ورالماندارعا قاتىستى زاڭ جوباسى قابىلدانىپ، ازاماتتىق الۋ ءبىر جىلعا كەمىسە، اتا-جۇرتىنا قونىس اۋداراتىن اعايىندارىمىز 3 ميلليونعا جەتەر ەدى. استاناداعى كوشى-قون كوميتەتىنىڭ باسشىلارى بولاشاققا وسىنداي بولجام جاسادى. الايدا، ورالماندارعا جەڭىلدىك بەرەتىن زاڭ جوباسى ءالى ازىرلەنۋ ۇستىندە، پارلامەنتكە دە جەتكەن جوق،- دەپ  حابارلايدى "31-ارنا".

كوشى-قون كوميتەتىنىڭ باسشىلارى اتاجۇرتقا ورالعىسى كەلەتىن قانداستىرىمىزعا جەڭىلدىك بەرەتىن زاڭ جوباسى جىل اياعىنا دەيىن قابىلدانادى دەگەن سەنىمدە. ءبىراق، قۇجات ءماجىلىس پەن سەنات دەپۋتاتتارىنىڭ "سىنىنا" ۇشىراپ، جاتىپ قالۋى دا مۇمكىن. سوندىقتان، ازاماتتىقتى ءبىر جىلدا الۋ الىستاعى اعايىن ءۇشىن ازىرگە ارمان عانا بولىپ تۇر.  حاديشا قاپاربەك ەسىمدى ديپلومدى ورالمان قىزعا جاڭا قۇجات ازىرگە بۇيىرمايتىن سياقتى. بۇگىن كوشى-قونداعىلار حاديشا قاپاربەك قولدانىستاعى زاڭ بويىنشا ازاماتتىق الۋدى 4 جىل كۇتەدى دەپ جاۋاپ بەردى.

اسلان قارجاۋبايەۆ، ق ر كوشى-قون كوميتەتى ءتوراعاسىنىڭ ورىنباسارى:

ول كىسى قىتايلىق پاسپورتىن قايتا جاڭارتقاننىڭ وزىندە جاڭا زاڭ قابىلدانعانعا دەيىن ءتورت جىل كۇتۋىنە تۋرا كەلەدى. جاڭا زاڭ قابىلدانعاننان كەيىن ازاماتتىق الۋعا بىردەن ءوتىنىش بىلدىرۋىنە بولادى.

   بۇل  "كوشى-قون" تۋرالى  زاڭعا وزگەرىس  ەنگىزۋ راسىندا دا  ۇزاققا  سوزىلاتىن  سەكىلدى.  سەبەبى، ەجاق ءمينيسترى تامارا  دۇيسەنوۆانىڭ باستاماسى تەك ۇسىنىس  قانا. ال، قابىلدانىپ  كەتكەن زاڭ  جوباسىنا  وزگەرىس  ەنگىزۋ كۇردەلى پروسەسس.  وعان بيلىك باسىنداعىلاردىڭ اسا  ىنتالى ەمەس ەكەنى  دە  بايقالادى.   بۇل تۋرالى ايدىڭ باسىندا  الماتى قالاسىنداعى  دۇنيەجۇزى  قازاقتار  قاۋىمداستىعى ۇيىمداستىرعان جيىندا  ۇيىم  ءتوراعاسى تالعات ماماشيەۆ تە زاڭ جوباسىنا  وزگەرىس ەنگىزۋ وڭاي ەمەس ەكەندىگىن ايتقان  بولاتىن:  "سوڭعى ۋاقىتتا كوشتىڭ توقتاپ  تۇرعانى  راس. ءبىزدىڭ «شاش  ال دەسە،  باس  الاتىن» اتقارۋشى بيلىك سوڭعى ۋاقىتتا  كوشتى توقتاتۋعا تىرىستى.  ونى جاسىراتىنى جوق. الايدا، وتكەندە  ۇكىمەتتىڭ وتىرىسىنان كەيىن ەڭبەك جانە الەۋمەتتىك قورعاۋ ءمينيسترى تامارا دۇيسەنوۆا كوشى-قون سالاسىنداعى ەلەۋلى جاڭالىقتار  مەن كوش ماسەلەسىندەگى كەتكەن قاتەلىكتەردى ايتتى. دەگەنمەن، بۇل سول ايتىلعان كۇننىڭ ەرتەسىنە جۇزەگە اسىرىلادى دەگەندى بىلدىرمەيدى. سىزدەر مىنانى تۇسىنسەڭىزدەر،  بىلتىر كوشى-قون تۋرالى زاڭ قابىلدانىپ كەتكەن، جانە  ول  زاڭعا وزگەرتۋ ەنگىزۋ وڭاي شارۋا  ەمەس. ۇكىمەت وعان  ءتيىستى قاۋلىلارىن قابىلداپ، زاڭعا ءتيىستى وزگەرىستەردى ەنگىزۋ كەرەك. بۇل  ۇزاق پروسەسس"، - دەگەن بولاتىن.

"قامشى"  سىلتەيدى