ءسالافيزمدى ۇستانۋشىلار ءوز يدەيالارى مەن قۇندىلىقتارىن ءبىزدىڭ ۇلتتىق مادەنيەتىمىزدەن، رۋحاني داستۇرلەرىمىزدەن جوعارى قويادى. سوندىقتان دا ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ قازاقستان حالقى ءسالافيزمنىڭ تاراۋىنا زاڭمەن تىيىم سالماي-اق، وعان جول بەرمەي، زايىرلى قاعيداتتاردى باسشىلىققا الادى دەگەن سەنىمىن ءبىلدىردى. بۇل تۋرالى ۆەدومستۆو باسشىسى ورتالىق كوممۋنيكاسيالار قىزمەتىندە وتكەن بريفينگتە ايتتى، - دەپ حابارلايدى Qamshy.kz Baq.kz – كە سىلتەمە جاساپ.

«بۇل تاڭداۋدى قازاقستاننىڭ ءاربىر ازاماتى قولداۋى ءتيىس. جۇمىلا كوتەرگەن جۇك جەڭىل بولادى. سالافيتتەردىڭ بارلىعى اشىق ايتپاسا دا قاتاڭ ءدىني قاعيدالارعا قۇرىلعان مەملەكەتتى قوعامدىق قۇرىلىستىڭ يدەالدى جۇيەسى دەپ ەسەپتەيدى. وسىعان بايلانىستى ەلىمىز ءۇشىن ءسالافيزمدى مۇلدەم جات، تەرىس اعىم دەپ سانايمىز»، - دەدى مينيستر.

قوعامدا سالافيزمگە قارسى ءارتۇرلى پىكىرلەر ايتىلىپ جاتىر. ءقازىر مينيسترلىك ءتيىستى مەملەكەتتىك ورگاندارمەن بىرلەسىپ وسى ماسەلەنى مۇقيات قاراستىرۋدا. وسىعان دەيىن قازاقستاندا 23 لاڭكەستىك جانە ەكسترەميستىك ۇيىمعا، سونىڭ ىشىندە سالافيتتىك باعىتتاعى ەكسترەميستىك ۇيىمعا تىيىم سالىنعان.

«وسى رەتتە سالافيزم ۇيىم ەمەس ەكەندىگىن اتاپ ءوتۋ كەرەك. ول ءدىني اعىم، كوزقاراستار جۇيەسى»، - دەدى نۇرلان ەرمەكبايەۆ.

ونىڭ ايتۋىنشا، ەلىمىزدە قولدانىستاعى زاڭدار ءقازىردىڭ وزىندە جاسىرىن ءدىني ۇيىمدارمەن كۇرەسىپ، راديكالدى ءدىني ادەبيەتتەردى تاراتۋدىڭ جولىن كەسۋگە بارلىق مۇمكىندىكتى جاساپ وتىر.