31 ارنا كورەرمەندەرىن وتباسىنا ارنالعان جاڭا ويىن-ساۋىق باعدارلامالارىمەن قۋانتۋدى جالعاستىرادى.  جۋىردا ارنامىزدان «ەتو كازاحستان، دەتكا!» دەپ اتالاتىن جاڭا جوبانى تاماشالاي الاسىزدار. 

بۇل باعدارلاما ارقىلى ءوزىڭىزدىڭ ءوي-ورىسىڭىز بەن زەرەكتىگىڭىزدى تەكسەرىپ قانا قويمايسىز، سونداي-اق، جاقىندارىڭىزبەن بىرگە ەكران الدىنداعى ۋاقىتىڭىزدى كوڭىلدى وتكىزەسىز. ءبىر جاعىنان، تانىمال جۇلدىزدارىمىزدىڭ قانشالىقتى پاتريوت جانە زەرەك ەكەنىن تەكسەرەسىز. تەليەۆيكتورينا قازاقستانداعى جاڭا فورماتتاعى شوۋ ءارى ونىڭ ەلىمىزدە بالاماسى جوق. 

شوۋعا ەكى كوماندا قاتىسادى. ءار توپ قازاقستانعا تانىمال ءۇش ادامنان تۇرادى. جۇلدىزدى توپتىڭ ارت جاعىندا ءارى ويىنعا قاتىساتىن، ءارى شوۋدى تاماشالاۋعا كەلگەن ستۋديا قوناقتارى وتىرادى جانە ولار كوماندانىڭ سۇراقتارعا جاۋاپ بەرۋىنە كومەكتەسەدى. تەليەۆيكتورينانىڭ كورەرمەندەرى قاتىسۋشىلارمەن بىرگە قازاقستاننىڭ ەڭ ايگىلى تۇلعالارىن، ەڭ ادەمى جەرلەرىن جانە ەڭ باستى جەتىستىكتەرىن ەسكە ءتۇسىرۋى كەرەك.  وندا دا ادەمى ادىستەر تابۋ ارقىلى. بارلىعىنا ءبىر مينۋت ۋاقىت بەرىلەدى. ءدوپ تاپقانعا 1 ۇپاي.

جۇرگىزۋشى جۇلدىزداردى قازاقستان جايىندا ءارتۇرلى تاقىرىپتاعى سۇراقتارمەن سىنايدى. ولاردىڭ ىشىندە ايگىلى اندەر دە، ەلىمىز جايىنداعى قىزىقتى مالىمەتتەر دە بار، ءتىپتى قازاق ءتىلىن مەڭگەرۋ دەڭگەيى مەن ۇلتتىق تاعامداردىڭ قۇرامىن قانشالىقتى بىلەتىنى دە تەكسەرىلەدى.

 باعدارلاما جالىقتىرمايدى. جۇلدىزدار ميلارىن قوزعاپ، كۇتپەگەن سۇراقتارعا شاپشاڭ جاۋاپ بەرىپ، ءان سالىپ... ءتىپتى تاماق جەپ تە ۇلگەرۋى كەرەك. 

ارا-تۇرا ستۋديادا كۇتپەگەن جايتتار دا ورىن الادى. 31 ارنا قىزۋ بايگەنىڭ قىزىعىن كورسەتۋگە ۋادە بەرەدى!

جۇما كۇنi، 21 قازان كۇنى ساعات 14.00-تە 31 ارنادا!