ۇستىمىزدەگى جىلدىڭ 16 قازانى كۇنى «الماتى» ۋنيۆەرسيتەتى وڭتۇستىك استانامىزدىڭ پانفيلوۆ جانە گوگول كوشەلەرىنىڭ قيىلىسىندا ورنالاسقان جاڭا عيماراتىنىڭ اشىلۋ سالتاناتىن وتكىزدى. جاڭا عيماراتتىڭ اشىلۋ سالتاناتىنا ۋنيۆەرسيتەتتىڭ پروفەسسور-وقىتۋشىلار قۇرامى مەن ستۋدەنتتەرى، جوو وكىلدەرى مەن ەسترادا جۇلدىزدارى قاتىستى. اشىلۋ سالتاناتىندا ءسوز سويلەگەن ۋنيۆەرسيتەت رەكتورى، تاريح عىلىمدارىنىڭ كانديداتى شىلدەباي ءسابيت قامىتبەك ۇلى:

- بۇگىن ءبىزدىڭ ۋنيۆەرسيتەت ءۇشىن ايتۋلى كۇن. ولاي دەۋىمىزدىڭ وزىندىك سەبەبى دە بار. ءبىزدىڭ ۋنيۆەرسيتەتىمىز قاناتىن كەڭگە جايىپ، تاعى ءبىر جاڭا عيماراتپەن تولىقتى. «الماتى» ۋنيۆەرسيتەتى – سوڭعى جىلدارى ەلىمىزدە جۇرگىزىلگەن جوو وڭتايلاندىرۋ ساياساتى نەگىزىندە ىرىلەنىپ، زاماناۋي وزگەرىستەر تالابىمەن وڭتۇستىك استانامىزداعى جەكە مەنشىك وقۋ ورىندارىنىڭ كوشىن باستاۋعا ۇمتىلعان ءبىلىم وردالارىنىڭ ءبىرى بولۋدى كوزدەپ وتىر. 18 جىلدىق تاريحى بار ۋنيۆەرسيتەت ءوزىنىڭ قۇرىلعان كۇنىنەن باستاپ، قازىرگى تاڭعا دەيىن مىڭداعان ماماندىق يەسىن شىعارعان كيەلى شاڭىراق. ءبىزدىڭ ۋنيۆەرسيتەتتى بىتىرگەن ماماندىق يەلەرى رەسپۋبليكامىزدىڭ تۇكپىر-تۇكپىرىندە ءتۇرلى سالالاردا قىزمەت جاساپ، قوعام دامۋىنا ءوز ۇلەستەرىن قوسۋدا.

قازىرگى تاڭدا، الماتى ۋنيۆەرسيتەتىندە 30 باكالاۆر، 11 ماگيستراتۋرا، 2 PhD دوكتورانتۋرا ماماندىقتارى بويىنشا ءبىلىم بەرىلەدى. وزىندىك ءبىلىم بەرۋ جۇيەسىندە، عىلىمي جۇمىستاردى ۇيىمداستىرۋدا تاجىريبەسى قالىپتاسىپ كەلە جاتقان جوعارى وقۋ ورنى الىس-جاقىن تمد مەملەكەتتەرىمەن بايلانىس ورناتىپ، اكادەميالىق ۇتقىرلىقپەن كورەي رەسپۋبليكاسى، تۇركيا، ۋكراينا، رەسەي، جۇڭگو، بولگاريا، كيپر، ليتۆا، قىزعىز مەملەكەتتەرى ۋنيۆەرسيتەتتەرىمەن تىعىز قارىم-قاتىناستا. بۇنىڭ ءبارى جاس ءبىلىم ورداسى ءۇشىن ۇلكەن جەتىستىك ەكەندىگىن ايتىپ وتكەنىمىز ءجون. جاڭا عيماراتتىڭ اشىلۋىمەن ۋنيۆەرسيتتىڭ وقىتۋشى-پروفەسسورلار قۇرامىن، سونىمەن قاتار بىلىمگە ۇمتىلعان ستۋدەنتتەردى قۇتتىقتايمىن، - دەپ اتاپ ءوتتى.

رەكتوردىڭ قۇتتىقتاۋ سوزىنەن كەيىن سالتاناتتى تۇردە جاڭا وقۋ عيماراتىنىڭ لەنتاسى قيىلدى. ودان ءارى كونسەرتتىك باعدارلاماعا جالعاستى. «الماتى» ۋنيۆەرسيتەتىنىڭ ۇجىمىن ارنايى قۇتتىقتاۋعا كەلگەن قازاقستاننىڭ ەڭبەك سىڭىرگەن مادەنيەت قايراتكەرى گۇلميرا اقۇرپەكوۆا مەن قازاق مەملەكەتتىك قىزدار پەداگوگيكالىق ۋنيۆەرسيتەتى ونەر جانە مادەنيەت فاكۋلتەتىنىڭ دەكانى گۇلنۇر ومىربايەۆا اسەم داۋىستارىمەن كەزەك-كەزەك اننەن شاشۋ شاشتى. كونسەرتتىك باعدارلاما ودان سايىن قىزا ءتۇستى. اسىرەسە، «جىگىتتەر» كۆارتەتىنىڭ ءسوليسى ايدار تۇرعانبەك پەن ەسترادانىڭ جارقىن جۇلدىزى سەرىكبول سايلاۋبەك ساحناعا شىققاندا ستۋدەنتتەردىڭ قۇرمەت-قوشەمەتى ەرەكشە بولدى. الماتى ۋنيۆەرسيتەتىنىڭ ستۋدەنتتەرى دە ءوز ونەرلەرىن ورتاعا سالدى. ۋنيۆەرسيتەتتىڭ 1 كۋرس ستۋدەنتى جانگيربايەۆا اسەماي مىڭ بۇرالىپ بيلەسە، 3 كۋرس ستۋدەنتى مۋراتوۆا التىناي ءان سالدى. اشىلۋ سالتاناتىنا ارنايى شاقىرتۋمەن كەلگەن مەنتالدى اريفمەتيكادان ءىى رەسپۋبليكالىق وليمپيادانىڭ ءابسوليۋتتى چەمپيونى بايجاقىپ مارعۇلان دا ءوز ونەرىن كورسەتتى.

كونسەرتتىك باعدارلاما اياقتالعان سوڭ ۋنيۆەرسيتەت ۇجىمى مەن ستۋدەنتتەر جاڭا عيماراتتىڭ ءىشىن ارالاپ كوردى. زاماناۋي تەحنيكالىق قۇرال-جابدىقتارمەن جابدىقتالعان ءدارىسحانالار، زەرتحانالار، ينتەراكتيۆتى جانە مۋلتيمەديالىق كابينەتتەر كوپشىلىكتىڭ كوڭىلىنەن شىقتى.