ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى «جۋرناليستيكا جانە ساياساتتانۋ» فاكۋلتەتى «تەلەراديو جانە قوعاممەن بايلانىس» كافەدراسىنىڭ دوسەنتى مىرزانتاي جاقىپ «اقپارات جانە كوممۋنيكاسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىندا ەڭ الدىمەن بۇقارالىق اقپارات قۇرالدارىنىڭ (باق-تىڭ) قىزمەتكەرلەرى دەگەنىمىز كىمدەر، ولار «ءانشى-جۇلدىزدار» ما، اكتەرلەر مە، الدە جۋرناليستەر مە دەگەن ماسەلەنى انىقتاپ العانىمىز ءجون دەپ سانايدى. بۇل تۋرالى ول قازاقپارات تىلشىسىنە ايتىپ بەردى، - دەپ حابارلايدى Qamshy.kz قازاقپارات سايتىنا سىلتەمە جاساپ.

«ءبىزدىڭ بىلۋىمىزشە، 2016 جىلدىڭ 23 شىلدەسىندە ق ر مادەنيەت جانە سپورت مينيسترلىگى مەن اقپارات جانە كوممۋنيكاسيالار مينيسترلىگى شىعارماشىلىق باعىتتاعى جوعارى وقۋ ورىندارىنىڭ بازاسىندا بۇقارالىق اقپارات قۇرالدارى (ب ا ق) سالاسىنداعى مامانداردى دايارلاۋ تۋرالى كەزدەسۋ وتكىزگەن. وسى كەزدەسۋدىڭ قورىتىندىسى بويىنشا تۇزىلگەن حاتتامادا تەليەۆيزيا سالاسىنداعى جوعارى بىلىكتى مامانداردىڭ قاجەتتىلىگىن ەسكەرە وتىرىپ، قازاق ۇلتتىق ونەر ۋنيۆەرسيتەتى مەن ت.جۇرگەنوۆ اتىنداعى قازاق ۇلتتىق ونەر اكادەمياسىندا «رەجيسسۋرا»، «سەنوگرافيا»، «ارت-مەنەدجمەنت»، «شەشەندىك ونەر»، «اكتەرلىك شەبەرلىك» ماماندىقتارى بويىنشا جاڭا وقۋ باعدارلامالارىن دايىنداۋ تۋرالى شەشىم قابىلدانعان. ءبىزدىڭ تۇسىنگەنىمىز - بۇدان بىلاي بولاشاق تەليەۆيزيا ماماندارى ونەر سالاسىنداعى جوعارى وقۋ ورىندارىندا وقىتىلماقشى. بۇعان قوسا جوعارىدا اتالعان ەكى مينيسترلىكتىڭ باسشىلارى ب ا ق دەپ نەگىزىنەن تەليەۆيزيانى عانا اتاپ وتىرعان سياقتى. بۇگىندە «ءانشى-جۇلدىزدار» مەن «ايتىسكەر اقىن-جۇلدىزدار» جاۋلاپ العان تەلەارنالارىمىزدىڭ رەداكسيالارىن بۇدان بىلاي اكتەرلەر تولىقتىرادى دەگەن ءسوز. سوندا ل.ن. گۋميليەۆ اتىنداعى جانە ءال-فارابي اتىنداعى ۇلتتىق ۋنيۆەرسيتەتتەرىندە بۇرىننان بار جۋرناليستيكا فاكۋلتەتتەرىنىڭ جانە «جۋرناليستيكا» ماماندىعى بويىنشا ءبىلىم الىپ جۇرگەن ستۋدەنتتەردىڭ جاعدايى نە بولماق؟

قوس ۇلتتىق ۋنيۆەرسيتەتتە دە تەلەراديوجۋرناليستيكا كافەدرالارى بار، ەكى ۇلتتىق ۋنيۆەرسيتەتتە دە تەلەراديو سالاسىنىڭ ماماندارى عانا ەمەس، گازەت-جۋرنالدار رەداكسيالارىنىڭ، ينتەرنەت-رەسۋرستارىنىڭ، الەۋمەتتىك جەلىلەردىڭ بولاشاق جۋرناليستەرى دە ءبىلىم الۋدا. سوندىقتان، «اقپارات جانە كوممۋنيكاسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىندا «جۋرناليستيكا»، «قوعاممەن بايلانىس»، «مەدياكوممۋنيكاسيا» جانە ت.ب. ۇعىمدارعا بەرىلەتىن زاڭدىق-قۇقىقتىق انىقتامالاردى ناقتىلاپ، وسى سالالارداعى جوعارى بىلىكتى ماماندار دايارلاۋ، جۋرناليستيكا جانە اقپارات قىزمەتكەرلەرىنىڭ الەۋمەتتىك-تۇرمىستىق جاعدايىنىڭ قورعالۋى، ت.ب. ماسەلەلەرگە دە ەرەكشە نازار اۋدارىلۋى قاجەت»،-دەدى ويىن قورىتقان م.جاقىپ.

ەستەرىڭىزگە سالا كەتەيىك، ق ر اقپارات جانە كوممۋنيكاسيالار ءمينيسترى داۋرەن ابايەۆ حابارلاعانداي،   «اشىق نورماتيۆتىك قۇقىقتىق اكتىلەر» پورتالىنا «اقپارات جانە كوممۋنيكاسيالار ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە تولىقتىرۋلار مەن وزگەرتۋلەر ەنگىزۋ تۋرالى» زاڭ جوباسىنا قاتىستى تۇجىرىمداما قوعام تالقىلانۋى ۇسىنىلعان ەدى.