"قاراعاندى وبلىسىندا اسكەري مەرزىمدىك قىزمەت وتەپ جۇرگەن ساربازدىڭ جانسىز دەنەسى كۇزەت مۇناراسىنان تابىلدى. سارباز قاتاڭ تارتىپتەگى كولونيانى كۇزەتكەن. الدىن الا بولجام بويىنشا 19 جاستاعى مىرزاباي ساپاربايەۆ كالاشنيكوۆ اۆتوماتتى قارۋىنان ءوزىن باستان اتقان" دەپ حابارلايدى Tengrinews.kz "جەتىنشى ارنا"تەلەارناسىنا سىلتەمە جاساپ.

قايعىلى وقيعا دولينكا اۋىلىنداعى تۇزەتۋ مەكەمەسىندە كۇندىزگى ۋاقىتتا ورىن العان. ساربازدىڭ ءولى دەنەسى كۇزەتتى الماستىرۋ كەزىندە تابىلعان. ق ر ءىىم ءىا "ورتالىق" ايماقتىق كوماندوۆانيەسى باستىعىنىڭ تاربيە جۇمىستارى بويىنشا ورىنباسارى مۇرات اتيبايەۆ ونىڭ وڭتۇستىك قازاقستان وبلىسىنىڭ تۋماسى ەكەنىن، وتكەن جىلى جەلتوقسان ايىندا الماتى قالاسىنان مەرزىمدىك اسكەر قاتارىنا شاقىرىلعانىن جانە العاشقى كەزدە اسكەردە قىزمەت ەتۋدەن باس تارتىپ، اتا-اناسىمەن سويلەسىپ، ءتۇسىندىرۋ جۇمىستارى جۇرگىزىلگەن سوڭ قىزمەت ەتۋگە كەلىسكەنىن ايتادى. اتيبايەۆتىڭ سوزىنە قاراعاندا، قايتىس بولعان ساربازدىڭ دەنەسىنە ەش زاقىم كەلمەگەن، قىلمىس ءىزى جوق جانە كۇش كورسەتۋ بولماعان. ساربازدىڭ نەلىكتەن وز-وزىنە قول جۇمساعانى بەلگىسىز. قازىرگى ۋاقىتتا تەكسەرۋ جۇمىستارى جۇرگىزىلىپ جاتىر.

دەسە دە، كتك تەلەارناسىنىڭ مالىمەتىنە قاراعاندا، ساپاربايەۆقا بايىرعى قىزمەتكەرلەر تاراپىنان قىسىم كورسەتىلگەن بولۋى ىقتيمال. قايتىس بولعان ساربازدىڭ تۋىستارى "قايعىلى وقيعا الدىندا ول اناسىنان "دەمبەلدەر" ءۇشىن 20 مىڭ تەڭگە مەن ساعات سالىپ جىبەرۋدى سۇراعان" دەيدى. تۋىستارى "ونى ولىمگە يتەرمەلەگەن" دەپ وتىر.

سونىمەن قوسا، تەلەارنا بۇل 6505 اسكەري بولىمىندەگى ءبىرىنشى قايعىلى وقيعا ەمەس ەكەنىن مالىمدەدى. وسىدان جارتى جىل بۇرىن مەرزىمدى اسكەري قىزمەت وتەپ جۇرگەن بەكجان باۋىرجانوۆ اسكەردەن قايتۋىنا ەكى كۇن قالعاندا اسىلىپ قالعان بولاتىن، ال ءبىر جىرىم جىل بۇرىن الەكساندر زايسيەۆ كۇزەتتە تۇرعان جەرىندە ءوزىن-وزى اتقان ەدى.