ەلباسى كوكشەتاۋ قالاسىنا جۇمىس ساپارى اياسىندا «قازاقستان اگرو يننوۆاسيالىق كورپوراسياسى» جاۋاپكەرشىلىگى شەكتەۋلى سەرىكتەستىگىنە بارىپ، ونداعى قۇراستىرۋ ۇدەرىسىمەن جانە شىعارىلاتىن تەحنيكا ۇلگىلەرىمەن تانىستى، - دەپ حابارلايدى Qamshy.kz اقوردا سايتىنا سىلتەمە جاساپ.

سونىمەن قاتار، نۇرسۇلتان نازاربايەۆ اقمولا وبلىسى جۇرتشىلىعى وكىلدەرىمەن كەزدەستى.

كەزدەسۋگە ارداگەرلەر، اۋىل شارۋاشىلىعى كاسىپورىندارىنىڭ، مەملەكەتتىك ورگانداردىڭ، ۇكىمەتتىك ەمەس ۇيىمداردىڭ جانە جاستار ۇيىمدارىنىڭ جەتەكشىلەرى، سونداي-اق بيزنەس قوعامداستىعىنىڭ وكىلدەرى قاتىستى.

قازاقستان پرەزيدەنتى جينالعاندارعا ارناعان سوزىندە تاۋەلسىزدىك جىلدارىندا مەملەكەت تۇراقتى ەكونوميكالىق ءوسىم مەن جوعارى الەۋمەتتىك ستاندارتتاردى قامتاماسىز ەتە العانىن اتاپ ءوتتى. 

– بۇگىنگى تاڭدا قازاقستانعا كەلگەن ينۆەستيسيا كولەمى 250 ميلليارد اقش دوللارىنان استى. 1995 جىلدان بەرى قازاقستاندىقتاردىڭ تابىسى 40 ەسەدەي ءوستى. تۇرعىندار ءال-اۋقاتىنىڭ ارتۋى ءومىر جاسىنىڭ ۇزاقتىعىن 67-دەن 72 جاسقا دەيىن ۇزارتۋعا مۇمكىندىك بەردى. بالا تۋۋ ءوسىمى – 60%. بۇل ورايدا بالالارعا تولەنەتىن جاردەماقى ءوسىمى 7 ەسەدەن استى، – دەدى نۇرسۇلتان نازاربايەۆ.

قازاقستان پرەزيدەنتى وبلىستى ەكونوميكالىق تۇرعىدان ءارتاراپتاندىرۋدىڭ باستى قاينار كوزى اگرارلىق سەكتور ەكەنىن اتاپ ءوتتى.

– استانانىڭ ءبىر عانا ازىق-تۇلىك بەلدەۋى اياسىندا 100-دەن استام جوبانى جۇزەگە اسىرۋ ءۇشىن 85 ميلليارد تەڭگەگە جۋىق ينۆەستيسيا تارتىلدى. سوڭعى 15 جىلدا 10 مىڭنان استام جاڭا تراكتور، استىق جينايتىن كومباين مەن ەگىن ەگەتىن كەشەن ساتىپ الىندى، – دەدى نۇرسۇلتان نازاربايەۆ.

بۇعان قوسا، مەملەكەت باسشىسى ءوڭىردىڭ تۋريستىك سالاسىن دامىتۋ قاجەتتىگىن اتاپ ايتتى. 

– جىل سايىن وبلىسقا ءجۇز مىڭنان استام تۋريست كەلەدى، وعان شورتاندى-بۋراباي كۋرورتى ايماعىنا مەملەكەتتىك قولداۋ كورسەتىلگەنى دە سەپتىگىن تيگىزىپ وتىر. كەلەر جىلى جازدا استانادا ماڭىزدى تاريحي شارا – «ەكسپو-2017» حالىقارالىق كورمەسى وتەدى. وعان 100-دەن استام ەلدىڭ وكىلدەرى قاتىسادى. ولاردىڭ كوبى استاناعا عانا ەمەس، وسى ءوڭىردىڭ تۋريستىك نىساندارىن دا تاماشالاۋعا كەلەدى، – دەپ اتاپ ءوتتى قازاقستان پرەزيدەنتى.

كەزدەسۋ اياسىندا اقمولا وبلىسىنىڭ اكىمى ءوڭىردىڭ نەگىزگى الەۋمەتتىك جانە ەكونوميكالىق كورسەتكىشتەرى، سونداي-اق ونى دامىتۋ پەرسپەكتيۆالارى تۋرالى باياندادى.

سوڭىندا نۇرسۇلتان نازاربايەۆ جينالعان قاۋىمدى ەل تاۋەلسىزدىگىنىڭ 25 جىلدىق مەرەيتويىمەن قۇتتىقتاپ، وتباسىنىڭ اماندىق-ساۋلىعى مەن جاڭا تابىس جانە باق-بەرەكە تىلەدى.

وبلىس تۇرعىندارى قازاقستان پرەزيدەنتىنە جىلى لەبىزدەرىن ءبىلدىرىپ، تۋعان ولكەسىنە ۇدايى قامقورلىعى مەن ەكونوميكانى دامىتۋ، حالىقتىڭ ءال اۋقاتىن ارتتىرۋ باعىتىندا اتقارىپ جاتقان جۇمىسى ءۇشىن ريزاشىلىق ءبىلدىردى.