«ماي مەرەكەسىنە» وراي، ورىستىڭ ۇلتشىل جاستارى رەسەيدىڭ ءبىرقاتار قالالارىندا شەرۋگە شىقتى. ماسكەۋ جانە پەتەربۋرگ قالالارىندا ولاردىڭ سانى مىڭنان اسىپ ءتۇستى. «ورىس مارشى» دەپ اتالاتىن شەرۋدە جاستار لوزۋنگ ۇستاپ، ورىس حالقىن بىرىگۋگە شاقىردى. «ورىستار، العا!» دەپ ۇراندادى.
ءبىراق، ايتايىن دەگەنىمىز بۇل ەمەس. وسى شەرۋ بارىسىندا ورىستىڭ قوعامدىق بەلسەندىلەرى، ۇلتشىلدارى «قازاقستان دەگەن ەل بولماعان» دەپ ءسوز سويلەپتى. جيرينوۆسكيي، ليمونوۆ، شتىگاشيەۆتەر اۋىزدارىنا تۇكىرىپ قويعان با، كىم ءبىلسىن، ەندى قازاقستاندى جوققا شىعارعان ورىس جاستارى پايدا بولدى. الگىلەردى شال-شاۋقان دەپ، ءمان بەرمەۋگە شاقىرعان ورىس بيلىگى ەندىگى جاستارىنىڭ مۇنداي سوزدەرىنە نە دەر ەكەن؟
دميتريي دەمۋشكين، «ورىستار» قوزعالىسىنىڭ كوشباسشىسى:
- «قازاقستان مەملەكەت رەتىندە ەش قاشان ءومىر سۇرگەن ەمەس. رەسەي يمپەرياسىنىڭ كارتاسىنان قازاقستاندى كورسەتىڭىزشى!؟ قازاقستان دەگەن ەل بولعان ەمەس! بولشيەۆيكتەر جاساندى قازاقستان مەن ۋكراينانى قۇردى».
الەكساندار گرۋزينوۆ، حوروشيەۆو-منيەۆنيكا مۋنيسيپالدى اۋدانىنىڭ دەپۋتاتى:
- ۋكراينا، رەسەي، بەلورۋسسيانى اعايىن ەلدەر دەپ اتاۋعا بولمايدى. ولار ءبىر اعزا، ءبىر ەل. بۇل ورىس ۇلتى. ال، تەرريتوريا ماسەلەسىن ايتار بولساق، ۋكراين، بەلورۋسسيامەن بىرگە سولتۇستىك قازاقستاننىڭ جەرى دە رەسەيدىڭ بايىرعى تەرريتورياسى. بۇل تاريحي فاكت. قازاق دەگەن ۇلت بولعان ەمەس. ءازىربايجان سەكىلدى قۇراما ۇلت. ورىس كازاكتارى مەكەندەگەن دالا حالقى. قازاقتاردا ءتىپتى جازۋ دا بولماعان. سەمەي جانە باسقا ايماقتار ورىستىڭ جەرى. ەرتە مە، كەش پە، بۇلار ءبىرىڭعاي مەملەكەت بولاتىن بولادى.
