تاۋەلسىزدىك جىلدارى ەلىمىزدىڭ مادەنيەت جانە ونەر سالاسىن دامىتۋ بويىنشا قىرۋار جۇمىس اتقارىلدى. بىرنەشە مەملەكەتتىك باعدارلاما قابىلداندى. بولىنگەن قاراجات تا قوماقتى. 25 جىلداعى جەتىستىكتەر تۋرالى BNews.kz تىلشىسىنە ق ر مادەنيەت جانە سپورت مينيسترلىگىنىڭ مادەنيەت جانە ونەر ىستەرى دەپارتامەنتىنىڭ ديرەكتورى اقتوتى رايىمقۇلوۆا اڭگىمەلەپ بەردى.

2004-2011 جىلدارى تاريحي-مادەني مۇرانى جۇيەلەۋگە مۇمكىندىك بەرگەن بىرەگەي «مادەني مۇرا» مەملەكەتتىك باعدارلاماسى قابىلداندى. باعدارلاما اياسىندا تۇڭعىش رەت وتاندىق ەسكەرتكىشتەردى تۇگەندەۋ جۇرگىزىلىپ، رەسپۋبليكالىق جانە جەرگىلىكتى ماڭىزى بار تاريح جانە مادەنيەت ەسكەرتكىشتەرىنىڭ تىزىمدەرى بەكىتىلدى. وسىلايشا، قازاقستاننىڭ بىرنەشە وبلىسىنىڭ تاريح جانە مادەنيەت ەسكەرتكىشتەرىنىڭ جيناعى شىعارىلعان.
«وسى كۇنگە دەيىن جەرگىلىكتى ماڭىزى بار ەسكەرتكىشتەردىڭ تىزىمىنە 11 266 وبەكت، رەسپۋبليكالىق ماڭىزى بار ەسكەرتكىشتەردىڭ تىزىمىنە 219 جانە حالىقارالىق ماڭىزى بار ەسكەرتكىشتەردىڭ تىزىمىنە 10 تاريح جانە مادەنيەت ەسكەرتكىشى ەنگىزىلدى. ونىڭ ىشىندە ەكى ەسكەرتكىش – وڭتۇستىك قازاقستان وبلىسىنداعى قوجا احمەت ياسساۋي كەسەنەسى، الماتى وبلىسىنداعى تاڭبالى پەتروگليفتەرى جانە «جىبەك جولى» نوميناسياسى بويىنشا جەتىسۋ بولىگىندەگى 8 ەسكەرتكىش – تالعار، قارامەرگەن، قايالىق، اقىرتاس، قۇلان، مەركە، ورنەك جانە قوستوبە قالاشىقتارى يۋنەسكو-نىڭ بۇكىلالەمدىك مۇراسىنا ەنگىزىلدى»، - دەپ اتاپ ءوتتى اقتوتى رايىمقۇلوۆا.
جالپى العاندا، 1991-2015 جىلدار ارالىعىندا 136 تاريح جانە مادەنيەت ەسكەرتكىشى قالپىنا كەلتىرىلگەن.
دەپارتامەنت ديرەكتورىنىڭ ايتۋىنشا، مادەني مۇرا ينفراقۇرىلىمىن ودان ءارى دامىتۋعا قاتىستى ۇلكەن جۇمىس جۇرگىزىلىپ جاتىر. سوڭعى جىلدارى ەلىمىزدە ەكى رەسپۋبليكالىق قورىق-مۇراجاي – الماتى وبلىسىنداعى «ەسىك» جانە شىعىس قازاقستان وبلىسىنداعى «بەرەل» قۇرىلعان.
سونداي-اق، تەاتر ونەرىندە دە اۋىز تولتىرىپ ايتارلىقتاي جەتىستىكتەر بارشىلىق. تاۋەلسىزدىك جىلدارىندا قازاقستاندا 18 جاڭا تەاتر اشىلدى.
«ونىڭ ىشىندە 2 وپەرا جانە بالەت تەاترى، 5 مۋزىكالىق-دراما، 3 دراما، 3 ساتيرا، 1 جاستار، 3 قۋىرشاق جانە 1 جاس كورەرمەندەرگە ارنالعان تەاتر بار. بۇگىنگى كۇنى قازاقستاندا ءتۇرلى باعداردا 52 مەملەكەتتىك تەاتر قىزمەت اتقارادى. اتاپ ايتساق، 3 وپەرا جانە بالەت تەاترى، 4 بالالار مەن جاسوسپىرىمدەرگە ارنالعان تەاتر، 7 قۋىرشاق تەاترى، 18 قازاق دراما جانە مۋزىكالىق-دراما تەاترلارى، 10 ورىس دراما، 3 قازاق جانە ورىس ترۋپپاسى بار دراما تەاترلار، 1 جاستار تەاترى، 2 ساتيرا جانە 4 ۇلتتىق تەاتر، ۇيعىر جانە كورەي مۋزىكالىق كومەديا تەاترلارى، نەمىس جانە وزبەك دراما تەاترلارى. جىل سايىن تەاتر ساحنالارىندا ءتۇرلى جانر جانە باعىتتاردى قامتيتىن شامامەن 12 مىڭ سپەكتاكل قويىلادى»، - دەيدى ا.رايىمقۇلوۆا.
كينووندىرىس سالاسىنداعى تابىستار دا قۋانتادى. بۇگىنگى كۇنى «قازاقفيلم» اق حالىقارالىق دارەجەنى قوسقاندا، ارت-حاۋستان باستاپ كوممەرسيالىق، پروكاتتىق، كورەرمەندىككە دەيىن ءتۇرلى جانر مەن باعىتتاعى  جوبالاردى جۇزەگە اسىرادى. 1991 مەن 2015 جىل ارالىعىندا «قازاقفيلم» كينوستۋدياسى 479 كوركەم، دەرەكتى جانە انيماسيالىق ءفيلمنىڭ، ونىڭ ىشىندە 115 تولىقمەتراجدى كوركەم  ءفيلمنىڭ ءوندىرىسىن اياقتاعان.
«مۋزىكالىق جانە حورەوگرافيالىق ونەرگە كەلسەك، قازىرگى تاڭدا قازاقستاندا شامامەن 31 مەملەكەتتىك كونسەرتتىك ۇيىم تابىستى قىزمەت اتقارىپ جاتىر. 25 جىلدا ەلىمىزدە «سوليستەر اكادەمياسى» مەملەكەتتىك كامەرالىق وركەسترى، ع.جۇبانوۆا اتىنداعى مەملەكەتتىك شەكتى اسپاپتار كۆارتەتى، مەملەكەتتىك تريو، ەۋرازيالىق جاستار سيمفونيالىق وركەسترى، م.بەيسەنعالييەۆتىڭ جەتەكشىلىگىمەن الماتى سيمفونيالىق وركەسترى، ا.ابلايەۆتىڭ جەتەكشىلىگىمەن استانا ەسترادا-سيمفونيالىق وركەسترى جانە تاعى باسقا جوعارى كاسىبي شىعارماشىلىق ۇجىمدارى قۇرىلدى. تۇراقتى نەگىزدە رەسپۋبليكالىق جانە حالىقارالىق كونكۋرستار مەن فەستيۆالدەر وتكىزىلۋدە»، - دەدى مادەنيەت جانە ونەر ىستەرى دەپارتامەنتىنىڭ ديرەكتورى.
كىتاپحانا ىسىنە ۇلكەن كوڭىل ءبولىندى. قازاقستاننىڭ ۇلتتىق ەلەكتروندى كىتاپحاناسىن دامىتۋ ماڭىزدى. جىل سايىن ەلەكتروندى كىتاپحانا 3000 كوشىرمەمەن تولىعادى. بۇگىنگى تاڭدا ونىڭ قورىندا 23 مىڭ قۇجاتتىڭ ەلەكتروندى كوشىرمەسى بار. 2005 جىلى استانادا ۇلتتىق اكادەميالىق كىتاپحانا اشىلدى. ونىڭ قورىندا قاعاز تومدارمەن قاتار ەلەكتروندى كىتاپتار دا ساقتاۋلى. كىتاپحانانىڭ باسپا قورى 150 مىڭ كىتاپتى قۇرايدى، ونىڭ 120 مىڭى «كىتاپ قازىناسى – استاناعا» اكسياسى اياسىندا جينالعان.

ايىمگۇل ابىليەۆا، Bnews.kz