الماتى وبلىسى جامبىل اۋدانىندا بولعان قايعىلى وقيعا جانىنا باتپاعان قازاق جوق شىعار. ەل امان، جۇرت تىنىشتا، ادال ەڭبەگىمەن وتباسىن باعىپ جۇرگەن ءۇش بىردەي ازاماتتىڭ قاندىقول قىلمىسكەرلەردىڭ قولىنان مەرت بولۋى كىمدى بولسا دا الاڭداتادى. مۇنداي سوراقىلىقتىڭ ارام ويلى قاسكويلەردىڭ وزدەرىن جازاسىز كەتەتىنىنە سەنىمدىلىگىنەن بولاتىنى دا تۇسىنىكتى. زاڭ قاتال ەمەس دەي المايمىز. قىلمىسكەرلەر ءبىرى قالماي جاۋاپقا تارتىلىپ، قىلمىستىڭ الدىن الۋ شارالارى دۇرىس جۇرگىزىلسە، جاعداي باسقاشا بولار ما ەدى؟ ءبىر اپتاعا جۋىق قان جۇتىپ، قايعىرعان جۇرتتىڭ سوڭعى ءۇمىتى ءۇزىلدى. جوعالعان ازاماتتاردىڭ قازاسى تۋرالى قايعىلى حاباردى شاراسىز قابىلدادى.
قوعامدىق رەزونانس تۋعىزعان وسى وقيعاعا قاتىستى سان الۋان پىكىرلەر، بولجام، جورامالدار دا ايتىلۋدا. ونىڭ ءبارى ورىنسىز دەي المايمىز. تەك ويىمىز، ءىسىمىز اتالعان قىلمىستىڭ تولىق اشىلۋىنا، ءادىل شەشىم شىعىپ، كىنالىلەردىڭ زاڭعا ساي جازالانۋىنا ىقپال ەتسە دەيىك. وسى ورايدا الەۋمەتتىك جەلىدە قاندى قىلمىسقا قاتىستى جازىلعان ءبىرقاتار ەل ازاماتتارىنىڭ پىكىرلەرىن نازارلارىڭىزعا ۇسىنامىز.
اۋىت مۇقيبەك، اقىن:
وتە وكىنىشتى جاعداي بولدى بۇل! «دۇنيەسى قۇرسىن، جىگىتتەردىڭ ءوز باستارى امان بولسا ەكەن!»-دەگەن تىلەگىمىز ورىندالمادى. اللانىڭ جازۋىنا پەندەنىڭ قىلار ايلاسى جوق! جاندارى جانناتتا بولسىن ءۇش ازاماتتىڭ!
ءۇش بىردەي جىگىتتىڭ، ءۇش وتباسىنىڭ ارقاسۇيەرىنىڭ تاپا-تال تۇستە جازىقسىزدان-جازىقسىز قانىشەرلەردىڭ قولىنان قازا تابۋى، ارينە، وڭاي شارۋا ەمەس! ءبارىمىزدىڭ دە ءتىسىمىز شىقىرلاپ، جۇدىرىعىمىز ءتۇيىلىپ وتىر. حالىقتىڭ قوبالجۋى دا زاڭدى. دەگەنمەن، بۇل وقيعادان ساياسي استار ىزدەۋدىڭ، ءبولىنىپ، جارىلۋدىڭ قاجەتى جوق. اقشاعا قۇنىققان قاسكويلەر ءۇشىن سەنىڭ كىم بولۋىڭ، قايدان كەلۋىڭ ماڭىزدى ەمەس. ولارعا ءبارى ءبىر. وبال-ساۋاپ دەگەنگە قارامايدى. قۇداي مۇنداي بالە-قازادان كىم-كىمدى بولسا دا ساقتاسىن دەپ تىلەيىك!
ەڭ باستىسى، تۋىسقاندارعا، جەرلەستەرگە سابىرلىلىق تىلەيمىن. بولماس ىسكە بولاتتان بەرىك بولايىق! قۇدايعا شۇكىر، قازاقستاننىڭ قۇقىق قورعاۋ ورگاندارى بار. مىنە، قىلمىسكەرلەر قولعا ءتۇستىپتى. ارى قاراي بۇل قىلمىستىڭ بەتى اشىلادى، قانىشەرلەردىڭ جازاسى بەرىلەدى...
وپات بولعان باۋىرلارىمىڭ وتباسىنا كوڭىل ايتام! ازاماتتاردىڭ اللا الدىنان جارىلقاسىن!
قۋاندىق شاماحاي ۇلى، جۋرناليست:
قىلمىسكەر قانىشەردە ۇلت تا، ۇيات تا بولمايدى. ولارعا كەرەگى وڭاي ولجا. سەن ورالمانسىڭ با، الىسسىڭ با، جاقىنسىڭ با قارامايدى. اقشا ءۇشىن وندايلار قاسىنداعى سىبايلاسىن دا ولتىرە سالادى. سوندىقتان ونىڭ استارىنان ءتۇرلى سەبەپ-سالدار ىزدەۋدىڭ قاجەتى جوق. قىلمىسكەر ەشكىمدى ايامايدى دەگەندى تۇسىنەيىك.
ءبىز بىرلىك تانىتىپ ادىلەتسىزدىكپەن اياۋسىز كۇرەسسەك قانا سىرقات قوعامدى ساۋىقتىرامىز. ازعىندىق اتاۋلىنى ۇلكەن-كىشى دەمەي اشكەرەلەپ سىنايىق. جەمقورلىق جايلاپ ارسىزدىق بەلەڭ العان قوعامدى جاپپاي جاڭارتۋ، تۇبەگەيلى وزگەرتۋ ءۇشىن دەموكراتيالىق وزىق قۇندىلىقتاردى ورنىقتىرۋ، حالىققا ادال قىزمەت ەتۋدى ۇكىمەت ورگاندارىنان قاتاڭ تالاپ ەتۋ بارىمىزگە پارىز.
سەرىك بوقان، اقىن:
بۇل وتە استارى تەرەڭ قاندى وقيعانى استە جاي قالدىرۋعا بولمايدى... ءۇش كۇن بويى كوز الدىنداعى وقيعاعا سەلت ەتپەۋى كۇدىك تۋدىرادى. استارلى قىلمىستى اشۋعا كۇش ساۋ كەرەك ءاربىر ادىلەتتى جاقتايتىن ازامات!
