بۇگىن پارلامەنت ءماجىلىسىنىڭ جالپى وتىرىسىندا دەپۋتاتتار پالاتا بيۋروسى ۇسىنعان ءبىرقاتار زاڭ جوبالارىن تالقىلادى. وتىرىس سوڭىنا قاراي وزدەرىنىڭ ساۋالدارىن ۇكىمەتكە جولداعان حالىق قالاۋلارىنىڭ ءبىرى - وڭالسىن جۇمابەكوۆ وسىنداي مالىمدەمە جاسادى، دەپ حابارلايدى ب ا ق.kz
وڭالسىن جۇمابەكوۆ ءوز سوزىندە: "مەنىڭ ساۋالىم پرەمەر-مينينستر كارىم ماسىموۆكە باعىتتالادى. ەلىمىزدىڭ باس قالاسى استاناداعى ەسىلدىڭ ول جاعالاۋىنا جاڭادان ۇيلەر سالىنا باستاعان كەزدە، مۇنداعى بىرنەشە كوشەلەرگە ەسكى قالالاردىڭ اتاۋى بەرلدى. ولار: تۇركىستان، سارايشىق، ساۋران، سىعاناق، اقمەشىت جانە ورىنبور كوشەلەرى. تاريحي تۇرعىدان قاراعاندا بۇل وتە ورىندى شەشىم. ال ەندى بۇگىنگى تاڭدا ورىنبور قالاسى باسقا مەملەكەتتىڭ، رەسەي فەدەراسياسىنىڭ كوپتەگەن وبلىس ورتالىقتارىنىڭ ءبىرى. بۇگىندە ەلوردامىز استانادا ەكى بىردەي باس كوشەلەر قالىپتاسقان. ولار – قازاق ەلى مونۋمەنتى ورنالاسقان تاۋەلسىزدىك داڭعىلى مەن جوعارىدا اتالعان ورىنبور كوشەسى. سوڭعى كوشەدە مينيسترلىكتەر ءۇيى، باس پروكۋراتۋرا، ۇلتتىق قاۋىپسىزدىك كوميتەتى ورنالاسقان. كوشە تىكەلەي استانا اۋەجايىنا شىعادى. كوپتەگەن شەت ەلدىك رەسمي دەلەگاسيالار دا وسى كوشەمەن جۇرەدى. ەڭ باستىسى – بۇل كوشەدە رەسپۋبليكا پرەزيدەنتى، ۇلت كوشباسشىسىنىڭ باستاماسىمەن تۇرعىزىلعان «ماڭگىلىك ەل» سالتانات قاقپاسى ورنالاسقان. بۇل قاقپانىڭ مۇندا ورنالاسۋىنىڭ وزىندىك سيمۆوليكالىق ءمانى بار. ول حالقىمىزدىڭ ماڭگىلىك بولاشاعىن، ماڭگىلىك مۇراتتارى مەن ماڭگىلىك ەلورداسى مەن ماڭگىلىك تاۋەلسىزىدىگىن رامىزدەيدى. ياعني، بۇل كوشە ءوز ەلىمىزدىڭ سيمۆولدارىنىڭ ءبىرى بولىپ تۇر. سوندىقتان، ەلىمىزدىڭ باس كوشەسى باسقا مەملەكەتتە ورنالاسقان قالانىڭ اتاۋىمەن اتالعانى دۇرىس ەمەس دەپ سانايمىن. ەلباسىمىز «قازاقستان ستراتەگياسى – 2050. ءبىر ماقسات، ءبىر مۇددە، ءبىر بولاشاق» اتتى جولداۋىندا: «ءبىز ارمانداردى اقيقاتقا اينالدىردىق. ماڭگىلىك ەلدىڭ ىرگەتاسىن قالادىق» دەگەن سوزدەرىن ەلىمىز الەم مويىنداعان جەتىستىكتەرگە XXI عاسىر باستالىپ جاتقان كەزدە جەتكەنىن ەسكەرە وتىرىپ، استانا قالاسىنداعى ورىنبور كوشەسىنىڭ اتاۋىن «التىن عاسىر» داڭعىلى دەپ وزگەرتۋدى ۇسىنامىن. ورىنبور قالاسىن ەسكەرۋسىز قالدىرماۋ ءۇشىن جىلدان-جىلعا ءوسىپ، كەڭەيىپ كەلە جاتقان استانا قالاسىنداعى جاڭا كوشەلەردىڭ بىرەۋىن اتاۋعا بولادى دەپ ويلايمىن، - دەدى دەپۋتات.
ەستەرىڭىزگە سالا كەتەيىك، 1920 جىلى 4 قازاندا ورىنبوردا قازاق ولكەسى كەڭەستەرىنىڭ قۇرىلتاي سەزى ءوتىپ، قازاق اكسر-ى قۇرىلعان. ال ورىنبور قالاسى سول كەزدەگى قازاق اكسر-ىنىڭ 1920-1925 جىلدار ارالىعىندا استاناسى ءھام باس قالاسى بولعان.
تەك بۇل عانا ەمەس، رەسەيمەن بايلانىستى نىساندار باسقا ايماقتاردا دا كوپ. ماسەلەن، ەلىمىزدىڭ وڭتۇستىك استاناسى - الماتىدا "ماسكەۋ" اتتى مەتروستانسيا سالىنىپ جاتىر. سونىمەن قاتار، رەسەيلىك ەرەكشەلىكتەردى بىلدىرەتىن باسقا دا ورىندار، ساۋدا ۇيلەرى بار. ميرزويان كوشەسىنىڭ اتى توڭىرەگىندە ءبىراز داۋ شىعىپ، كەيىن باسىلعان-دى.
