الماتىدا قازا تاپقان پوليسەيلەردىڭ تۋىستارى كۇلىكبايەۆقا ءولىم جازاسىن سۇرادى، - دەپ حابارلايدى Qamshy.kz Tengrinews.kz – كە سىلتەمە جاساپ.

تەراكت جاسادى دەگەن كۇدىكتى رۋسلان كۇلىكبايەۆ الدىن الا تىڭداۋ ءوتىپ جاتقان سوتتا وزگە سىبايلاستارىنان بولەك وتىر. سوت تەرگەۋ يزولياتورىنىڭ عيماراتىندا اشىق تارتىپتە ءوتىپ جاتىر. 

سوتتالۋشى سابىرلى كورىنەدى. ول ءتىپتى ءوزىن ءتۇسىرىپ جاتقان وپەراتورلارعا قاراپ كۇلگەن. ايتا كەتەيىك، جۋرناليستەرگە سۋرەتكە جانە ۆيدەوعا تۇسىرۋگە رۇقسات بەرىلدى. سوتتالۋشى رەتىندە كۇلىكبايەۆپەن قاتار ونىڭ بەس سىبايلاسى وتىر. قازىرگى ۋاقىتتا الدىن الا سوت تىڭداۋى ءوتىپ جاتىر. 

پروسەسكە قازا بولعانداردىڭ تۋىستارى كەلگەن. ولار كۇلىكبايەۆتىڭ تارتىبىنە نارازىلىق ءبىلدىرىپ وتىر. ولاردىڭ پىكىرىنشە، سوتتالۋشى سۇراققا ناقتى جاۋاپ بەرمەي، سۋدياعا جاۋاپ بەرگەن كەزىندە تۇرماي قويعان. كۇلىكبايەۆتى ءبىر مەملەكەتتىك ادۆوكات قورعاپ وتىر. سوتتاعىلاردىڭ ايتۋىنشا، ادۆوكاتتاردىڭ ەشقايسىسى ءوز قالاۋىمەن ونىڭ مۇددەسىن قورعاۋعا كەلىسپەگەن. 

ال قازا تاپقانداردىڭ تۋىستارى اتقىشتى ءولىم جازاسىنا كەسۋدى تالاپ ەتىپ وتىر. قازا بولعان پوليسەيدىڭ مەيرامبەك راحماتۋللايەۆتىڭ ايەلى سوتتالۋشى كۇلىكبايەۆتىڭ ايەلىنىڭ بەتىنە تۇكىردى. 

نەگىزگى سوت وتىرىسى 24 قازانعا بەلگىلەندى. وتىرىس كۇن سايىن وتەدى.

ال وسىعان دەيىن رۋسلان كۇلىكبايەۆتىڭ بۇرىندارى كيكبوكسينگپەن اينالىسقانى جانە جەتىستىكتەرى ءۇشىن وسى سپورت تۇرىنەن سان مارتە ماراپات پەن قۇتتىقتاۋلارعا يە بولعانى بەلگىلى بولعان ەدى. ەسىمىن جاريالاماۋدى وتىنگەن ادام، كيكبوكسينگپەن شۇعىلدانعان كۇلەكبايەۆتىڭ "سپورت شەبەرلىگىنە كانديدات" دەگەن اتاعى دا بار ەكەنىن ايتتى. ال بۇگىن، 17 قازاندا الماتىداعى تەراكت بويىنشا الدىن الا سوت وتىرىسى باستالعانى حابارلاندى. سوتتى تەرگەۋ يزولياتورىنىڭ عيماراتىندا وتكىزۋ تۋرالى شەشىمدى سوتتاعىلار رۋسلان كۇلەكبايەۆتىڭ وتە اشۋلى ءارى قوعامعا ءقاۋىپ توندىرەتىندىگىمەن ءتۇسىندىردى. سونداي-اق، قۇقىق قورعاۋ ورگاندارى سوتتالۋشى قاشىپ كەتە مە دەپ قورقىپ وتىر ەكەن. "ول كامەراسىندا كىسەنمەن وتىرادى. ول وتە ءقاۋىپتى، سوندىقتان سوت پروسەسىن تەرگەۋ يزولياتورىنىڭ عيماراتىندا وتكىزۋدى دۇرىس دەپ تاپتىق، سەبەبى قالالىق سوتتىڭ عيماراتىنا تاسىمالداناتىن بولسا، ول قارسىلىق كورسەتۋى مۇمكىن جانە قاشىپ كەتۋگە ارەكەت جاساۋى مۇمكىن. كۇلەكبايەۆتىڭ فيزيكالىق دايىندىعى بار، ول كىسەندەۋلى تۇرسا دا، جاۋاپ الىنىپ جاتقان ساتتە تەرگەۋشىگە ستولدى توڭكەرىپ جىبەرە جازدادى"، - دەيدى سوتتىڭ وكىلدەرى.

ەسكە سالايىق، 18 شىلدەدە الماتىدا تەرروريستىك اكت بولعان ەدى. بەلگىسىز ەر ادام المالى اۋداندىق ءىىب مەن ۇقك دەپارتامەنتىنە قارۋلى شابۋىل جاسادى. وقيعا سالدارىنان بەس ادام، ونىڭ ىشىندە ءۇش پوليسيا قىزمەتكەرى قازا تاپتى. قالادا تەررورلىق قاتەردىڭ قىزىل دەڭگەيى جاريالاندى. قىلمىسكەر ۇستالدى،ول بۇرىن ءىستى بولعان قىزىلوردا وبلىسىنىڭ تۋماسى رۋسلان كۇلىكبايەۆ بولىپ شىقتى.

وسىعان دەيىن ءىىد تەرگەۋ جۇمىستارى بارىسىندا18 شىلدەدە پوليسەيلەردى ءولتىردى دەگەن كۇدىككە ىلىنگەن رۋسلان كۇلەكبايەۆتىڭ جالدامالى پاتەردى انىقتاعان بولاتىن. پوليسياداعىلار پاتەردە ادام ومىرىنە ءقاۋىپتى زاتتاردىڭ بار-جوعىن تەكسەرىپ شىقتى. الايدا، پوليسيا قىزمەتكەرلەرى پاتەردى ءتىنتۋ كەزىندە ءقاۋىپتى زاتتاردى تاپپادى. ال كەشە رۋسلان كۇلىكبايەۆ ەكى ايعا قاماۋعا الىندى.