جاپون قىزى ميدزۋكي ناكامۋرا كىشكەنتايىنان شەتەل اندەرىنە قۇمارتىپ ءوسىپتى. وسە كەلە قازاق اندەرىنە عاشىق بولعان ول، بىردەن ۇيرەنۋگە كىرىسكەن. “اقباقاي” ءانى قازاق مادەنيەتىنە دەگەن ماحابباتىمدى وياتتى” دەيدى ول.بۇل تۋرالى Qamshy.kz  el.kz-كە سىلتەمە جاساپ حابارلايدى. 

23 جاستاعى ميدزۋكي “جەلسىز تۇندە جارىق اي”، “قاماجاي”، “قۇسني-قورلان”، “اق جايناق”، “ارىس جاعاسىندا” سياقتى ءبىرتالاي اندەردى ناقىشىنا كەلتىرە شىرقايدى.

“قازاق اندەرىن العاش تىڭداعانىمدا، قازاقستاننىڭ تاڭعاجايىپ ءان مەن كۇيدىڭ وتانى ەكەنىن ءتۇسىندىم. مەكتەپ بىتىرگەن سوڭ، سۋكۋبا ۋنيۆەرسيتەتىنە وقۋعا ءتۇستىم. ۋنيۆەرسيتەتتە تمد ەلدەرىنەن كەلگەن ستۋدەنتتەر، ماگيسترانتتار كوپ. ولارمەن دوستاسىپ، 1 كۋرستان باستاپ ورىس ءتىلىن ۇيرەندىم. قازاقستاندىق دوستارىممەن بىرگە ءان ايتتىق، بيلەدىك. قازاق حالقىنىڭ ۇلتتىق تاعامى – ەتتى دە استىق. قازاقتار – وتە قوناقجاي، اشىق حالىق”، دەيدى ءانشى قىز.

قازاق جاستارىمەن ارالاسۋ ارقىلى ول ەرەكشە اسەر الىپ، ول قازاق حالقىن، ءداستۇرىن، مادەنيەتىن ءتىپتى جاقسى كورىپ كەتكەن.

“ەسترادا، حالىق ءانى، پوپسا جانرىنداعى بارلىق اندەردى عالامتور ارقىلى تىڭداپ جۇرەمىن. ال انشىلەردەن قايرات نۇرتاس پەن كەشYOU توبىنىڭ اندەرى ۇنايدى”، – دەيدى ول.

ونەرلى قىز ءقازىر سۋكۋبا ۋنيۆەرسيتەتىندە ماگيستراتۋرادا “لينگۆيستيكا جانە ورتالىق ازيا بويىنشا ايماقتانۋ” ماماندىعىندا وقيدى. بىرنەشە جىلدان بەرى ورتا ازياداعى ءتىل ساياساتى، ونىڭ ىشىندە تاتار ءتىلىنىڭ جاعدايى تۋرالى زەرتتەپ كەلەدى. سونداي-اق، اعىلشىن، ورىس، تاتار جانە وزبەك تىلدەرىن جاقسى مەڭگەرىپتى. “سونىمەن بىرگە، باشقۇرت، قازاق، ۇيعىر، تۇرىك، تاجىك تىلدەرىن دە جاقسى تۇسىنەمىن. ءقازىر جۇڭگو، كارىس، پارسى تىلدەرىنە قىزىعىپ ءجۇرمىن” دەيدى ميدزۋكي.

ءانشى قىز كەلەسى جىلى قازاقستانعا كەلۋدى دە جوسپارلاپ وتىر.