مامىردىڭ 29-ىندا استانادا وتەتىن كەڭەس سامميتىندە ءۇش تاراپتىق كەلىسىمشارتقا قول قويىلادى.  "ەكونوميكا" گازەتىنىڭ جازۋىنشا، بۇل كەلىسىمشارت  800 بەتتەن تۇرادى. 

   ەۋرازيالىق ەكونوميكالىق وداق قۇرۋ تۋرالى يدەيانى 1994 جىلى ماسكەۋ مەملەكەتتىك ۋنيۆەرسيتەتىندە ءدارىس وقىعان كەزدە قازاقستان مەملەكەتىنىڭ  باسشىسى نۇرسۇلتان ءابىش ۇلى نازاربايەۆ ۇسىنىپ، الەمدىك قاۋىمداستىققا جاريا ەتكەن بولاتىن. تاراپتاردىڭ ۇيعارۋىنشا، ەۋرازيالىق ەكونوميكالىق وداق 2015 جىلدىڭ 1 قاڭتارىنان باستاپ جۇمىس ىستەۋگە مۇددەلى. سول ءۇشىن دە  قازاقستان، رەسەي جانە بەلورۋسسيا باسشىلارى وسى جىلدىڭ مامىرىنىڭ 29-ىندا استانا قالاسىندا وتەتىن  جوعارعى ەۋرازيالىق ەكونوميكالىق كەڭەس سامميتىندە بۇل وداقتىڭ قۇرىلۋى  جايىنداعى كەلىسسوزگە قول قوياتىن بولادى. ارينە، استانادا وتەتىن جوعارعى ەۋرازيالىق ەكونوميكالىق كەڭەس ءسامميتىنىڭ جۇمىسىنا دا كوپ سالماق ارتىلاتىنى وز-وزىنەن تۇسىنىكتى. ويتكەنى، كەلەسى جىلدىڭ باسىنان باستاپ جۇمىس ىستەۋگە ءتيىستى بۇل ەكونوميكالىق وداقتىڭ  تۇيتكىلى كوپ، كۇرمەۋى قيىن ماسەلەلەرىن ءار تاراپقا وڭتايلى ءارى دۇرىس شەشۋ ءۇشىن ءوزارا تۇسىنىستىك پەن مۇددەلىلىكتىڭ قاجەت ەكەندىگىن ەشكىم جوققا شىعارمايدى. وسى ورايدا ۇستىمىزدەگى جىلدىڭ ءساۋىر ايىنىڭ 29-ىندا مينسك قالاسىندا وتكەن ەۋرازيالىق ەكونوميكالىق وداق ەلدەرى باسشىلارىنىڭ سامميتىندە قانداي ماسە­لەلەردىڭ كوتەرىلگەنى دە ەسكە تۇسەدى. مينسك سامميتىندە قازاقستان، رەسەي جانە بەلارۋس پرەزيدەنتتەرى ەۋرازيالىق وداقتىڭ الداعى اتقا­راتىن جۇمىستارى مەن بولاشاعىن قىزۋ تالقىلادى. دەرەك كوزدەرى حابارلاعانىنداي، ەۋرازيالىق وداقتىڭ باسشىلارى 800 بەتتەن تۇراتىن ءتيىستى قۇجاتتارعا مامىردىڭ سوڭىنا تامان قول قوياتىن بولىپ تاراسقان ەدى.

"ەكونوميكا" گازەتىنەن ىقشامدالىپ الىندى