قۇرمەتتى «قامشى» پورتالى! وتكەن اپتادا قاپىدا كەتكەن ءۇش بىردەي ازاماتىمىزدان كوز جازىپ قالعان كۇننەن باستاپ، كۇنى كەشەگە دەيىن ولارعا اماندىق تىلەپ، الاڭداعان جۇرتتىڭ الدىندا بولدىڭىزدار. ول ءۇشىن بارشا وقىرماندارىڭىزدىڭ اتىنان العىس بىلدىرەمىز.
كەشەگى كۇن قابىرعامىزعا باتتى، شاراسىز كۇيگە تۇستىك. سىزدەر ارقىلى باۋىرلارىمىزعا جوقتاۋ، اعايىن-تۋىسقا توقتاۋ ايتايىن دەپ وتىرمىز. ءۇش جىگىت تە قازاق ەلىنە قايراتىمەن كەلگەن، ماحابباتىمەن كەلگەن، ەڭبەگىمەن كەلگەن، ەل - جۇرتىمەن كەلگەن ازاماتتار ەدى. ۇشەۋى دە ازات وتانعا ءوسىپ-ونۋدى، ۇرپاعىن ماڭگىلىك ەلدىڭ، ماڭگىلىك حالقى ەتۋدى ماقسۇت ەتىپ كەلگەن ەڭبەك ادامدارى ەدى. قىسقا ءومىرىنىڭ سوڭعى كۇنىنە دەيىن سول ماقسۇتتان تايعان جوق. باسقا قازاقتى ايتپاعاندا، قازاق ەلىنە شىڭجاڭنىڭ وزىنەن-اق وسىنداي جىگىتتەر ون مىڭداپ ورالدى. ولار بوس قالعان جايلاۋعا جان بىتىرگەن، بازارعا مال تولتىرعان ەڭبەقور ەر جىگىتتەر ەكەنىن كورىپ جۇردىك.
بۇگىن ءۇش بىردەي ازاماتىمىز ارماندا كەتتى... الدانىپ كەتتى... ولاردا سەنىم بولدى، سەزىك بولمادى. ولار ادالدىعىنا الداندى، ولار اڭعالدىعىنان الداندى، ولار اعايىن كەيپىندەگى الباستىلارعا الداندى.
وسى قانقۇيلى وقيعاعا بايلانىستى الەۋمەتتىك جەلى ورتەنىپ تۇر. مەنىڭ پاراقشاما دا وڭدى-سولدى حاتتار ءتۇسىپ جاتىر. مۇندايدا كىسى شامشىل بولادى عوي. كەيبىرى بەتىڭە باتپاق شاشقانداي پيعىل تانىتادى. ولارعا ايتارىمىز: قاندىقولداردىڭ قانداي دەڭگەيلى قىلىعى، قانداي قانقۇيلى قىلمىسى قازاق ەلىنىڭ بيىك قاسيەتىنە، قازاق بىتكەننىڭ قازاقستانعا دەگەن ولشەۋسىز ماحابباتىنا كەدەرگى بولا المايدى، قازاق بىتكەننىڭ توپتاسۋ جولىنداعى قايسار رۋحى مەن قاجىرلى كۇرەسىن، قاسيەتتى كوشىن توقتاتا المايدى.
وسى جانە وسىنداي وقيعالاردى پايدالانىپ الىستاعى قازاقتى قازاقستانعا قارسى قويعىسى كەلەتىن پيعىل بولسا، وندايلاردىڭ ورنى وسى قاندىقولداردىڭ قاتارىندا. ايىرماسى قاندىقولدار جازاسىن الادى، ولاردىڭ قىلمىسىن پايدالانىپ ۇرەي تاراتقاندار، قازاق دەگەن شەكسىز قاسيەتتى ۇعىمعا قارا كۇيە جاققىسى كەلەتىندەر قالتارىستا قالادى. .
مەزگىلىمەن كەلگەن قازا – جۇبانىش، مەزگىلسىز كەلگەن قازا – كۇيىنىش! كۇن اشىق، جەر جازىقتا جازىم بولعان، قىرشىندارىنان قيىلعان بوزداقتارىمىزدىڭ كۇيىگى كومەيگە كەپتەلىپ تۇر. وتانىمىزعا كەلدىك، وسىندا وسىپ-ونەمىز دەپ كەلدىك، اللا بەرگەن ىرىزدىقتى وسى توپىراقتا تاتامىز دەپ كەلدىك، مەزگىلى كەلگەندە وسى توپىراقتا جاتامىز دەپ كەلدىك. ءتىپتى، مەزگىلسىز كەتسەك تە وسى توپىراققا باتامىز دەپ كەلدىك. قىرشىن كەتكەن ازاماتتارىمىزدى دا وسى توپىراققا تاپسىرامىز. دولان ۇلى جارقىنبەكتى، زارلىحان ۇلى مۇقياتتى، ءالىمحان قارلىبەكتى وزدەرى وتاۋىن كوتەرىپ، وشاعىن تۇتاتقان جەتىسۋ توپىراعىنا تاپسىرامىز.
جىگىتتەردىڭ جۇبايلارىنا، بالالارىنا، تۋىستارىنا، ەل-جۇرتىنا كوڭىل ايتامىز! ۇرپاق وسەدى، ۋاقىت كوشەدى، قايعى وشەدى، قازاقستانعا قازاق تولادى، قازاقستان ۇلى ەل بولادى!
شەيىتتەردىڭ يمانى جولداس بولسىن!
الماس احمەتبەك ۇلى
