استانا قالاسىنداعى ترانسفۋزيولوگيا عىلىمي-وندىرىستىك ورتالىعىنداعى HLA-زەرتحاناسىنىڭ ماماندارى الەمگە بەلگىسىز قازاق ۇلتىنا عانا ءتان انتيگەندى تاپقان. قازاق پوپۋلياسياسىنىڭ جاڭا تۇقىمى حالىقارالىق دەرەكتەر قورىندا تىركەلدى، دەپ حابارلايدى Qamshy.kz  Baq.kz سايتىنى سىلتەمە جاساپ.

«زەرتحانادا دونور مەن رەسيپيەنتتىڭ قانىن زەرتتەۋ ارقىلى ولاردىڭ سايكەستىگىن تەكسەرەمىز. وسىنداي تەكسەرۋ بارىسىندا قازاق پاسيەنتىنىڭ قانىنان جاڭا لەيكوسەتارلىق گەننىڭ ءتۇرىن انىقتادىق. بۇل الەمدەگى ءبىزدىڭ اشقان جاڭالىعىمىز بولدى. دۇنيەجۇزىندە ەش جەردە تابىلماعان گەن قازاقستاندا تابىلىپ جاتىر»، - دەپ مالىمدەدى ترانسفۋزيولوگيا عىلىمي-وندىرىستىك ورتالىعىنىڭ تىندەردى يممۋنولوگيالىق تيپتەۋ زەرتحاناسىنىڭ مەڭگەرۋشىسى ايدا تۇرعانبەكوۆا.

ماماننىڭ سوزىنشە، الەمدە قازاقتاردىڭ قانىنا ەشكىم وسىنداي زەرتتەۋ جۇرگىزگەن ەمەس.

«ءبىزدىڭ وزىمىزگە ءتان جاڭا انتيگەن تابىلىپ جاتىر. سەبەبى ەشكىم قازاقتىڭ لەيكوسەتارلىق انتيگەنىن زەرتتەگەن جوق. ءبىز ءبىرىنشى بولىپ وسىنى قولعا الدىق. سوندىقتان وسىنداي جاڭا گەندەردىڭ انىقتالۋى ءالى دە جالعاسادى دەپ ويلايمىن»، - دەيدى ترانسفۋزيولوگ.

جالپى، قازىرگى تاڭدا الەمدە 150 ميلليونعا جۋىق انتيگەن انىقتالعان ەكەن. قازاقتان تابىلعان انتيگەن گەرمانياعا جىبەرىلىپ، وعان «DQB1*03:82» اتاۋى بەرىلدى. وسىلايشا، قازاق پوپۋلياسياسىنىڭ جاڭا تۇقىمى حالىقارالىق دەرەكتەر قورىندا تىركەلدى.
ءبىزدىڭ مامانداردىڭ ايتۋىنشا، بۇل ادەتتەگى انتيگەن جانە ەشقانداي اۋرۋعا اسەر ەتپەيدى. ءبىراق ترانسپلانتاسيا كەزىندە ونى مۇقيات زەرتتەۋ كەرەك.

«لەيكوسيتتەردە ارنايى انتيگەن بولادى، ول ادام مۇشەلەرىن اۋىستىرعان كەزدە ونى قابىلداماۋى مۇمكىن. سوندىقتان وسىنداي جاعداي بولماۋى ءۇشىن دونور مەن رەسيپيەنتتىڭ وسى گەندەرىنىڭ سايكەستىگىن قارايمىز. سوندا عانا ترانسپلانتاسيا جۇرگىزىلەدى»، - دەيدى زەرتحانا مەڭگەرۋشىسى.

ايتا كەتەيىك، استانا قالاسىنداعى ترانسفۋزيولوگيا عىلىمي-وندىرىستىك ورتالىعىنداعى HLA-زەرتحاناسى 2011 جىلى اشىلعان. بۇل زەرتحاناسىز ورگانداردى ترانسپلانتاسيالاۋ مۇمكىن ەمەس. 2011-2015 جىلدار ارالىعىندا 536 وپەراسيا جاسالعان.