اقتوبەدەگى جەرگىلىكتى پوليسيا باسشىسى ماقسات شلياشيەۆ پەن ونىڭ ورىنباسارى ەرمەك شوقانوۆتىڭ ۇستىنەن باس پروكۋراتۋرانىڭ تەرگەۋ توبى قىلمىستىق ءىس قوزعادى، - دەپ حابارلايدى  Qamshy.kz ازاتتىققا سىلتەمە جاساپ.

باس پروكۋراتۋرا جەرگىلىكتى پوليسيا باسشىلارىن ماۋسىمنىڭ باسىندا بولعان قارۋلى شابۋىل كەزىندە «قىزمەتتە ارەكەتسىزدىك تانىتتى» دەپ ايىپتاپ وتىر. باس پروكۋراتۋرانىڭ تەرگەۋ توبى قىلمىستىق ءىس قاۋلىسىن 11 قازان كۇنى قابىلداعان.

قاۋلىدا كەلتىرىلگەن مالىمەتتەرگە قاراعاندا، بەسىنشى ماۋسىم كۇنى جەرگىلىكتى پوليسيا باسشىلارى «پاللادا» قارۋ ساتاتىن دۇكەنىنە قارۋلانعان پوليسيا قىزمەتكەرلەرىن جىبەرىپ، ودان كەيىنگى قىلمىستاردىڭ الدىن الۋ ءۇشىن ارەكەت ەتپەگەن. «پاللاداداعى» شابۋىلدان سوڭ ۇلتتىق گۆارديانىڭ 6655 اسكەري بولىمىە كەتكەن «قارۋلى توپتىڭ جولىن كەسىپ، ولاردى ۇستاۋعا نۇسقاۋ بەرمەگەن». ياعني، كاسىبي مىندەتتەرىنە نەمقۇرايلى قاراعان.

وسىعان بايلانىستى پوليسيا باسشىلارىنىڭ ۇستىنەن قىلمىستىق كودەكستىڭ 370-بابىنىڭ 4ء-بولىمى («قىزمەتتەگى ارەكەتسىزدىك») بويىنشا ءىس قوزعالعان.

بيىل ماۋسىمنىڭ 5-ىندە اقتوبەدە 26 ادام ەكى قارۋ-جاراق دۇكەنىنە شابۋىلداپ، ۇلتتىق گۆارديانىڭ اسكەري ءبولىمىن باسىپ الۋعا تىرىسقان. شابۋىل مەن اتىستان رەسمي مالىمەت بويىنشا 7 ادام قازا تاۋىپ، 40 شاقتى ادام جارالانعان. التى كۇنگە سوزىلعان ارنايى وپەراسيادا شابۋىلعا كۇدىكتى دەلىنگەن 18 ادامنىڭ كوزى جويىلىپ، بىرنەشە ادام ۇستالعان.

شابۋىلعا قاتىستى 29 ادامعا ءتۇرلى ايىپ تاعىلىپ، ولاردىڭ ءىسى سوتقا جەتتى.