قازاقستاندا اۋىل شارۋاشىلىعىن قولداۋ ماقساتىندا «اگروبيزنەس-2020» باعدارلاماسى اياسىندا وڭتۇستىك قازاقستان وبلىسىندا قىرۋار شارۋالار اتقارىلۋدا. سەبەبى، وڭتۇستىك – ىستىق ايماق بولعاندىقتان، جەمىس-جيدەك، كوكونىس وندىرۋگە وتە قولايلى ءوڭىر.
ايماقتىق كوممۋنيكاسيالار قىزمەتىندە «تاۋەلسىزدىك جەتىستىكتەرى» تاقىرىبىندا وتكەن بريفينگتە وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ ءمالىم ەتتى. ونىڭ ايتۋىنشا، ەگىن شارۋاشىلىعى بويىنشا جۇرگىزىلگەن جۇيەلى ءارتاراپتاندىرۋدىڭ ارقاسىندا 1991 جىلمەن سالىستىرعاندا مايلى داقىلداردىڭ ەگىس كولەمى 73 مىڭ گا. 80 مىڭ گەكتارعا، باقشا 49 مىڭنان 59 مىڭ گا.، ال كوكونىس 27 مىڭ گەكتاردان 40،4 مىڭ گا، كارتوپ توعىز مىڭ گەكتاردان 15،3 مىڭ گا ارتقان. سونىمەن قاتار، ەگىس كولەمىمەن قاتار الىنعان ءونىم كولەمى دە ارتقان. ماسەلەن، 1991 جىلى وبلىس بويىنشا 163،4 مىڭ توننا كوكونىس جينالسا، بيىلعى جىلى 866 مىڭ تونناعا، ياعني بەس ەسەگە ارتىپ وتىر.
بريفينگتە ءمالىم بولعانداي بيىلعى جىلى ورتاشا ەسەپپەن - 470 مىڭ تن. استىق جينالىپ، تۇسىمدىلىگى ورتاشا 22 سن/گا. قۇراعان. ال 1991 جىلى استىقتىڭ تۇسىمدىلىگى گەكتارىنا 17،8 سەنتنەر بولعان. وڭتۇستىك شارۋالارى وزدەرىنىڭ ەڭبەكقورلىعىمەن قازاقستاننىڭ تاۋەلسىزدىك كەزەڭىندەگى ەڭ ۇلكەن رەكوردتىق كورسەتكىشكە قول جەتكىزىپ وتىر.
«1999 جىلدىڭ اياعىندا بۇرىنعى 182 ۇجىمشار-كەڭشار جانە مەملەكەتتىك شارۋاشىلىقتار بازاسىندا جەكە مەنشىككە نەگىزدەلگەن 20 مىڭنان استام اۋىل شارۋاشىلىعى قۇرىلىمدارى پايدا بولدى. بۇگىنگى كۇنگە ولاردىڭ سانى 70 مىڭنان استى. سونداي-اق، مەملەكەتتىڭ اۋىل شارۋاشىلىعى سالاسىن تىكەلەي قولداۋى مەن وبلىس اكىمدىگى تاراپىنان جۇرگىزىلگەن جۇيەلى جۇمىستىڭ ناتەجيەسىندە، 2010 جىلدان باستاپ مال شارۋاشىلىعىنىڭ ءونىم ۇلەسى 45%، ال وسىمدىك شارۋاشىلىعىنىڭ ۇلەسى 55 % قۇرادى»،-دەدى باسقارما باسشىسى.
