تانىمال كومپوزيتور ەركەش شاكەيەۆ ءوزىنىڭ قايتىس بولعان ۇلى سافارعا ارنالعان «اسپاندا جولىعارمىز..» اتتى ءفيلمىن اياقتادى، - دەپ حابارلايدى Qamshy.kz قازاقپاراتقا سىلتەمە جاساپ.

«بۇنى (ءفيلمدى - رەد.) سافاردىڭ دوستارىمەن، ءوز وتباسىممەن، جاقىندارىن جاقسى كورەتىن بارشا جاندارمەن جانە ومىردەن وتكەندەردى ەسكە الاتىن ادامدارمەن بولىسەمىن. ومىردە ەشقاشان جانى جايساڭ جاندار جايلى، سونىڭ ىشىندە تۇلا بويى تۇڭعىشىم، سۇيىكتى ۇلىم جايلى ايتۋدان، ويلاۋدان جالىقپايمىن...»، - دەپ جازدى ەركەش شاكەيەۆ ءوزىنىڭ Facebook-تەگى پاراقشاسىندا.

سونداي-اق، اۆتور پوستىندا گەنناديي گولۆكين مەن كەلل برۋكتىڭ كەزدەسۋىنە بارعانىن ايتادى. وعان شاقىرتۋدى بەرگەن جانە بارۋعا كوندىرگەن ەدۋارد كيمگە العىسىن بىلدىرە كەلە اۆتور گەنا، سەرىك ەلەۋوۆ جانە باحتيار ارتايەۆتار ۇلىمەن زور ىقىلاسپەن تانىسقان ءساتى تۇسىرىلگەن ۆيدەونى تاۋىپ العانىن، ونى فيلمگە قوسقانىن ايتادى. ءسوز اراسىندا گولوۆكينگە شەكسىز العىسىن جەتكىزەدى.

كومپوزيتور الماتىدا قىركۇيەكتىڭ باسىندا وتكەن سافاردى ەسكە الۋعا ارنالعان كەشتى ۇيىمداستىرۋشىلارعا دا العىسىن بىلدىرەدى.

«...ءبىز ۇلىمىزدى سوڭعى ساپارعا شىعارىپ سالىپ جاتقان كۇنى ماعان باۋىرجان شۇكەنوۆ كەلىپ، سافاردىڭ تۋعان كۇنىن ارمان كينوتەاترىندا وتكىزۋدى ۇسىندى. ۇسىنىستى كينوتەاتر اكسيونەرى ءارى مەنىڭ دوسىم ەرپان ساليموۆ تا قولدادى. كەشتى ەرىكتىلەر مەن ونىڭ جاقىن دوستارىنا ارناپ وتكىزۋدى ءجون دەپ شەشتىك. ول جايلى فەيسبۋكتە حابارلادىق.

كەشتە وعان باستى سەبەپكەر ادام جايلى ءسوز ايتىلاتىنى ايتپاسا دا تۇسىنىكتى.  سافاردىڭ دوستارى: دان كامچاتسكيي، دميتريي لەيحمانن، رۇستەم تورەعالييەۆ، نارعىز شۇكەنوۆا، كيريلل، دياستار بۇل ىستە جانە ۇلىم تۋرالى فيلم تۇسىرۋدە كوپ كۇشىن جانە ۋاقىتتارىن سارپ ەتتى. دوسىم ەدۋارد كيم تەحنيكا مەن پرودۋسسەرلىك توپتى ۇيىمداستىردى. ولار كوپتەگەن تۇرعىنداردىڭ ءوتىنىشى بويىنشا ينتەرنەتتە ونلاين-ترانسلياسيا جاسادى.

وتباسىمىزدىڭ دوستارى  جانەل بەكشەنوۆا، وكسانا بايمەنوۆا، شولپان كەرەمەت، قايرات ماجيبايەۆتار شاقىرىلعان جاستارعا داستارحان جايدى. ۆيكتور حومەنكوۆ ءوز توبىمەن كەلىپ، دجاز مۋزىكاسىن شەبەر ورىنداپ، اۋەزدى اتموسفەرا قالىپتاستىردى.

ودان بولەك ەسترادا جۇلدىزدارى جۇلدىز، كەنتال، سيتورا جانە پارۆيز نازاروۆتار، تولقىن زابيروۆا، ەريك تاستامبەكوۆتەر كەلدى.

دوسىمىز دانا ورمانبايەۆا اپپاراتۋرا مەن تەحنيكالىق قىزمەتكەرلەردى الىپ كەلدى.

امەريكادان جۇرەك قالاۋلارىمەن 5 دوسى مەن مەكتەپتە ساباق بەرگەن 3 ۇستازى ۇشىپ كەلدى. مەنىڭ وتباسىمنىڭ وتىنىشىمەن ۆيكتوريا مومىنبايەۆا مەن بولات امانسۇگىروۆ ارۋجان سايننىڭ جاقىندارى ءۇشىن قايىرىمدىلىق اكسياسىن وتكىزدى.

سافاردىڭ دوستارى قوناقتاردى كۇتىپ الىپ جاتتتى.

باۋىرلارىم مەن قارىنداستارىم، وسىلايشا ماحاببات پەن قايىرىمدىلىققا نەگىزدەلگەن قاراپايىم رۋحاني شارانى وتكىزدىك.

شىن جۇرەكتەن سىن ساعاتتا قولداۋ بىلدىرگەندەرىڭىز ءۇشىن العىس ايتامىن. مەن بارلەرىڭىزدى جاقسى كورەمىن جانە بارلىقتارىڭىزدىڭ بەرەكەلى كۇن كەشۋلەرىڭىز ءۇشىن دۇعا تىلەيمىن»، - دەپ جازدى ەركەش شاكەيەۆ.

ەسكە سالا كەتەيىك، سافار شاكەيەۆتىڭ جوعالىپ كەتكەنى تۋرالى شاعىم 16 شىلدە كۇنى پوليسياعا كەلىپ ءتۇستى. ونى 110 پوليسەي، 60 ەرىكتى جانە بىرنەشە سۇڭگۋىر ىزدەگەن ەدى. ىزدەۋ جۇمىستارىنا تىكۇشاق تا جۇمىلدىرالعان بولاتىن. الايدا، سافار شاكەيەۆتىڭ دەنەسى 28 شىلدە كۇنى ەسەنتاي وزەنىنەن تابىلدى.