جۇمىسىندا شاي ءىشىپ، شىلىم شەگۋگە ءجيى شىعاتىن شەنەۋنىكتەرگە دە قيىن بولايىن دەپ تۇر. مەملەكەتتىك قىزمەتكەرلەردى باقىلايتىن اگەنتتىك جۇمىستاعى بوس ءجۇرىستى تىيىپ، شىلىم مەن شايعا كەتەتىن ۋاقىتتى بەلگىلەپ بەرمەك.

بۇل تۋرالى Qamshy.kz  31 ارناعا سىلتەمە جاساپ بارلايدى.

اگەنتتىك باسشىلارى وسىلاي اشۋعا مىنسە، سەناتورلار ازداپ اششى سۋ ىشكەندەرگە كەشىرىممەن قاراۋ كەرەك دەپ قىزمەتكەرلەردى قورعاشتاپ شىقتى.

جالاقىسى از دەپ ەتەگى جاسقا تولاتىن مەملەكەتتىك قىزمەتكەرلەر ەندى اسىقپاي وتىرىپ شاي دە ىشە المايتىن سياقتى. مەملەكەتتىك ىستەر جونىندەگى اگەنتتىك شىلىم شەگۋگە شىققىش شەنەۋنىكتەر مەن تاماعى ءجيى قۇرعاپ قالاتىن قىزمەتكەرلەردى قاتاڭ باقىلاۋعا الماق.

ءسويتىپ قىزمەتكەردىڭ ءجۇرىس-تۇرىسىن ۋاقىتپەن بەلگىلەمەككە بەكىنگەن ورگان ولاردى تايم-مەنەدجمەنتكە ۇيرەتەمىز دەپ وتىر.

ءىشۋ دەمەكشى… جۇمىستان تىس ۋاقىتتا، دەمالىستا ازداپ اششى سۋدان ۇرتتاپ قوياتىندارعا كەشىرىممەن قاراۋ كەرەك دەيدى دەپۋتاتتار. سەبەبى سىرا مەن شاراپ ىشكەندەرگە جازا قولدانىلادى دەگەن سوڭ، كەي پىسىقايلار تەنتەك سۋدى تويدا تۇتىنعان شەنەۋنىكتەردى دە جازالاي باستاپتى.

شەنەۋنىكتەردىڭ تۇنگە دەيىن جۇمىستا قالۋىن دەپۋتاتتار وزدەرىنەن كورىپ وتىر. سەناتور سەرىك اقىلباي تەك كۇندىز تۇك بىتىرمەيتىندەر، 6-دان كەيىن جۇمىستا قالادى دەيدى. ال جەكە ءومىرىن ىسىرىپ، بالاسىنا قولى تيمەي جۇرگەن قىزمەتكەرلەرگە جالعىز جاقتاس ءبىلىم ءمينيسترى ەرلان ساعادييەۆ قول استىنداعىلارىن 6-دا جىبەرۋدى باستاپ كەتىپتى.

ال ساعات 6-دان ارتىق جۇمىس ىستەپ قويعاندارعا مەملەكەت كوك تيىن دا تولەمەيدى. تەك جومارت باسشىلار قوسىمشا قارجى بەرەم دەسە، مارحابات. سونداي-اق سەناتورلار كەشكى 6- جارىمنان كەيىن مەملەكەتتىك ورگاندارداعى كومپيۋتەرلەردى ءسوندىرىپ تاستاۋ كەرەكتىگىن قولداپ وتىر.