قازاقستان مۇسىلماندارى ءدىني باسقارماسىنىڭ قاراعاندى وبلىسى بويىنشا وكىل يمامى ءومىرزاق قاجى بەكقوجانىڭ ۇيىتقى بولۋىمەن وڭىردەگى يمام-مولدالار ءۇشىن «شەشەندىك ونەر جانە كوركەم ناسيحات» اتتى تاقىرىپتا ارنايى ترەنينگ ۇيىمداستىرىلدى، - دەپ حابارلايدى Qamshy.kz قمدب باسپا ءسوز قىزمەتىنە سىلتەمە جاساپ.
ترەنينگتى قمدب باسپا ءسوز ءبولىمىنىڭ باسشىسى، جۋرناليست اعابەك قونارباي ۇلى جۇرگىزدى.
سلايد جانە بەينەروليكتەردىڭ كومەگىمەن وتكەن ترەنينگتە شەبەر سويلەۋدىڭ ادىستەرى، شەشەنگە قاجەتتى قۇرالدار مەن قابىلەتتەر، دانالىقپەن ناسيحات جۇرگىزۋ، ۋاعىزشىعا قويىلاتىن تالاپ-مىندەتتەر، ءجيى قولدانىلاتىن سوزدەردەن ارىلۋ، ويدى ايقىن جەتكىزۋ، تىعىرىقتان شىعۋ تەتىكتەرى، ت.ب. كەرەك كەڭەستەر ايتىلدى.
ا.قونارباي ۇلىنىڭ ءدىندارلارعا ارنالعان ءدارىسى تەوريالىق ءارى تاجىريبەلىك تۇرعىدا وتكىزىلدى. ترەنينگ سوڭىندا يمامدار سول مەزەتتە تاڭدالعان بەلگىلى ءبىر تاقىرىپ توڭىرەگىندە 3 مينۋتتىق ۋاعىز ايتىپ، ءسوز سوڭىندا جىبەرىلگەن قاتەلىكتەر توڭىرەگىندە ورتاق تالقىلاۋلار بولدى.
سونىمەن قاتار، شەشەندىك ونەر سالاسىندا جەتىستىككە جەتكەن الەمدىك تۇلعالاردىڭ حالىق الدىندا شەبەر سويلەگەن ساتتەرى باياندالعان بەينە روليكتەر كورسەتىلىپ، يمامدار بەينەباياندا بايقاعان جاعدايلار تۋرالى تالقىلادى.
«يمامدارىمىز حالىق الدىندا شىققاندا بايسالدى، شەشەن سويلەۋى ءتيىس. بۇل – زامان تالابى. ويتكەنى، ءدىن قىزمەتكەرى – حالىقتى يگىلىككە، يماندىلىققا باستايتىتىن تۇلعا. ونىڭ ءاربىر ءسوزى جاماعاتتىڭ جۇرەگىنەن ورىن الۋى كەرەك. ءقازىر شەشەندىك ونەر ءپانى مەدرەسەلەرىمىزدە دە ارنايى وقىتىلىپ جاتىر»، – دەپ مالىمدەدى اعابەك قونارباي ۇلى جەرگىلىكتى بۇقارالىق اقپارات قۇرالدارى وكىلدەرىنە.
