اۋدان، وبلىس ماقتاشىلارى ءۇشىن جاقسى جاڭاپىق. ق ر اۋىلشارۋاشىلىعى مينيسترلىگى باسپا ءسوز قىزمەتىنىڭ حابارىنا سۇيەنسەك، 2016 جىلدان تۇقىم شارۋاشىلىقتارىن سۋبسيديالاۋ ەرەجەسىنە ەلەۋلى وزگەرىستەر ەندىرىلگەن. ەستەرىڭىزدە بولسا، مەملەكەت ەليتا مەن ەكىنشى رەپرودۋكسيالى ماقتا شيتتەرىن وندىرۋدە سۋبسيديالاۋدى مۇلدەم توقتاتىپ، تەك ك-1-گە عانا قولداۋ كورسەتەتىن. ناتيجەسىندە، ماقتاارالدىڭ وزىندە تۇقىم شارۋاشىلىقتارىنىڭ سانى كۇرت كەمىپ، ەسەپتە تۇرعاندارىنىڭ زاتىنان گورى اتى عانا قالدى. شۇعىل شارالار جۇزەگە اسىرىلىپ، شەت ەلدەردەن تۇقىمدىق ماتەريالدار دا جەتكىزىلىپ، ولاردى ەككەندەرگە باسىمدىلىقتار دا بەلگىلەندى. سۋبسيديالاۋ ەرەجەسىنە ەنگىزىلگەن قوسىمشالار، شىنتۋايتىنا كەلسەك، ماقتا شارۋاشىلىعىنداعى ەليتالىق جانە تۇقىم شارۋاشىلىقتارىنا «ەكىنشى ءومىر» بەرىپ، ولاردىڭ اياققا تۇرۋىنا سەبەپشى بولاتىن ءتۇرى بار. سونىمەن، جاڭا تاپاپتارعا سايكەس، سۋبسيديالاۋ مولشەرى 30-50-دەن 70% دەيىن ارتقان. سەلەكسيالىق جەتىستىكتەر مەمرەەسترىنە ەنگەن، قازاقستاندا قولدانۋعا ۇسىنىلعان جانە وسى تىزىلىمگە ەنبەگەن سورتتاردىڭ شيتتەرىن وندىرۋدە مەملەكەتتىك قولداۋدىڭ مولشەرلەرى ءارتۇرلى. بىرىنشىلەرىنىكى 70% قۇراسا، ەكىنشى توپتاعى كورسەتكىش - 30. جوعارى رەپرودۋكسيالى ماقتا شيتتەرى مەن وندىرىسشىلەردى تولىق قامتاماسىز ەتۋ - بۇل، ارينە، سالانى دامىتۋداعى ەڭ نەگىزگى تالاپ. بولىنگەن قارجى ءتيىمسىز پايدالانىلادى دەگەن ءتۇرلى سىلتاۋلارمەن سۋبسيديالاۋدى شەگەرۋ سالانىڭ تامىرىنا باپتا سالۋمەن بىردەي ەدى. كوش جۇرە تۇزەلەدى دەمەكشى، ماقتاشىلار جاعى الداعى كەزدە وسىنداي ۆوليۋنتاريستىك شەشىمدەر قابىلدانباسا ەكەن دەيدى. وڭىردە ورنالاسقان ماقتا شارۋاشىلىعى عىلىمي-زەرتتەۋ ينستيتۋتى جوعارى ساپالى وتاندىق، اۋدانداستىرىلعان ماقتا سورتتارىن شىعارۋدا بەلگىلى دەڭگەيدى قامتاماسىز ەتىپ وتىر. الداعى كەزدە عزي فلاگمان رەتىندە قايتا قۇرىلعان تۇقىم شارۋاشىلىقتارىمەن بىرلەسە وتىرىپ جوعارى رەپرودۋكسيالى شيت ءوندىرىسىن شيراتا تۇسەدى دەگەن ءۇمىت بار.

ت.جاسۇزاق ۇلى 

«ماقتاارال» گازەتى، №40  2016