تامارا اسار جاڭا بەينەبايانىن جارىققا شىعاردى،-دەپ حابارلايدى Qamshy.kz Stan.kz-كە سىلتەمە جاساپ.  ءانشى 20 جىلدان بەرى ارمانداپ كەلە جاتقان دۇنيەسىنە قول جەتكىزگەنىن ايتىپ، كوزىنە جاس الدى. 

وسىدان بىرنەشە اي بۇرىن تامارا قۋانىشتى جاڭالىعىمەن بولىسەتىنىن ايتقان ەدى. ءانشى ۋادە ەتكەن سوزىندە تۇردى. ول 20 جىل بويى ارمانداعان ارمانىنا قول جەتكىزگەنىن ايتتى.

«مۇنى بولە جارىپ، وزگەشە جاڭالىق قىلىپ ايتاتىنىڭ سەبەبى بار. وسىدان 20 جىلعا جۋىق ۋاقىت بۇرىن باسىمنان ۇلكەن قيىندىقتار وتكەن بولاتىن. ونداي كەزدە بالاسى ءۇشىن اكە-شەشە نە ىستەي الادى؟ دۇعا جاساپ، اللادان بالاسىنا دەنساۋلىق سۇراي الادى. سول كەزدە اكەم كوپ ادامعا تىرەۋ بولعان، سۇيەۋ بولعان بەكەت اتا دەگەن ءارۋاقتى جەرگە بارىپ، قۇدايعا جالبارىنىپ، ساداقاسىن بەرگەن ەكەن. ول كەزدە مەن جۇرمەيمىن، مەنى زەمبىلمەن الىپ ءجۇردى. ەسىمدە قالعانى – قاسىمنان ادامدار ءوتىپ: «قانداي جاپ-جاس ادەمى قىز، ءومىرى وسىمەن اياقتالاتىن شىعار»، – دەپ ايتاتىن. كوزىمنەن جاس مولتىلدەپ، «اللادان جارلىق كەلسە انا تاۋدىڭ بيىگىنە شىعىپ، ءان ايتامىن» دەيتىنمىن. سول ارمانىم ورىندالدى»، – دەدى ءانشى 31 ارنانىڭ «ايتا بەرسىن» باعدارلاماسىنا بەرگەن سۇحباتىندا.

ايتا كەتەيىك، تامارا اسار وسىدان 20 جىل بۇرىن جول اپاتىنا ۇشىراپ، ءبىر اياعىنان ايىرىلىپ قالعان بولاتىن. سودان باستاپ ول ماڭعىستاۋ وڭىرىندەگى بوزجيرا شىڭىنا شىعىپ، ءان ايتۋدى ارمانداعان ەكەن. بۇگىندە جاڭا بەينەبايانىن اسقاق ارمانىنا ارناعان ءانشى اللاعا العىس ايتۋمەن كەلەدى.

«بىرەۋگە ول بولماشى نارسە عانا شىعار، ءبىراق ماعان ول – ۇلكەن ارماننىڭ ورىندالعانى. بىرەۋگە كۇندەلىكتى كۇيبەڭ تىرلىكتە بىرەۋدىڭ ءسوز ايتىپ، بىرەۋدىڭ كۇيەۋگە شىققانى جاڭالىق شىعار، ماعان 20 جىلدىق ارمانىمنىڭ ورىندالعانى – جاڭالىق. بىرەۋگە ءان ايتۋ انشەيىن ەرىككەننىڭ ەرمەگى شىعار، ءبىراق ماعان ول قۇدايمەن تىلدەسكەنمەن بىردەي»، – دەپ جالعادى ءسوزىن اسار.

ايتپاقشى، تامارانىڭ ايتۋىنشا، بوزجيرا شىڭىنىڭ ەرەكشە قاسيەتى بار كورىنەدى. ارمانى ورىندالعان جاننىڭ كوزىنە ول جەردە ارقار كورىنەدى ەكەن.

«حالىق ىشىندەگى ءبىر اڭىز بار. سول جەردىڭ ءبىر كۇشى بار. ەگەر ءسىزدىڭ ارمانىڭىز ورىندالسا، كوزىڭىزگە ارقار كورىنەدى. ونى قاسىڭىزداعى ادام كورمەۋى مۇمكىن. مەن سول ارقاردى كوردىم. اللاعا شۇكىر باقىتتىمىن»، – دەپ تۇيىندەدى ءسوزىن ول.