋاقىتتا ەكونوميكالىق باسەكەلەستىككە قابىلەتتىلىك الەم ەلدەرى اراسىنداعى ەرەكشە تارتىسقا اينالدى. سونىڭ سالدارىنان ەكونوميكالىق قاۋىپسىزدىك ماسەلەسى ەڭ وزەكتى جاعدايلاردىڭ بىرىنە اينالدى. قازىرگى دۇنيەجۇزىلىك ساۋدا سالاسىن شارپىعان ءقاۋىپ قازاقستاندى دا اينالىپ وتپەسى انىق. بۇگىن استاناداعى «مەدياتەحنولوگيالار ورتالىعى» جەكە قورىنىڭ «SarapTime» ساراپشىلىق پىكىرتالاس كلۋبى وتكىزگەن «قازاقستانداعى ەكونوميكالىق قاۋىپسىزدىك: زاڭسىز ساۋدادان ادال كاسىپكە؟» تاقىرىبىنداعى كەزەكتى وتىرىسىن ەلىمىزدەگى ەكونوميكالىق قاۋىپسىزدىك ماسەلەسى توڭىرەگىندە ءسوز قوزعادى، دەپ جازادى BAQ.kz ءتىلشىسى.

جيىندا قازاقستانداعى ەكونوميكالىق قاۋىپسىزدىك اياسىنداعى زاماناۋي تەندەنسيالاردى، شەكارا بويىنداعى تەرريتوريالاردان تاۋارلاردى جەتكىزۋ اياسىنداعى شاعىن جانە ورتا بيزنەس مۇددەلەرىن قورعاۋدى، سونىمەن قاتار كەدەن ءتاريفى مەن مولشەرلەمەلەرىنىڭ ادىستەمە ماسەلەلەرى تالقىلاندى.

ق ر پارلامەنتى ءماجىلىسىنىڭ دەپاۋتتارى، ق ر قم مەملەكەتتىك تابىستار كوميتەتىنىڭ، ەكسپەرتتىك بىرلەستىكتەردىڭ، عىلىمي-زەرتتەۋ ينستيتۋتتارىنىڭ، قوعامدىق بىرلەستىكتەر مەن شاعىن جانە ورتا بيزنەس وكىلدەرى، قوعام قايراتكەرلەرى مەن بۇقارالىق اقپارات قۇرالدارى وكىلدەرى قاتىسقان جيىندا قازىرگى كەزدەگى ەلىمىزدەگى ەكونوميكالىق قاۋىپسىزدىكتىڭ الدىن الۋ شارالارى ءسوز بولدى.

"ءقازىر ەلىمىزدە ەكونوميكا دامىدى. ءبىز دە ءوز قولىمىزبەن بىردەڭەلەردى جاساي الاتىن دارەجەگە جەتتىك. ءبىراق كورشىلەرىمىزبەن باسەكەلەسۋگە ءالى دە قاۋقارسىزبىز. ەكونوميكالىق قاۋىپسىزدىك تۋرالى ايتقاندا وسىنى ەسكەرۋىمىز كەرەك. ەڭ اۋەلى وزگە ەلدەن يمپورتتايتىن تاۋارلاردىڭ سانىن شەكتەۋ ارقىلى وتاندىق وندىرۋشىلەرىمىزگە جاعداي جاساۋىمىز كەرەك. ايتپەسە ءبىزدىڭ ەلدە 25-30 مىڭ تۇراتىن اياقكيىمدى وزگە ەلدەن بارىپ 5-10 مىڭ تەڭگەگە ساتىپ الا سالۋ بارلىعىنىڭ قولىنان كەلەدى. سوندىقتان ەڭ اۋەلى ەكونوميكالىق قاۋىپسىزدىك تۋرالى ءسوز بولعاندا، ءبىز ءوز ەلىمىزدەگى، وتاندىق تاۋار وندىرۋشىلەرىمىزدى قورعاۋدى كوزدەۋىمىز كەرەك" - دەيدى قازاقستان رەسپۋبليكاسىنىڭ قارجى مينيسترلىگى مەملەكەتتىك تابىستار كوميتەتىنىڭ ءتوراعاسى داۋلەت ەرعوجين.

بۇگىنگى وتىرىستىڭ وتۋىنە بىردەن ءبىر سەبەپ بولعان ول - قىرعىز رەسپۋبليكاسى تەرريتورياسىنان تاۋارلاردى وتكىزۋدى باقىلاۋ، كەدەندىك تازارتۋ كەزىندە تاۋەكەلدى باسقارۋ جۇيەسى ستاندارتتارىنداعى ادىستەمەلەر مەن نورمالاردى انىقتاۋ اياسىنداعى ماسەلەلەردىڭ قوعامدا كەڭىنەن تالقىلانۋ ماسەلەسى تۋىنداعاندىعى.

"قازىرگى كەزدە "قورعاس" كەدەن بەكەتىندە سالىق كوميتەتى تەكسەرۋ جۇرگىزىپ جاتىر. سوعان بايلانىستى يمپورت كولەمى ازايىپ كەتتى. الايدا بۇنىڭ قازىرگى كەزدەگى حالىقارالىق ساياسي جۇيەگە ەش قاتىسى جوق. ال ەكونوميكالىق قاۋىپسىزدىككە كەلەر بولساق ول ەلىمىزگە كەلەتىن تاۋارلارعا قاتىستى. ارزان باعامەن، ساپاسىز تاۋاردىڭ ەلىمىزگە كوپتەپ كەلۋى وتاندىق وندىرۋشىلەردى دە، تۇتىنۋشىلاردى دا شىعىنعا ۇشىراتادى" - دەيدى «ستراتەگيالىق باستامالار ورتالىعىنىڭ» باس سەرىكتەسى ولجاس قۇدايبەرگەنوۆ.

پىكىرتالاس قورىتىندىسىندا وتاندىق بيزنەستىڭ ءساتتى دامۋى تۋراسىندا ساراپشىلاردىڭ ۇسىنىستارى قابىلداندى.