ورداباسى اۋدانىندا قاڭتار-شىلدە ايلارى ارالىعىندا «سىباعا» باعدارلاماسىمەن 1 066 ءىرى قارا مال الىنىپ، بەرىلگەن تاپسىرما 125 پايىزعا ورىندالدى. بۇل تۋرالى ورداباسى اۋدانى اكىمىنىڭ باسپا ءسوز قىزمەتى حابارلادى.
شارۋالار «التىن اسىق» باعدارلاماسىمەن وسى جىلدىڭ جەتى ايىندا 2 مىڭ 903 قوي الىپ، جۇمىس جۇرگىزۋدە.
سونداي-اق، اۋدانعا «قۇلان» باعدارلاماسى بويىنشا اسىل تۇقىمدى 110 جىلقى اكەلىندى.
مال شارۋاشىلىعىن دامىتۋ بويىنشا اۋىل وكرۋگتەردە تياناقتى تىرلىكتەر جۇرگىزىلۋدە. تۇرعىندار باعدارلامالاردىڭ يگىلىكتەرىن ءتۇسىنىپ، مال اسىلداندىرۋعا، ەتتى مال باعۋعا كوپتەپ دەن قويۋدا.
قاراقۇم اۋىل وكرۋگىنىڭ تۇرعىنى وڭالباي بەيبىت ءوز قاراجاتىنان ءۇيىنىڭ اۋلاسىنان ءبىر مەزەتتە 35-40 ءىرى قارا مال بورداقىلاۋ الاڭىن جاساقتاۋدا. بۇگىندە قورا-جاي قۇرىلىسى اياقتالۋعا جاقىن. جەم-شوبى دە دايىن، ەندى تاياۋ كۇندەرى مال بورداقىلاۋ الاڭى ءوز جۇمىسىن باستايدى.
«سىباعا» باعدارلاماسىن جۇزەگە اسىرۋداعى ماقسات - شاعىن جانە ورتا بيزنەستى ەلىمىزدەگى ەتتى مال شارۋاشىلىعىن دامىتۋعا جۇمىلدىرۋ، ەتتى باعىتتاعى مال باسىنىڭ ۇلەسىن ارتتىرۋ، نارىقتاعى باسەكەلىك پەن ينفراقۇرىلىمدى قالىپتاستىرۋ. ەتتى باعىتتاعى ءمۇيىزدى ءىرى قارا مالىنىڭ ەكسپورتتىق الەۋەتىن دامىتۋ ماقساتىنداعى باعدارلاما اۋىلدا مال ءوسىرىپ، ونىڭ باسىن كوبەيتۋگە نيەت ەتكەن شارۋا ءۇشىن زور قولداۋ. بۇل باعدارلاما شارۋاشىلىقتارداعى، جەكە مال يەلەرىندەگى جەرگىلىكتى مالدىڭ تۇقىمىن ەت باعىتىندا اسىلداندىرۋ ارقىلى ءمۇيىزدى ءىرى قارانىڭ ەت ونىمدىلىگىن ارتتىرىپ، ەتتىڭ وزىندىك قۇنىن ارزانداتۋدى، مال باسىن ءوسىرىپ، مال شارۋاشىلىعى سالاسىندا قوسىمشا جۇمىس ورىندارىن اشۋدى كوزدەيدى.
مەملەكەتتىك باعدارلاما اياسىندا مال وسىرۋمەن اينالىساتىن شارۋاعا جەڭىلدەتىلگەن نەسيە بەرىلەدى.
