مامىردىڭ 24 كۇنى ساعات 19.30-دا جامبىل اتىنداعى قازاق مەملەكەتتىك فيلارمونياسىنىڭ كونسەرت زالىندا (تولە بي جانە ش.قالداياقوۆ كوشەلەرىنىڭ قيىلىسى) اقىن-سازگەر، دراماتۋرگ، تاۋەلسىز «پلاتينالى تارلان» سىيلىعىنىڭ لاۋرەاتى، «پاراسات» وردەنىنىڭ يەگەرى يسرايل ساپاربايدىڭ «سەنىڭ تۋعان كۇنىڭدە» اتتى ادەبي-مۋزىكالىق (پوەزيا، ءان، بي) شىعارماشىلىق كەشى وتەدى. كەشكە تانىمال ەسترادا جۇلدىزدارى،  تالانتتى جاس انشىلەر جانە ت.جۇرگەنوۆ اتىنداعى ونەر اكادەمياسىنىڭ ستۋدەنتتەرى قاتىسادى.

            كۇندەلىكتى وتكىزىلىپ جۇرگەن ماشىقتى، ستەرەوتيپتىك سيپاتتاعى كونسەرتتەردەن اتالمىش كەشتىڭ باستى ايىرماشىلىعى مەن وزگەشەلىگى –  ءۇش بىردەي ونەر سالاسىنىڭ، ياعني پوەزيا، ءان، ءبيدىڭ بىر-بىرىمەن كىرىگىپ، بىرىگىپ تۇتاستاي شىعارماشىلىق كەشكە اينالۋى. ارينە، بۇل اۆتور ءۇشىن دە، قويىلىم رەجيسسەرى ءۇشىن دە ۇلكەن ەڭبەكتى، ىجداعاتتى ىزدەنىستى تالاپ ەتەدى.

            ايتا كەتۋ كەرەك، وتكەن جىلدىڭ 5-6-مامىرى كۇندەرى م.اۋەزوۆ اتىنداعى مەملەكەتتىك اكادەميالىق دراما تەاترىندا ي.ساپاربايدىڭ «ماحاببات ماۋسىمى» اتتى ادەبي-مۋزىكالىق ونەر كەشى وتكەن بولاتىن. كەش كورەرمەن-تىڭدارمان قاۋىمى تاراپىنان ۇلكەن قىزىعۋشىلىق تۋعىزىپ، جاقسى جاڭالىق تۇرعىسىندا باعالاندى. «قازاقستان» ۇلتتىق تەلەارناسى بۇل كەشتى تولىقتاي ءتۇسىرىپ، بىرنەشە رەت كورەرمەن نازارىنا ۇسىنعان بولاتىن.

         بۇل شىعارماشىلىق كەش -  رەجيسسەر مەن اقىننىڭ شىنايى دوستىعى مەن بىرنەشە جىلعى شىعارماشىلىق تاندەمىنىڭ يگىلىكتى جەمىسى. انىعىراق ايتقاندا، ءارى ۇستاز، ءارى رەجيسسەر مۇرات ابزەلبايەۆ، نازىك ليريكالىق اقىن – «ماحاببات شايىرى» يسرايل ساپارباي وزدەرىنىڭ ونەر ورىسىندەگى كوپجىلدىق تاجىربيەلەرى مەن قارىم-قابىلەتتەرىن ءبىر ارناعا بىرىكتىرىپ، كوپشىلىك يگىلىگىنە ۇسىنىپ وتىر. بۇل – ىزدەيمىن، تابامىن دەگەن كىسىگە ونەر كوكجيەگىنىڭ شەكسىزدىگىن اڭعارتسا كەرەك.

قۇرمەتتى،  جىر سۇيەر قاۋىم!  ۇلتتىق ونەرىمىزدىڭ كوكجيەگىنە تاعى ءبىر كوز جەتكىزەمىن دەسەڭىز، «سەنىڭ تۋعان كۇنىڭدە» دەپ اتالاتىن كەشتى كورىپ، تاماشالاڭىز!

بايلانىس تەلەفوندارى:  8 701 360 66 63، 8 727 354 06 07    

بيلەتتەر فيلارمونيا كاسساسىندا ساتىلادى.

سۋرەت wikipedia سايتىنان الىندى